ക്രിസ്റ്റ്യാനോ 'പടക്കോപ്പ്​' ഏറ്റില്ല ! ഒാൾഡ്​ ട്രോഫോഡിൽ മാഞ്ചസ്റ്റർ യുനൈറ്റഡിനെ തളച്ച്​ എവർട്ടൻ

ലണ്ടൻ: 'ക്രിസ്റ്റ്യാനോ' പടക്കോപ്പുമായി ഓൾഡ്​ട്രഫോഡിലെ തിരുമുറ്റത്ത്​ പോരിനിറങ്ങിയ സോൾഷ്യെയർ സംഘത്തെ പിടിച്ചുകെട്ടി എവർട്ടൻ. ഇംഗ്ലീഷ്​ പ്രീമിയർ ലീഗിലെ ആവേശപ്പോരിൽ 1-1നാണ്​ റഫേൽ ബെനിറ്റസിന്‍റെ ചുണക്കുട്ടികൾ മാഞ്ചസ്റ്റർ യുനൈറ്റഡിനെ തളച്ച്​ നെഞ്ചുവിരിച്ച്​ തിരിച്ചുകയറിയത്​. ഒരു ഗോളിന്​ പിന്നിട്ടുനിന്നതിനു ശേഷം സുന്ദരമായ കൗണ്ടർ അറ്റാക്കിൽ ഗോൾ നേടിയാണ്​ എവർട്ടന്‍റെ മറുപടി.

43ാം മിനിറ്റിൽ ആന്‍റണി മാർഷ്യലാണ്​ പവർഫുൾ ഷോട്ടിൽ എവർട്ടന്‍റെ വലതുളച്ച്​ മാഞ്ചസ്റ്റർ യുനൈറ്റഡിനെ മുന്നിലെത്തിച്ചത്​. എന്നാൽ, രണ്ടാം പകുതി കോർണറിൽ നിന്ന്​ തുടങ്ങിയ കൗണ്ടർ അറ്റാക്കിലൂടെ 65ാം മിനിറ്റിൽ എവർട്ടൻ തിരിച്ചടിച്ചു. ആൻഡ്രോസ്​ ടൗൺസെന്‍റാണ് ക്ലാസിക്​ ഫിനിഷിലൂടെ​ ഗോൾ നേടിയത്​. സൂപ്പർ താരം ക്രിസ്റ്റ്യാനോ റൊണാൾഡോയെ അടക്കം പലമാറ്റങ്ങളും മാഞ്ചസ്റ്റർ കോച്ച്​ നടത്തിനോക്കിയെങ്കിലും കാര്യമുണ്ടായില്ല. ഒപ്പത്തിനൊപ്പം മുന്നേറുന്ന മാഞ്ചസ്റ്റർ യുനൈറ്റഡിനും എവർട്ടനും 14 പോയന്‍റാണ്​.

വമ്പൻ അഴിച്ചു പണി നടത്തിയാണ്​ കോച്ച്​ ഒലെ ഗണ്ണർ സോൾഷ്യെയർ എവർട്ടനെതിരെ ടീമിൽ ഒരുക്കിയത്​. സൂപ്പർ താരം ക്രിസ്റ്റ്യാനോ റൊണാൾഡോയെ കരക്കിരുത്തി 4-2-3-1ന്​ ശൈലിയിൽ എഡിൻസൻ കവാനിയെ അക്രമണത്തിന്​ നിയോഗിച്ചായിരുന്നു​ ദൗത്യ നിർവഹണം. പോർചുഗീസ്​ സൂപ്പർ താരം ഇതുവരെ എല്ലാ മത്സരങ്ങളിലും ആദ്യ ഇലവനിലുണ്ടായിരുന്നു.

It ends level. #MUFC | #MUNEVE

— Manchester United (@ManUtd) October 2, 2021

ഒപ്പം ആന്‍റണി മാർഷ്യൽ, ബ്രൂണോ ഫെർണാണ്ടസ്​, മാസൺ ഗ്രീൻവുഡ്​ എന്നിവരും മുന്നേറ്റത്തിലുണ്ട്​. ജാഡൻ സാഞ്ചോയെയും പോൾ പോഗ്​ബയെയും കരക്കിരുത്തി. ഫ്രഡിനും സ്​കോട്ട്​ മെക്​ടൊമിനേക്കുമാണ്​ മ​ധ്യനിരയുടെ നിയന്ത്രണം. പ്രതിരോധത്തിൽ വിക്​ടർ ലിൻഡലോഫ്​, റാഫൽ വരാനെ, വാൻബിസാക്ക, ലൂക്ക്​ ഷോ എന്നിവരുമുണ്ടായിരുന്നു​.