പി.എസ്​.ജിയെ അട്ടിമറിച്ച്​ റെന്നസ്​; ഗോളിനായുള്ള മെസ്സിയുടെ കാത്തിരിപ്പ്​ തുടരുന്നു

പാരിസ്​: പാരിസ്​ വമ്പൻമാരായ പി.എസ്​.ജിക്ക്​ ഫ്രഞ്ച്​ ലീഗിൽ ഞെട്ടിക്കുന്ന തോൽവി. ഞായറാഴ്ച നടന്ന മത്സരത്തിൽ ടൂർണമെന്‍റിലെ ഏഴാംസ്ഥാനക്കാരായ റെനെയാണ്​​ പി.എസ്​.ജിക്ക്​ ഷോക്ക്​ ട്രീറ്റ്​മെന്‍റ്​ നൽകിയത്​. 45,46 മിനിറ്റുകളിൽ പിറന്ന റെനെയുടെ ഗോളുകൾക്ക്​ മറുപടി നൽകാൻ പി.എസ്​.ജിയുടെ പുകൾപ്പെറ്റ മുന്നേറ്റ നിരക്കായില്ല. ഫ്രഞ്ച്​ ലീഗിൽ ഗോളിനായുള്ള മെസ്സിയുടെ കാത്തിരിപ്പും നീളുകയാണ്​.

മത്സരത്തിന്‍റെ ഭൂരിഭാഗം സമയത്തും പന്ത്​ കൈവശം വെച്ചിട്ടും തോൽവി സമ്മതിക്കാനായിരുന്നു പി.എസ്​.ജിയുടെ നിയോഗം. 45ാം മിനിറ്റിൽ കളിയുടെ ഒഴുക്കിന്​ വിപരീതമായാണ്​ റെനെ​ ഗോൾ ഗോൾ നേടിയത്​. ​സുലേമാന പെനൽറ്റി ബോക്​സിലേക്ക്​ നൽകിയ ക്രോസ്​ സ്വീകരിച്ച ലബോർദെ പോസ്റ്റിലേക്ക്​ നിറയൊഴിക്കുകയായിരുന്നു.

രണ്ടാം പകുതിയിൽ മറുപടി ഗോൾ അടിക്കാനിറങ്ങിയ പി.എസ്​.ജിയെ ഞെട്ടിച്ച്​ നിമിഷങ്ങൾക്കുള്ളിൽ ​റെനെ രണ്ടാം ഗോൾ നേടി. ഇക്കുറി ലബോർദെയുടെ അസിസ്റ്റിൽ നിന്നും ​ഫ്ലാവിയൻ ടൈറ്റാണ്​ ഗോൾ നേടിയത്​. സീസണിലെ ഒൻപത്​ കളികളിൽ നിന്നും പി.എസ്​ജിയുടെ ആദ്യത്തെ തോൽവിയാണിത്​. 24 പോയന്‍റുള്ള പി.എസ്​.ജിക്ക്​ ഒന്നാം സ്ഥാനത്തേക്ക്​ വലിയ ഭീഷണിയില്ല​. 18 പോയന്‍റുമായി ലെൻസാണ്​ രണ്ടാമത്​.