കോവിഡ് ചട്ടം ലംഘിച്ചതായി പരാതി ലഭിച്ചിട്ടില്ല; നെയ്​മർ ചാമ്പ്യൻസ്​ ലീഗ്​ ഫൈനൽ കളിക്കുമെന്ന്​ യുവേഫ

യുവേഫ ചാമ്പ്യന്‍സ് ലീഗ്​ സെമി ഫൈനലില്‍ കോവിഡ് ചട്ടം ലംഘിച്ചതുമായി ബന്ധപ്പെട്ട്​ പി.എസ്​.ജിയുടെ ബ്രസീലിയൻ​ സൂപ്പര്‍ താരം നെയ്മറിനെതിരെ നടപടിയില്ല. ബയേൺ മ്യൂണിക്കിനെതിരെ നടക്കുന്ന കലാശപ്പോരിൽ താരത്തെ വിലക്കിയേക്കില്ലെന്നാണ്​ റിപ്പോർട്ട്​. നെയ്മറിനെതിരെ കൂടുതല്‍ നടപടിയുണ്ടാകില്ലെന്ന് യുവേഫ വ്യക്തമാക്കിയതായി ഡെയ്‌ലി മിററാണ്​ വാർത്ത പുറത്തുവിട്ടത്​. അതോടെ മികച്ച ഫോമിലുള്ള നെയ്​മർ പി.എസ്​.ജിയെ മുന്നിൽ നിന്ന്​ നയിക്കും.

നെയ്മര്‍ കോവിഡ് ചട്ടം ലംഘിച്ചതായി ഇതുവരെ ഒരു പരാതിയും യുവേഫയുടെ അച്ചടക്ക സമിതിക്ക്​ ലഭിച്ചിട്ടില്ല. അതുകൊണ്ട്​ ഇതുമായി ബന്ധപ്പെട്ട്​ കൂടുതല്‍ വിവാദങ്ങള്‍ക്കും നടപടിയിലേക്കും പോകണ്ടെന്ന നിലപാടിലാണ് യുവേഫ. ലെയ്പ്‌സിഗിനെതിരായ സെമി ഫൈനൽ മത്സരത്തിനിടെയായിരുന്നു വിവാദമായ സംഭവം.

മത്സരം എതിരില്ലാത്ത മൂന്ന്​ ഗോളിന്​ പി.എസ്​.ജി വിജയിച്ചതിന്​ പിന്നാലെ ലെയ്പ്‌സിഗ് താരം മാര്‍സല്‍ ഹാല്‍സ്റ്റന്‍ബെര്‍ഗുമായി നെയ്​മർ ജഴ്‌സി കൈമാറുകയായിരുന്നു. കോവിഡി​െൻറ പശ്ചാത്തലത്തില്‍ കര്‍ശന സുരക്ഷയൊരുക്കിയാണ് ടൂര്‍ണമെൻറുകള്‍ സംഘടിപ്പിക്കുന്നത്. മത്സരത്തിനിടെയുള്ള അതിരുവിട്ട ആഹ്​ളാദ പ്രകടനങ്ങൾ പോലും വിലക്കി താരങ്ങള്‍ക്കായി ബയോബബിള്‍ സുരക്ഷയൊരുക്കിയ സാഹചര്യത്തിലായിരുന്നു നെയ്മര്‍ ജഴ്‌സി കൈമാറി ചട്ടലംഘനം നടത്തിയത്. കോവിഡ് നിയമപ്രകാരം 14 ദിവസത്തെ ക്വാറൻറീന്​ സാധ്യതയുള്ള ലംഘനമായിരുന്നു നെയ്​മറി​േൻറത്​. എന്നാൽ, യുവേഫയുടെ പുതിയ തീരുമാനം പി.എസ്​.ജിക്ക്​ ആശ്വാസം പകരുന്നതാണ്​.