ചെൽസിയെ സഡൻഡെത്തിൽ കീഴടക്കി ലിവർപൂളിന് ലീഗ് കപ്പ്

ലണ്ടൻ: പെനാൽറ്റി തടുക്കുക എന്ന ദൗത്യത്തോടെ അവസാനനിമിഷം കളത്തിലെത്തിയ ഗോൾകീപ്പർ കെപ അരിസബലാഗ കിക്ക് ആകാ​ശത്തേക്ക് പറത്തി വില്ലനായപ്പോൾ ചെൽസിയെ സഡൻഡെത്തിൽ കീഴടക്കി ലിവർപൂൾ ഇംഗ്ലീഷ് ലീഗ് കപ്പ് സ്വന്തമാക്കി. ഗോൾരഹിതമായ നിശ്ചിത സമയത്തിനും അധിക സമയത്തിനുംശേഷം ഷൂട്ടൗട്ടും കടന്ന് സഡൻഡെത്തിന്റെ അനിശ്ചിതത്വത്തിലേക്ക് നീങ്ങിയ കളിയിലാണ് ചെൽസിയെ 11-10ന് മറികടന്ന് യുർഗൻ ക്ലോപിന്റെ ടീം കപ്പുയർത്തിയത്.

കളത്തിലുണ്ടായിരുന്ന 22 പേരും കിക്കെടുക്കാൻ നിർബന്ധിതരായ കളിയിൽ കെപയുടെ കിക്ക് മാത്രമാണ് പാഴായത്. ലിവർപൂളിന്റെ 11ാം കി​െക്കെടുത്ത ഗോളി കവോമിൻ കെല്ലെഹർ ലക്ഷ്യംകണ്ടപ്പോൾ അടുത്ത കിക്കിൽ കെപക്ക് ലക്ഷ്യം തെറ്റുകയായിരുന്നു. മത്സരത്തിനുടനീളം മികച്ച ഫോമിലായിരുന്ന ഫസ്റ്റ് ഗോളി എഡ്വേർഡ് മെൻഡിയെ മാറ്റി ഷൂട്ടൗട്ടിന് തൊട്ടുമുമ്പാണ് ചെൽസി കോച്ച് തോമസ് ടൂഹൽ പെനാൽറ്റി സ്‍പെഷലിസ്റ്റ് എന്ന പേരിൽ കെപയെ കളത്തിലിറക്കിയത്.