അയാൾ പറഞ്ഞത്​ കള്ളം; ബാഴ്​സക്കുവേണ്ടി സൗജ്യന്യമായി കളിക്കാൻ ആവശ്യപ്പെട്ടിട്ടില്ല -മെസ്സി

21 വർഷ​ം നീണ്ട സഹവാസത്തിനുശേഷം അർജന്‍റീനൻ താരം ലയണൽ മെസ്സി ബാഴ്​സലോണയോട്​​ ഗുഡ്​ ബൈ പറഞ്ഞത്​ അടക്കി നിർത്താനാവാത്ത കണ്ണീരിലായിരുന്നു. തന്‍റെ കരിയറിൽ ഒരിക്കലും സംഭവിക്കില്ലെന്ന്​ പ്രതീക്ഷിച്ചിരുന്നത്​ ഒരു സുപ്രഭാതത്തിൽ അറിഞ്ഞതോടെ ആ ഇതിഹാസത്തിന്​ കണ്ണീരടക്കാനായില്ല.

വൻ സാമ്പത്തിക പ്രതിസന്ധി കാരണമായിരുന്നു ബാഴ്​സ മൈതാനം വിട്ട്​ മെസ്സിക്ക്​ ഇറങ്ങേണ്ടി വന്നത്​. ഈ സീസൺ തുടക്കത്തിൽ ക്ലബിന്‍റെ നന്മക്ക്​ വേണ്ടി പ്രതിഫലം പകുതിയായി കുറക്കാമെന്ന്​ സമ്മതിക്കുകയും ചെയ്​തിരുന്നു. എന്നാൽ അതും മതിയാവില്ലെന്ന്​ വന്നതോടെയാണ്​ മെസ്സിയെ വിൽക്കാൻ ക്ലബ്​ തീരുമാനിച്ചത്​.

ബാഴ്​സ വിട്ട്​ പി.എസ്​.ജിയിലേക്ക്​ കൂടുമാറിയ മെസ്സി, ആ പടിയിറക്കം മനസിൽ നിന്ന്​ മറന്നിരുന്നു. എന്നാൽ, കഴിഞ്ഞ ദിവസം ബാഴ്​സ പ്രസിഡന്‍റ്​ യുവാൻ ലെപോർട്ടയുടെ പ്രസ്​താവന മെസ്സിയെ വല്ലാതെ വേദനപ്പിച്ചു. സൗജന്യമായി കളിക്കാൻ മെസ്സി ഒരുക്കമാണെങ്കിൽ ബാഴ്​സയിൽ താരത്തിന്​ തുടരാമായിരുന്നുവെന്നാണ്​ ​ലെപോർട്ട പ്രതികരിച്ചത്​. എന്നാൽ, ഈ പ്രസ്​താവനയോട്​ മെസ്സി രൂക്ഷമായി പ്രതികരിച്ചു. പ്രസിഡന്‍റ്​ അങ്ങനെയാരു ആവശ്യം തന്‍റെ മുന്നിൽ വച്ചില്ലെന്നും ബാഴ്​സക്ക്​ വേണ്ടി സൗജന്യമായി കളിക്കുമായിരുന്നുവെന്നും മെസ്സി പറഞ്ഞു.