ഖത്തറിൽ ബയേൺ ആരാധകരൊക്കെ പി.എസ്​.ജിയായി, എന്നിട്ടും...

ദോഹ: ഖത്തറിലെ ബയേൺ മ്യൂണിക്ക്​ ആരാധകരൊക്കെ ഞായറാഴ്​ച പി.എസ്​.ജിക്കൊപ്പമായിരുന്നു. ബയേണിൻെറ കളിയഴകിൻെറ കട്ട ഫാൻസടക്കം താൽകാലികമായെങ്കിലും പി.എസ്​.ജിയിലേക്ക്​ കൂടുമാറി. കാരണം ഒന്നേയുണ്ടായിരുന്നുള്ളൂ, പാരീസ്​ സെയിൻറ്​ ജർമൻ എന്ന പി.എസ്​.ജി ക്ലബിൻെറ ഉടമകൾ ഖത്തറായിരുന്നു എന്ന ഒറ്റക്കാരണം​. ഖത്തറിൻെറ മണ്ണിൽ പ്രവാസികളായ മലയാളികളടക്കമുള്ളവരും തൽകാലം ബയേൺ ആരാധന മാറ്റി ചാമ്പ്യൻസ്​ ലീഗ്​ ഫൈനലിൽ പി.എസ്​.ജിക്കൊപ്പം നിന്നു. 'പ്രിയ ടീം എന്നും ബയേൺ ആണ്​. പക്ഷേ ചാമ്പ്യൻസ്​ ലീഗിൻെറ ഈ ഫൈനലിൽ നമ്മൾ പി.എസ്​.ജിക്കൊപ്പമാണ്​, കാരണമൊന്നും ചോദിക്കരുത്​, ഖത്തർ ഞങ്ങൾക്ക്​ അത്രയും പ്രിയപ്പെട്ടതാണ്​'... ഇത്തരത്തിലുള്ള നിരവധി കമൻറുകളാണ്​ ഫൈനലിന്​ മുമ്പായി സമൂഹ മാധ്യമങ്ങളിൽ നിറഞ്ഞത്​.

ഞായറാഴ്​ച രാത്രി പത്ത്​ മണിക്കായിരുന്നു ഫൈനൽ. മിക്കയാളുകൾക്കും കളികാണാനുള്ള അനുയോജ്യമായ സമയവുമായിരുന്നു. കനത്ത പോരിടിനിടെ ബയേൺ മറുപടിയില്ലാത്ത ഒരു ഗോളിന്​ പി.എസ്​.ജിയെ തോൽപിച്ച്​ ചാമ്പ്യൻസ്​ ലീഗ്​ കിരീടത്തിൽ മുത്തമിട്ടു. പോർച്ചുഗീസ്​ തലസ്​ഥാനമായ ലിസ്​ബണിൽ നടന്ന ഫൈനലിൽ നിരവധി ഗോൾ അവസരങ്ങളാണ്​ പി.എസ്​.ജിക്ക്​ ലഭിച്ചത്​. എന്നാൽ ലക്ഷ്യം നേടാനായില്ല.

വാശി​മുറ്റിയ പോരാട്ടഭൂമിയിൽ 59ാം മിനുട്ടിൽ ബയേണിനായി കിങ്​സ്​ലി കോമാനാണ്​ വിജയഗോൾ നേടിയത്​. പി.എസ്​.ജി അക്കാദമിയിലൂടെ വളർന്നവനായിട്ടും നീയിത്​ ചെയ്​തല്ലോ​ കോമാൻ... നെയ്​മർ, കിലിയൻ എംബാപ്പെ എന്നീ വമ്പൻമാർ പി.എസ്​.ജിക്കായി അണിനിരന്നിരുന്നു. ആദ്യപകുതി ഗോൾ രഹിതസമനില.

മികച്ച കളി പുറ​െത്തടു​െത്തങ്കിലും ഫിനിഷിങിലെ പാളിച്ചകൾ പി.എസ്​.ജിയെ തിരിഞ്ഞുകൊത്തി. ബയേൺ ഗോളി മാനുവർ നോയർ ഗോളെന്നുറപ്പിച്ച ഷോട്ടുകൾ പോലും തടയുന്നതിൽ വിജയിച്ചു. 26ാം മിനുട്ടിൽ എയ്​ഞ്ചൽ ഡിമരിയ നല്ലൊരവസരം പുറത്തേക്കടിച്ചുപാഴാക്കി. 19ാം മിനുട്ടിൽ നെയ്​മറി​െൻറ മികച്ച ഇടങ്കാലൻ ഷോട്ടും 71ാം മിനുട്ടിൽ മറ്റൊരു ശ്രമവും ബയേണിൻെറ ഗോൾവല കാത്ത നോയർ തടഞ്ഞിട്ടു, അന്തിമഫലം പി.എസ്​.ജിക്കെതിരാവുകയും ചെയ്​തു. ഏതായായും ബയേൺ ചാമ്പ്യൻമാരായതോടെ മറുകണ്ടം ചാടിയ ഖത്തറിലുള്ള പല മിടുക്കൻമാരും ബയേണിനൊപ്പം തന്നെ ​'വീണ്ടും ചേർന്നു'.

