മെസ്സിയെത്തിയാൽ പിന്നെ സിറ്റിയെ പരാജയപ്പെടുത്താൻ ബുദ്ധിമുട്ടാകും -യു​ർ​ഗ​ൻ ​​​​​േക്ലാപ്​​

ലിവർപൂൾ: ബാഴ്​സലോണ വിടാൻ ഒരുങ്ങുന്ന അർജൻറീനൻ സൂപ്പർതാരം ലയണൽ മെസ്സി ലിവർപൂളിൽ ചേരില്ലെന്ന്​ കോച്ച്​ യുർ​ഗൻ ​​​​േക്ലാപ്​. ശനിയാഴ്​ച ആഴ്​സണലുമായുള്ള കമ്യൂണിറ്റി ഷീൽഡ്​ ഫൈനലിന്​ മുന്നോടിയായി നടന്ന വാർത്തസമ്മേളനത്തിൽ ഉയർന്ന ചോദ്യത്തിന്​ മറുപടി പറയുകയായിരുന്നു ലിവർപൂൾ കോച്ച്​.

'തീർച്ചയായും മെസ്സിയെ ടീമിലെത്തിക്കുക എന്നത്​ എതൊരു ടീമിൻെറയും ആഗ്രഹമാണ്​. പക്ഷെ, നിലവിൽ അത്​ സാധ്യമല്ല. അതുകൊണ്ട്​ തന്നെ ഞങ്ങൾ അതിനെക്കുറിച്ച്​ ചിന്തിച്ചിട്ടില്ല' -​​േക്ലാപ്​ പറഞ്ഞു.

'അദ്ദേഹം മാഞ്ചസ്​റ്റർ സിറ്റിയിലെത്തുന്നത്​ അവരെ കൂടുതൽ ശക്​തരാക്കും. നിലവിൽ സിറ്റിയെ തോൽപ്പിക്കുക എന്നത്​ ഏറെ ബുദ്ധിമുട്ടാണ്​. മെസ്സിയെത്തിയാൽ അവരെ പരാജയപ്പെടുത്താൻ കൂടുതൽ പാടുപെടേണ്ടി വരും. മെസ്സി വരിക എന്നത്​ പ്രീമിയർ ലീഗിനെ സംബന്ധിച്ചടത്തോളം 100 ശതമാനവും നേട്ടമാണ്​. ലോകത്തിലെ ഏറ്റവും മികച്ച താരം ഇവിടെ എത്തുക എന്നത്​ ലീഗിനൊരു മുതൽക്കൂട്ടാണ്​. ​

പ്രീമിയർ ലീഗിന്​ നിലവി​െലാരു ഉത്തേജനത്തിൻെറ ആവശ്യമില്ല. എന്നാൽ, പുതിയ നീക്കം വലിയ ഉത്തേജനം തന്നെയായിരിക്കും. മെസ്സി സ്​പെയിനി​ലെല്ലാതെ മറ്റൊരു ലീഗിലും കളിച്ചിട്ടില്ല. ഇംഗ്ലണ്ടിലെ ഫുട്​ബാൾ വ്യത്യസ്​തമാണ്​. അതുകൊണ്ട്​ തന്നെ അദ്ദേഹം ഇവിടെ കളിക്കുന്നത്​ കാണാൻ കാത്തിരിക്കുകയാണ്​. എന്നാൽ, അത്​ ഉണ്ടാകുമോ എന്ന്​ ഉറപ്പില്ല' -​േക്ലാപ്​ കൂട്ടിച്ചേർത്തു.

ഇംഗ്ലീഷ്​ പ്രീമിയർ ലീഗിൽ കഴിഞ്ഞ രണ്ട്​ തവണയും മാഞ്ചസ്​റ്റർ സിറ്റിയായിരുന്നു ചാമ്പ്യൻമാർ. അവരുടെ അപ്രമാധിത്വം അവസാനിപ്പിച്ചാണ്​ ഇത്തവണ യുർഗൻ ​േക്ലാപി​ന്​ കീഴിൽ ലിവർപൂൾ ആദ്യമായി കിരീടം ചൂടുന്നത്​.

അതേസമയം, മെസ്സി സിറ്റിയിലേക്ക്​ തന്നെ വരുമെന്ന പുതിയ റിപ്പോർട്ടുകളാണ്​ പുറത്തുവരുന്നത്​. ഫ്രഞ്ച്​ ടീം പി.എസ്​.ജി മെസ്സിയെ ക്ഷണിച്ചിരുന്നെങ്കിലും അദ്ദേഹത്തിന്​ താൽപ്പര്യം സിറ്റിയാണെന്ന്​ പിതാവ്​ ജോർജ് മെസ്സി​ ടീമിനെ അറിയിച്ചതായി ഫ്രഞ്ച്​ മാധ്യമം റിപ്പോർട്ട്​ ചെയ്​തു.