ലോകകപ്പുകളുടെ രാജാവ്; കാൽപന്തിന്‍റെ ചക്രവർത്തി

വിടവാങ്ങിയ പെലെ ലോകകപ്പിനായി ജനിച്ച താരമായിരുന്നു. ചെറിയ പ്രായത്തിൽ തന്നെ ലോകകപ്പിൽ കളിക്കാൻ അവസരം ലഭിച്ച അദ്ദേഹം മൂന്നു ലോകകപ്പ്​ വിജയങ്ങളിൽ പങ്കാളിയായി മറ്റാർക്കും അവകാശപ്പെടാനാവാത്ത നേട്ടമാണ്​ സ്വന്തമാക്കിയത്​. ലോകകപ്പ്​ ഫൈനലിൽ കളിക്കുകയും സ്​കോർ ചെയ്യുകയും കിരീടം സ്വന്തമാക്കുകയും ചെയ്​ത പ്രായം കുറഞ്ഞ താരം, ലോകകപ്പിൽ ഹാട്രിക്​ നേടിയ പ്രായം കുറഞ്ഞ താരം തുടങ്ങിയ ബഹുമതികളും പെലെയെ തേടിയെത്തി. 1958 സ്വീഡൻ, 1962 ചിലി, 1970 മെക്​സികോ ലോകകപ്പ്​ കിരീടങ്ങളിലാണ്​ പെലെ വിജയമുത്തം ചാർത്തിയത്​.

1958 സ്വീഡൻ

ബ്രസീലിൽ മാത്രം അറിയപ്പെട്ടിരുന്ന പെലെയെ ലോകമറിയുന്ന താരമാക്കിയ ലോകകപ്പ്​. 1950ലെ മറക്കാനയിലെ മറക്കാനാവാത്ത തോൽവിയിൽനിന്ന്​ ബ്രസീലുകാർ കരകയറിയത്​ 1958 ലോകകപ്പ്​ വിജയത്തിലൂടെയാണ്​. മറക്കാനയിലെ അപ്രതീക്ഷിത തോൽവിയിൽ വിങ്ങിപ്പൊട്ടിയ നിമിഷങ്ങൾ പെലെ തന്നെ പിന്നീട്​ ഓർത്തെടുത്തിട്ടുണ്ട്​. അത്​ മറക്കാൻ ത​ാൻ തന്നെ പിന്നീട്​ കാരണക്കാരനാവുമെന്ന്​ പെലെ നിനച്ചിരുന്നേയില്ല.

സാ​േൻറാസിലെ കന്നി സീസണിലെ മിന്നും പ്രകടനത്തിലെ മികവിൽ ദേശീയ ടീമി​ലെത്തിയ പെലെ ആദ്യ മത്സരങ്ങളിൽ പകരക്കാരുടെ ബെഞ്ചിലായിരുന്നു. ഗ്രൂപ്​ റൗണ്ടിൽ ഓസ്​ട്രിയയെ 3-0ത്തിന്​ തോൽപിചപ്പോഴും ഇംഗ്ലണ്ടിനോട്​ ഗോൾരഹിത സമനില വഴങ്ങിയപ്പോഴും പെലെക്ക്​ ആദ്യ ഇലവനിൽ അവസരം ലഭിച്ചില്ല. റഷ്യയോട്​ 2-0ത്തിന്​ ജയിച്ച കളിയിൽ തുടക്കംമുതൽ ഇറങ്ങിയെങ്കിലും ഗോൾ നേടാനുമായില്ല.

എന്നാൽ, നോക്കൗട്ട്​ റൗണ്ട്​ എത്തിയതോടെ പെലെയുടെ കളി മാറി. ക്വാർട്ടറിൽ വെയിൽസിനെതിരെ 1-0ത്തിന്​ ജയിച്ചപ്പോൾ ഗോൾ പെലെയുടെ വക. സെമിയിൽ ഫ്രാൻസിനെ 5-2ന്​ തകർത്തപ്പോൾ ഹാട്രിക്കോടെ പെലെയുടെ നിറഞ്ഞാട്ടം. ഫൈനലിൽ ആതിഥേയരായ സ്വീഡനെ 5-2ന്​ തുരത്തിയപ്പോഴും രണ്ടു ഗോളുകൾ സ്​കോർ ചെയ്​തത്​ പെലെ തന്നെ. ആറു ഗോളുകളുമായി ടൂർണമെൻറിലെ രണ്ടാം ടോപ്​സ്​കോററായ പെലെ സഹതാരം ദിദിക്കുപിറകിൽ മികച്ച രണ്ടാമത്തെ താരവുമായി. ഇതെല്ലാം 17 വയസ്സ്​ മാത്രം പ്രായമുള്ളപ്പോഴായിരുന്നുവെന്നതാണ്​ ഈ നേട്ടം ഏറെ വിശേഷപ്പെട്ടതാക്കുന്നത്​.

