സലാഹിന്​ 100ാം പ്രീമിയർ ലീഗ്​ ഗോൾ; ലിവർപൂളിന്​ ജയം

ലീഡ്​സ്​: ഞായറാഴ്ച ലീഡ്​സ്​ യുനൈറ്റഡിനെതിരായ മിന്നും ജയത്തിനിടയിലും ലിവർപൂൾ ആരാധകർക്ക്​ നിരാശ സമ്മാനിച്ച്​ ഹാർവി എലിയറ്റിന്‍റെ പരിക്ക്​. ലീഡ്​സ്​ താരം പാസ്​കൽ സ്​ട്രെയിറ്റിന്‍റെ കടുത്ത ഫൗളിലാണ്​ എലിയറ്റിന്​ ഗുരുതരമായി പരിക്കേറ്റത്​.

18കാരനെ ഉടൻ തന്നെ ആശുപത്രിയിലേക്ക്​ മാറ്റിയിരുന്നു. താരത്തെ ആശുപത്രിയിൽ നിന്ന്​ ഡിസ്​ചാർജ്​ ചെയ്​തതായും അടുത്ത ദിവസം ശസ്​ത്രക്രിയക്ക്​ വിധേയനാക്കുമെന്നും ലിവർപൂൾ അറിയിച്ചു.

സൂപ്പർ താരം മുഹമ്മദ്​ സലാഹിന്‍റെ 100ാം പ്രീമിയർലീഗ്​ ഗോളിന്‍റെ മികവിൽ ലീഡ്​സിനെതിരെ 3-0ത്തിനായിരുന്നു ലിവർപൂളിന്‍റെ ജയം. ഫാബിഞ്ഞോയും സാദിയോ മാനേയുമാണ്​ മറ്റ്​ സ്​കോറർമാർ. നാല്​ മത്സരത്തിൽ നിന്ന്​ 10 പോയിന്‍റുമായി ലിവർപൂൾ പോയിന്‍റ്​ പട്ടികയിൽ മൂന്നാം സ്​ഥാനത്തെത്തി.

മാഞ്ചസ്റ്റർ യുനൈറ്റഡിനും ചെൽസിക്കും 10 പോയിന്‍റ്​ വീതമാണെങ്കിലും ഗോൾ വ്യത്യാസത്തിൽ യുനൈറ്റഡാണ്​ ഒന്നാമത്​.