ഡെർബിയിൽ വീണത്​ രണ്ടാമന്മാരോട്​; കിരീട പ്രതീക്ഷ മങ്ങുമോ സിറ്റിക്ക്​?

ലണ്ടൻ: പ്രിമിയർ ലീഗ്​ കിരീടമുറപ്പിക്കുന്നവരെയറിയാൻ നടന്ന തകർപ്പൻ പോരാട്ടത്തിൽ ഏകപക്ഷീയമായ രണ്ടു ഗോളിനേറ്റ തോൽവി മാഞ്ചസ്റ്റർ സിറ്റിയുടെ ചാമ്പ്യൻ സ്വപ്​നങ്ങൾക്ക്​ മങ്ങലേൽപിക്കുമോ? നീണ്ട 21 മത്സരങ്ങളുടെ വിജയക്കുതിപ്പിനൊടുവിലായിരുന്നു സിറ്റി സ്വന്തം ഇത്തിഹാദ്​ മൈതാനത്ത്​ കരുത്തരായ എതിരാളികൾക്കു മുന്നിൽ തോറ്റുമടങ്ങിയത്​. ഒന്നാം സ്​ഥാനത്ത്​ ഇപ്പോഴും 11 പോയിന്‍റ്​ ലീഡുള്ള ടീമിന്​ നിലവിൽ പ്രതിസന്ധികളില്ലെന്നാണ്​ എതിർ ടീം പോലും സമ്മതിക്കുന്നത്​.

ഒന്നാം സ്​ഥാനമെന്ന 'കിട്ടാക്കനി' ഇപ്പോൾ സ്വപ്​നങ്ങളി​ലില്ലെന്ന്​ യുനൈറ്റഡ്​ പരിശീലകൻ ഒലെ ഗണ്ണർ സോൾഷ്യർ പറയുന്നു. എന്നാലും അടുത്തിടെ നടത്തിയ വൻ കുതിപ്പ്​ ടീമിന്​ എവിടെയും ചെന്നുതൊടാൻ പോന്നതാണെന്ന്​ താരങ്ങളും ആരാധകരും പറയുന്നു.

കഴിഞ്ഞ 22 കളികളിൽ 14 വിജയവും എട്ടു സമനിലയും നേടിയ യുനൈറ്റഡ്​ ഒരു കളി പോലും തോറ്റിട്ടില്ല. ഇന്നലെ കളി തുടങ്ങി 30ാം സെക്കൻഡിൽ ആന്‍റണി മാർഷ്യലിനെ ബോക്​സിൽ ഫൗൾ ചെയ്​തു വീഴ്​ത്തിയതിന്​ ലഭിച്ച പെനാൽറ്റി ഗോളാക്കി കളി തുട​ങ്ങിയ യുനൈറ്റഡ്​ പിന്നീടും കളിയുടെ നിയന്ത്രണം സ്വന്തം നാട്ടുകാർക്ക്​ വിട്ടുകൊടുത്തിരുന്നില്ല. ഒരിക്കൽ റോഡ്രി ലക്ഷ്യത്തിനരികെയെത്തിയതു മാത്രമായിരുന്നു സിറ്റിക്ക്​ ആശ്വാസം നൽകാവുന്ന ഏക ഗോൾ നീക്കം. അതുപക്ഷേ, നിർഭാഗ്യത്തിന്​ പോസ്റ്റിനും ബാറിനും ഉരുമ്മി പുറത്തേക്കു പറന്നു. രണ്ടാം പകുതിയുടെ തുടക്കത്തിൽ മാർകസ്​ റാഷ്​ഫോർഡുമായി ചേർന്ന്​ ലൂക്​ ഷോ നടത്തിയ കണ്ണഞ്ചും നീക്കം ഗോളായതോടെ യുനൈറ്റഡ്​ ലീഡുയർന്നു. വിജയം ഉറപ്പാകുകയും ചെയ്​തു.

ജയത്തോടെ ​െലസ്റ്ററിനെ കടന്ന്​ യുനൈറ്റഡ്​ രണ്ടാം സ്​ഥാനത്തേക്കു കയറി. കഴിഞ്ഞ നവംബറിൽ ടോട്ടൻഹാമിനു മുന്നിൽ വീണ ശേഷം ആദ്യമായിട്ടായിരുന്നു സിറ്റി തോൽക്കുന്നത്​.