1962 ചിലി

പെലെയുടെ കാര്യമായ സഹായമില്ലാതെ ബ്രസീൽ നേടിയ ലോകകപ്പാണ്​ സ്വന്തം വൻകര ആതിഥ്യമൊരുക്കിയ 1962ലേത്​. ആദ്യ കളിയിൽ മെക്​സികോക്കെതിരെ അസിസ്​റ്റും ഗോളുമായി തുടങ്ങിയ പെലെക്ക്​ അടുത്ത മത്സരത്തിൽ ചെക്കോസ്​ലൊവാക്യക്കെതിരെ ലോങ്​റേഞ്ചറിനുള്ള ശ്രമത്തിനിടെ ​പരിക്കേറ്റു. പിന്നീട്​ ടൂർണമെൻറിൽ കളിക്കാനേ പെലെക്ക്​ സാധിച്ചില്ല. പകരമെത്തിയ അമരിൾഡോ തിളങ്ങുകയും ഗരിഞ്ച തകർപ്പൻ ഫോമിലേക്കുയരുകയും ചെയ്​തതോടെ കപ്പ്​ തുടർച്ചയായ രണ്ടാം തവണയും ബ്രസീലിലെത്തി. മെക്​സികോക്കെതിരെ നാലു കളിക്കാരെ കടനുകയറി നേടിയ ഗോൾ മാത്രമായിരുന്നു പെലെക്ക്​ഓർക്കാനുണ്ടായിരുന്നത്​.

1966 ഇംഗ്ലണ്ട്​

ഹാട്രിക്​ കിരീടം ലക്ഷ്യമി​ട്ടെത്തിയ ബ്രസീലുകാർ മറക്കാനാഗ്രഹിക്കുന്ന ലോകകപ്പായിരുന്നു 1966ൽ ഇംഗ്ലണ്ടിലേത്​. ഏറെ പ്രതീക്ഷയോടെയെത്തിയ ബ്രസീൽ ആദ്യ കളിയിൽ ബൾഗേറിയക്തെിരെ 2-0 ജയവുമായി തുടങ്ങി. ആദ്യ ഗോൾ നേടിയ പെലെ തുടർച്ചയായ മൂന്നു ലോകകപ്പുകളിൽ ​സ്​കോർ ചെയ്യുന്ന ആദ്യ താരമായി മാറിയെങ്കിലും എതിരാളികളുടെ തുടർച്ചയായ ടാക്ലിങ്ങുകളെ തുടർന്ന്​ അടുത്ത കളിക്ക്​ ഇറങ്ങാനായില്ല.

പെലെയുടെ അഭാവത്തിൽ ബ്രസീൽ ഹംഗറിയോട്​ 3-1ന്​ തോൽക്കുകയും ചെയ്​തു. ഇതോടെ ഗ്രൂപ്​ റൗണ്ടിലെ അവസാന കളിയിൽ പോർചുഗലിനെതിരെ വിജയം അനിവാര്യമായ ബ്രസീൽ പരിക്കുമാറാത്ത പെലെയെ കളത്തിലിറക്കി. പോർചുഗൽ ഡിഫൻഡർ ജാവോ മൊറെയ്​സി​െൻറ കടുത്ത ഫൗളിന്​ വിധേയനായ പെലെയുടെ പരിക്ക്​ വഷളായി. പകരക്കാരനെ ഇറക്കാനുള്ള നിയമമില്ലാത്തതിനാൽ ശേഷിക്കുന്ന സമയം പെലെ മുടന്തിയാണ്​ മൈതാനത്ത്​ തുടർന്നത്​.