പി.എസ്​.ജിയുടെ കാൽപന്തുകുതിപ്പ്​ ഖത്തറിൻെറ തേരിലേറിയാണ്​. ക്ലബിെൻറ നല്ലൊരു ശതമാനം ഓഹരിയും വഹിക്കുന്നത് ഖത്തറാണ്​. 1970ൽ രൂപീകരിക്കപ്പെട്ട ക്ലബ് 2011ലാണ് ഖത്തറിെൻറ ഉടമസ്​ഥതയിലേക്കെത്തുന്നത്. അമീർ ശൈഖ് തമീം ബിൻ ഹമദ് ആൽഥാനി ചെയർമാനായ ഖത്തർ ഇൻവെസ്​റ്റ്മെൻറ് അതോറിറ്റി(ക്യു ഐ എ)യുടെ സഹോദര സ്​ഥാപനമായ ഖത്തർ സ്​പോർട്സ്​ ഇൻവെസ്​റ്റ്മെൻറ്സ്​ (ക്യു.ഐ.എ) ആണ് ക്ലബിെൻറ ഉടമകൾ. 2011ൽ ക്ലബിെൻറ ഉടമസ്​ഥത ഖത്തറിലെത്തിയതിന് ശേഷം ഖത്തരി വ്യാപാരിയും ബീൻ മീഡിയാ ഗ്രൂപ്പ് മേധാവിയുമായ നാസർ അൽ ഖിലൈഫിയാണ് ക്ലബിെൻറ മുന്നേറ്റത്തിന് ചുക്കാൻ പിടിക്കുന്നത്. ഖത്തർ ടെന്നിസ്​ സ്​ക്വാഷ് ബാഡ്മിൻറൺ ഫെഡറേഷൻ പ്രസിഡൻറും ഫുട്ബോളിലെ ഏറ്റവും സ്വാധീനമുള്ള വ്യക്തികളിലൊരാൾ കൂടിയാണ് നാസർ അൽ ഖിലൈഫി.

ക്ലബിെൻറ ഉടമസ്​ഥത ഖത്തർ സ്​പോർട്സ്​ ഇൻവെസ്​റ്റ്മെൻറ്സിെൻറ കൈകളിലെത്തിയതോടെ പി എസ്​ ജിയെ യൂറോപ്യൻ ചാമ്പ്യൻമാരാക്കുകയെന്ന നിശ്ചയദാർഢ്യത്തിലാണ് ഓരോ നീക്കവും നടത്തിയിരുന്നത്​.

ഇതിനായി തിയാഗോ സിൽവ, സ്​ലാറ്റൻ ഇബ്രാഹിമോവിച്ച്, ഡേവിഡ് ലൂയിസ്​, എഡിൻസൻ കവാനി, നെയ്മർ ജൂനിയർ, കിലിയൻ എംബാപ്പെ തുടങ്ങിയ പ്രമുഖരുൾപ്പെടെയുള്ള പ്രഗൽഭരെ ടീമിലെത്തിച്ചു. 2011ന് ശേഷം ട്രാൻസ്​ഫർ വിപണിയിൽ മാത്രം 100 കോടി യൂറോയാണ് പി എസ്​ ജി ചെലവഴിച്ചത്. അപ്പോഴും യൂറോപ്യൻ ചാമ്പ്യൻഷിപ്പ് മാത്രം കിട്ടാക്കനിയായി. തിയാഗോ സിൽവ, നെയ്മർ, എംബാപ്പേ തുടങ്ങിയവർ മാത്രമാണ് അവശേഷിക്കുന്നത്. എയ്ഞ്ചൽ ഡി മരിയയും മൗറോ ഇക്കാർഡിയും പാബ്ലോ സറാബിയയും മാർക്കിഞ്ഞോസും മാർകോ വെറാറ്റിയും ഗോൾ കീപ്പർ കീലർ നവാസും പി എസ്​ ജി നിരയിലുണ്ട്.

രൂപീകരിച്ചത് മുതൽ 2019–2020 സീസണിലെത്തി നിൽക്കുമ്പോൾ ആഭ്യന്തര ലീഗിൽ പി എസ്​ ജിയെ പിന്തള്ളാൻ ആരും വളർന്നിട്ടില്ല. 43 ചാമ്പ്യൻഷിപ്പുകളാണ് ആഭ്യന്തര തലത്തിൽ പി എസ്​ ജി ഷോക്കേസിലെത്തിച്ചത്. ഇതിൽ ഒമ്പത് ഫ്രഞ്ച് ലീഗ് വൺ ചാമ്പ്യൻഷിപ്പുമുണ്ട്. ഇതും റെക്കോർഡ് നേട്ടമാണ്. യുവേഫ കപ്പ് വിന്നേഴ്്സ്​ കപ്പ്, യുവേഫ ഇൻറർടോട്ടോ കപ്പ് എന്നിവയും പി എസ്​ ജി നേടി. എന്നാൽ യുവേഫ ചാമ്പ്യൻസ്​ ലീഗെന്ന നേട്ടം ഇതുവരെ എത്തിപ്പിടിക്കാനായില്ല. അതിലേക്കായിരുന്നു ഞായറാഴ്​ച ടീം പന്തുതട്ടിയത്​. എന്നാൽ ആ ലക്ഷ്യം ലിസ്​ബണിലും അകന്നുനിന്നു​.