ഇന്ത്യക്ക്​​ കോപ അമേരിക്ക കളിക്കാൻ ക്ഷണം; മറുപടി പറയാതെ അധികൃതർ

പനാജി: ബ്രസീലിനും അർജന്‍റീനക്കുമൊപ്പം സ്വന്തം രാജ്യം പന്തുതട്ടുന്ന ഇന്ത്യക്കാരന്‍റെ സ്വപ്​ന മുഹൂർത്തം ഈ വർഷം സാക്ഷാത്​കരിക്കുമോ?. ജൂണിൽ നടക്കുന്ന കോപ അമേരിക്ക ടൂർണമെന്‍റിൽ പന്തുതട്ടാനായി കോപ അധികൃതർ ഇന്ത്യയെ ബന്ധപ്പെ​ട്ടെന്ന്​ അഖിലേന്ത്യാ ഫുട്​ബാൾ ഫെഡറേഷൻ സ്ഥിരീകരിച്ചു.

കോവിഡ്​ കാരണം ഈ വർഷത്തേക്ക്​ മാറ്റിവെച്ച കോപ അമേരിക്ക ടൂർണമെന്‍റിന്​ ജൂൺ 11മുതലാണ്​ കിക്കോഫ്​. അർജന്‍റീനയും കൊളംബിയയുമാണ്​ ആതിഥേയർ. അതിഥി ടീമുകളായി കോപ അമേരിക്കയിൽ പ​​ങ്കെടുക്കാനിരുന്ന ആസ്​ട്രേലിയയും ഖത്തറും പിൻമാറിയതോടെയാണ്​ ഇന്ത്യക്ക്​ സാധ്യത തെളിഞ്ഞത്​.

''ഏഷ്യയിൽ നിന്നും ഖത്തറും ആസ്​ട്രേലിയയുമാണ് കോപ അമേരിക്കയിലേക്ക്​ ക്ഷണിക്കപ്പെട്ടിരുന്നത്​. മറ്റു തിരക്കുകൾ കാരണം ആസ്​ട്രേലിയ പിന്മാറുകയായിരുന്നു. അതോടെ അധികൃതർ ഇന്ത്യയെ ബന്ധപ്പെട്ടു. നമ്മൾ കളിക്കണമെന്ന്​​ അവർക്ക്​ ആ​ഗ്രഹമുണ്ട്​'' -അഖിലേന്ത്യാ ഫുട്​ബാൾ ഫെഡറേഷൻ ജനറൽ സെക്രട്ടറി കുശാൽ ദാസ്​ ദേശീയ മാധ്യമത്തോട്​ പ്രതികരിച്ചു.

അതേ സമയം ഏഷ്യൻ ഫുട്​ബാൾ ഫെഡറേഷൻ ലോകകപ്പ്​ യോഗ്യത മത്സരങ്ങൾ ജൂണിലേക്ക്​ മാറ്റിയതിനാൽ ഇന്ത്യ ഇപ്പോഴും തങ്ങളുടെ പങ്കാളിത്തം കോപ അധികൃതർക്ക്​ ഉറപ്പ്​ നൽകിയിട്ടില്ല.

എന്നാൽ ഇന്ത്യൻ കോച്ച്​ ഇഗർ സ്റ്റിമാക്​ വിളിയിൽ സന്തോഷത്തിലാണ്​. ലയണൽ മെസ്സി, നെയ്​മർ, ലൂയിസ്​ സുവാരസ്​, ജെയിംസ്​ റോഡ്രിഗസ്​ അടക്കമുള്ളവരോടൊപ്പം കളിക്കുന്നത്​ ആവേശകരമാകുമെന്നും വലിയ അനുഭവമാകുമെന്നും കോച്ച്​​ പ്രതികരിച്ചു.