മൊറെയ്​സിന്​ ചുവപ്പുകാർഡ്​ കാണിക്കാതിരുന്ന റഫറി ​ജോർജ്​ മകാബെയുടെ തീരുമാനം ലോകകപ്പ്​ ചരിത്രത്തിലെ മോശം തീരുമാനങ്ങളിലൊന്നായാണ്​ വിലയിരുത്തപ്പെടുന്നത്​. ഈ തോൽവിയോടെ ബ്രസീൽ നോക്കൗട്ട്​ കാണാതെ പുറത്തതായി. ഇനിയൊരിക്കലും ലോകകപ്പിൽ കളിക്കില്ലെന്ന പ്രഖ്യാപനവുമായാണ്​ പെലെ ഇംഗ്ലണ്ട്​ വിട്ടത്​.

1970 മെക്​സികോ

1969ൽ ദേശീയ ടീമിലേക്ക്​ തിരിച്ചുവിളിക്കപ്പെ​ട്ടെങ്കിലും തിരിച്ചുവരാൻ ആദ്യം പെലെ കൂട്ടാക്കിയില്ല. പിന്നീട്​ സമ്മതിച്ച പെലെ ആറു യോഗ്യത മത്സരങ്ങളിൽ ആറു ഗോളടിച്ച്​ മിന്നും ഫോമിലാണ്​ മെക്​സികോ​യിലെത്തിയത്​. മുൻ ലോകകപ്പുകളിലെ പല പ്രമുഖരും ബൂട്ടഴിച്ചിരുന്നുവെങ്കിലും പെലെക്കൊപ്പം റിവെലിനോ, ജഴിസീന്യോ, ജെഴ്​സൺ, കാർലോസ്​ ആൽബ​ർ​ട്ടോ ടോറസ്​, ടൊസ്​റ്റാവോ, ​ക്ലൊഡോൾഡോ തുടങ്ങിയവർ അണിനിരന്ന അന്നത്തെ ​ബ്രസീൽ ടീം ഫുട്​ബാൾ ചരിത്രത്തിലെ മികച്ച ടീമുകളിലൊന്നായാണ്​ വിശേഷിപ്പിക്കപ്പെടുന്നത്​. ചെകോസ്​ലൊവക്യക്കെതിരെ 4-1ന്​ ജയിച്ച ആദ്യ കളിയിൽ സ്​കോർ ചെയ്​ത പെലെക്ക്​ ഇംഗ്ലണ്ടിനെതിരെ 1-0ത്തിന്​ ജയിച്ച മത്സരത്തിൽ സ്​കോർ ചെയ്യാനായില്ല.

ഈ കളിയിൽ പെലെയുടെ ഗോൾ ഉറപ്പിച്ച ഹെഡർ തടുത്തിട്ട ഗോൾ ഇംഗ്ലണ്ട്​ ഗോൾകീപ്പർ ഗോർഡൻ ബാങ്ക്​സി​െൻറ രക്ഷപ്പെടുത്തൽ ‘സേവ്​ ഓഫ്​ ദ സെഞ്ച്വറി’ ആയാണ്​ വിശേഷിപ്പിക്കപ്പെടുന്നത്​. ഗോൾ ഉറപ്പിച്ച്​ ഗോൾ എന്ന്​ വിളിച്ചുകൂവിയിരുന്നതായി പിന്നീട്​ പെലെ തന്നെ പറഞ്ഞിരുന്നു. റുമാനിയക്കെതിരെ 3-2ന്​ ജയിച്ച കളിയിൽ പെലെയുടെ വക രണ്ടു ഗോളുകളുണ്ടായിരുന്നു. ക്വാർട്ടറിൽ പെറുവിനെതിരെയും (4-2) സെമിയിൽ ഉറുഗ്വായ്​ക്കെതിരെയും (3-1) പെലെക്ക്​ ഗോളുകൾ നേടാനായില്ല.

എന്നാൽ, ഫൈനലിൽ ഇറ്റലിയെ 4-1ന്​ തകർത്തുവിട്ടപ്പോൾ ആദ്യ ഗോൾ പെലെയുടെ തലയിൽനിന്നായിരുന്നു. ജഴ്​സിന്യോയുടെ കൈകളിലേക്ക്​ ചാടിക്കയറിയുള്ള പെലെയുടെ ഗോൾ ആഘോഷത്തി​െൻറ ചിത്രം ഏറെ പ്രസിദ്ധമാണ്​. രണ്ടു ഗോളുകൾക്ക്​ വഴിയൊരുക്കുക കൂടി ചെയ്​ത പെലെ നാലു ഗോൾ നേടുകയും ടൂർണമെൻറിലെ മികച്ച താരത്തിനുള്ള സുവർണ പന്ത്​ സ്വന്തമാക്കുകയും ചെയ്​തു.