മെസ്സിയെ പതിറ്റാണ്ടിന്‍റെ താരമായി തെരഞ്ഞെടുത്തു, പ്രതിഷേധവുമായി റൊണാൾഡോ ആരാധകർ

ബേൺ: ബാഴ്​സലോണയുടെ അർജൻറീനിയൻ സൂപ്പർ താരം ലയണൽ മെസ്സിയെ പതിറ്റാണ്ടിന്‍റെ ഫുട്​ബാൾ താരമായി തെരഞ്ഞെടുത്തു. യുവന്‍റസിന്‍റെ പോർച്ചുഗീസ്​ സ്​ട്രൈക്കർ ക്രിസ്​റ്റ്യോനോ റൊണാൾഡോയെ പിന്തള്ളിയാണ്​ മെസ്സി ജേതാവായത്​. ജർമനിയിലെ ബേൺ ആസ്ഥാനമായുള്ള ഇന്‍റർനാഷണൽ ​ഫെഡറേഷൻ ഓഫ്​ ഫ​ുട്​ബാൾ ഹിസ്റ്ററി ആൻഡ്​ സ്റ്റാറ്റിസ്റ്റിക്​സ്​ ആണ്​ 2011-2020 കാലയളവിലെ മികച്ച താരങ്ങളുടെ പട്ടിക പുറത്തുവിട്ടത്​. 150 രാജ്യങ്ങളിലുള്ള തങ്ങളുടെ അംഗങ്ങളുടെ വോട്ട്​ അടിസ്ഥാനത്തിലാണ്​​ ആദ്യ പത്ത്​ സ്ഥാനക്കാരെ തെരഞ്ഞെടുത്തത്​.

ആറ്​ ലാലിഗ കിരീടങ്ങളും അഞ്ച്​ കോപ്പ ഡെൽ റേ കിരീടങ്ങളും രണ്ട്​ ചാംപ്യൻസ്​ ലീഗ്​ കിരീടങ്ങളും നാല്​ ബാലൻഡി ഓർ പുരസ്​കാരങ്ങളും ഈ കാലയളവിൽ മെസ്സി സ്വന്തമാക്കിയിട്ടുണ്ട്​. 2014 ഫിഫ ലോകകപ്പിലെ മികച്ച താരത്തിനുള്ള പുരസ്​കാരവും മെസ്സിയുടെ പേരിലുണ്ട്​.

മെസ്സി ഒന്നാമതായ ലിസ്റ്റിൽ റൊണാൾഡോ രണ്ടാമതാണ്​. സ്​പാനിഷ്​ താരം ആന്ദ്ര ഇനിയെസ്റ്റ മൂന്നാമതും ബ്രസീൽ സൂപ്പർ താരം നെയ്​മർ നാലാമതുമുണ്ട്​. അതേ സമയം ആദ്യ പത്തുപേരിൽ ഉറുഗ്വയുടെ അത്​ലറ്റികോ മാഡ്രിഡ്​ താരം ലൂയിസ്​ സുവാരസ്​ ഉൾപ്പെടാത്തതിൽ പ്രതിഷേധവുമായി നിരവധി പേർ രംഗത്തെത്തിയിട്ടുണ്ട്​. ലിവർപൂൾ, ബാഴ്​സലോണ ടീമുകൾക്കായും ഉറുഗ്വായ്​ക്കായും സുവാരസ്​ പോയ ദശാബ്​ദം മിന്നിത്തിളങ്ങിയിരുന്നു. റൊണാൾഡോയെ രണ്ടാമതാക്കിയതിൽ പ്രതിഷേധിച്ച്​ ആരാധകരും അവാർഡിനെതിരെ സമൂഹമാധ്യമങ്ങളിൽ പ്രതി​​ഷേധമുയർത്തുന്നുണ്ട്​. ആന്ദ്ര ഇനിയേസ്റ്റ അവസാന വർഷങ്ങളിൽ ​നിറംമങ്ങിയിരുന്നിട്ടും മൂന്നാംസ്ഥാനത്തെത്തിയത്​ അത്​ഭുതപ്പെടുത്തുന്നതാണെന്നും നിരവധി പേർ പ്രതികരിച്ചു.