യുവ താരങ്ങളെ ലക്ഷ്യമിട്ട്​ പി.എഫ്​.എ

ബ്രിട്ടനിലെ പ്രമുഖ ഫുട്​ബാൾ അകാദമിയായ പ്രോ ഫുട്​ബാൾ അകാദമി (പി.എഫ്​.എ) യുവ ഫുട്​ബാൾ താരങ്ങളെ തേടി ദുബൈയിൽ ശ്രദ്ധകേന്ദ്രീകരിക്കുന്നു​​. ദുബൈ എമിറേറ്റിൽ പുതിയ അകാദമി സ്ഥാപിച്ച്​ പ്രവർത്തനം വ്യാപിപ്പിക്കുകയാണ്​​ പി.എഫ്​.എയുടെ ലക്ഷ്യം​. ബ്രിട്ടനിൽ 90 പരിശീലന കേന്ദ്രങ്ങളുള്ള പി.എഫ്​.എ ആയിരക്കണക്കിന്​ കുട്ടികളെ പരിശീലിപ്പിച്ച പരിചയ സമ്പത്തുമായാണ്​ എമിറേറ്റിന്‍റെ ഹൃദയം കീഴടക്കാനൊരുങ്ങുന്നത്​​​.

ക്രിസ്റ്റ്യാനോ റൊണാൾഡോക്ക്​ പിന്നാലെ പി.എസ്​.ജി താരം നെയ്മർ ജൂനിയർ കൂടി സൗദി അറേബ്യൻ ഫുട്​ബോൾ ക്ലബുകളിലേക്ക്​ ചേക്കേറിയതോടെ കാൽപന്ത്​ കളിയുടെ ആരാധകരുടെ കണ്ണുകൾ അറബ്​ ലോകത്തേക്ക്​ തിരിഞ്ഞിരിക്കുകയാണ്​. ഈ സാഹചര്യത്തിലാണ്​ അറേബ്യൻ മണ്ണിലേക്ക്​​ ബിസിനസ്​ വ്യാപിപ്പിക്കാൻ പി.എഫ്​.എ ഒരുങ്ങുന്നത്​.

സ്‌പോർട്‌സ് സിറ്റിയിലെ ഫുട്‌ലാബ് ദുബായിലും ജദ്ദാഫിലെ കൂര ഡോമിലുമാണ്​ പി.എഫ്​.എയുടെ പരിശീലന കേന്ദ്രങ്ങൾ പ്രവർത്തിക്കുന്നുന്നത്​​. പുതിയ സാധ്യതകൾ മനസിലാക്കി കൂടുതൽ ഇടങ്ങളിലേക്ക്​ അകാദമി വ്യാപിപ്പിക്കാനുള്ള പദ്ധതികളാണ്​ പി.എഫ്​.എ ആസൂത്രണം ചെയ്യുന്നത്​.

ദുബൈയിലെ യുവ കളിക്കാർക്ക് പി.എഫ്.എയുടെ യുവേഫ, ഇംഗ്ലീഷ് എഫ്.എ യോഗ്യതയുള്ള പരിശീലകരിൽ നിന്ന് പഠിക്കാനുള്ള അവസരം ഇതുവഴി ലഭ്യമാകും​. കളിക്കാരുടെ സാ​ങ്കേതികമായ വൈദഗ്​ധ്യം മെച്ചപ്പെടുത്തി മുഴുവൻ സാധ്യതകളും ​പുറത്തെടുക്കാനുള്ള വാതിലുകളാണ്​ പി.എഫ്​.എ തുറന്നിടുന്നതെന്ന്​ അകാദമി മാനജേർ ജെയ്മി നെവിറ്റ്​ പറഞ്ഞു.

യുവ കളിക്കാർക്ക്​ മികച്ച സിലബസിലൂടെ പ്രഫഷനൽ പഠന അന്തരീക്ഷം ഒരുക്കുകയാണ്​ ആദ്യ പടി. ട്വിസ്റ്റിങ്​, ടേണിങ്​, ഡ്രിബ്​ളിങ്​, പാസിങ്​, റിസീവിങ്​ തുടങ്ങിയ വിത്യസ്തമായ ടോപ്പിക്കുകളിൽ ശ്രദ്ധ കേന്ദ്രീകരിച്ചുള്ള പരിശീലന സെഷനുകളായിരിക്കും ഓരോ ആഴ്ചയും നടത്തുക.

കളിക്കാരുടെ കഴിവുകളെ പ്രോത്സാഹിപ്പിച്ച്​ പരാജയ ഭീതി ഇല്ലാതാക്കും. കളിയിൽ പുതിയ ടെക്നിക്കുകൾ വികസിപ്പിക്കാനും തീരുമാനങ്ങൾ എടുക്കാനുമുള്ള കഴിവുകൾ വർധിപ്പിക്കും. അഞ്ചിനും 14ലിനും ഇടയിൽ പ്രായമുള്ള കുട്ടികൾക്ക്​ വാരാന്ത്യ ക്ലാസുകളാണ്​ വാഗ്ദാനം ചെയ്യുന്നത്​. കൂടുതൽ വിവരങ്ങൾക്ക്​ www.profootballacademy.ae കാണാം.