'ജയിച്ച' കളി കൈവിട്ട്​ അർജന്‍റീന; അപരാജിത കുതിപ്പുമായി ബ്രസീൽ

ജയിച്ച കളി അവസാന മിനുറ്റിൽ കൈവിട്ട അർജന്‍റീനക്ക്​ ലോകകപ്പ്​ യോഗ്യത മത്സരത്തിൽ വീണ്ടും സമനില. കൊളംബിയക്കെതിരെ ആദ്യ പത്തുമിനിറ്റിൽ രണ്ടുഗോളിന്​ മുന്നിട്ട ശേഷമായിരുന്നു നീലക്കുപ്പായക്കാർ ജയം അടിയറവ്​ വെച്ചത്​.

മത്സരത്തിന്‍റെ മൂന്നാം മിനുറ്റിൽ തന്നെ കൊളംബിയൻ വലകുലുക്കി അർജന്‍റീന അതി ഗംഭീരമായാണ്​ മത്സരം തുടങ്ങിയത്​. ​ഫ്രീകിക്കിന്​ തലവെച്ച്​ റെമേറോയാണ്​ ഗോൾ കുറിച്ചത്​. എട്ടാംമിനുറ്റിൽ വീണുകിട്ടിയ അവസരം വലയിലെത്തിച്ച്​ പരേദസ്​ അർജന്‍റീനയുടെ ലീഡ്​ വർധിപ്പിച്ചു.

എന്നാൽ പതിയെ മത്സരത്തിലേക്ക്​ തിരിച്ചുവന്ന കൊളംബിയയുടെ ശ്രമങ്ങൾക്ക്​ 51ാം മിനുറ്റിൽ ഫലം കണ്ടു. ആശ്വാസമായി ലഭിച്ച പെനൽറ്റി വലയിലേക്ക്​ എത്തിച്ച്​ ലൂയിസ്​ മൂറിയൽ കൊളംബിയയുടെ ആദ്യ ഗോൾ നേടി. മത്സരം അവസാനിക്കാൻ നിമിഷങ്ങൾ മാത്രം ബാക്കിനിൽക്കേ 94ാം മിനിറ്റിലായിരുന്നു അർജന്‍റീനയുടെ ഹൃദയം തകർത്ത്​​ മിഗ്വൽ ബോർജയുടെ സമനിലഗോളെത്തിയത്​. ആറുകളികളിൽ നിന്നും 12 പോയന്‍റുള്ള അർജന്‍റീന പോയന്‍റ്​ പട്ടികയിൽ രണ്ടാമതാണ്​. മൂന്ന്​ ജയവും മൂന്ന്​ സമനിലയുമാണ്​ അർജന്‍റീനയുടെ സമ്പാദ്യം.

അനായാസം ബ്രസീൽ

പരഗ്വായെ എതിരില്ലാത്ത രണ്ടുഗോളുകൾക്ക്​ തോൽപ്പിച്ച്​ ബ്രസീൽ തെക്ക​നമേരിക്കൻ ഗ്രൂപ്പിൽ ബഹുദൂരം മുന്നിലെത്തി. നാലാം മിനിറ്റിൽ തന്നെ ഗോളടിച്ച സൂപ്പർ താരം നെയ്​മർ തന്‍റെ ഉജ്ജ്വല ഫോം തുടർന്നതാണ്​ ബ്രസീലിന്​ തുണയായത്​.

കഴിഞ്ഞ മത്സരത്തിൽ ഇക്വഡോറിനെതിരെ ഒരു ഗോളടിച്ചും ഒരു ഗോളിന്​ വഴിയൊരുക്കിയും നെയ്​മർ തിളങ്ങിയിരുന്നു. കഴിഞ്ഞ മത്സരത്തിൽ പുറത്തിരുന്ന ഗബ്രിയേൽ ജീസസ്, റോബർട്ടോ ഫിർമിന്യോ എന്നിവരെ ആദ്യ ഇലവനിൽ തന്നെ ഇറക്കിയാണ്​ ബ്രസീൽ കളി തുടർന്നത്​. മത്സരം കൈവിടാതിരിക്കാൻ കിണഞ്ഞു ശ്രമിച്ചെങ്കിലും ഗോളിലേക്ക്​ ലക്ഷ്യം നേടാൻ പരഗ്വായ്​ക്കായില്ല.

ഇഞ്ചുറി ടൈമിൽ ലൂക്കാസ്​ പക്വിറ്റയാണ്​ വിജയമുറപ്പിച്ച്​ ബ്രസീലിനായി രണ്ടാം ഗോൾ അടിച്ചത്​. ആറുമത്സരങ്ങളിൽ നിന്നും ആറും ജയിച്ച ബ്രസീൽ 18 പോയന്‍റുമായി ​ഗ്രൂപ്പിൽ ബഹുദൂരം മുന്നിലാണ്​.