സൗദി ടീമിന് ആത്മവീര്യം പകർന്നത് കിരീടാവകാശിയുടെ ഉറച്ച പിന്തുണ

ജിദ്ദ: ലോകകപ്പിലെ ആദ്യമത്സരത്തിൽ സൗദി ടീം അർജൻറീനക്കെതിരെ നേടിയ മിന്നും വിജയം സൗദി ടീമിന്​ ലഭിച്ച പരിശീലനത്തി​ന്റെയും ഭരണകൂടത്തി​ന്റെ നിർലോഭമായ പിന്തുണയുടെയും ഫലം. കളിക്കാർക്ക്​ മികച്ച പരിശീലനവും പിന്തുണയും നൽകുന്നതിന്​ സൗദി കിരീടാവകാശി അമീർ മുഹമ്മദ്​ ബിൻ സൽമാൻ കാണിച്ച അതീവ താൽപര്യവും പിന്തുണയുമാണ് മുമ്പ്​ ലോകകപ്പ്​ കിരീടം ചൂടിയ അർജൻറീനയെ ആദ്യ മത്സരത്തിൽ തന്നെ പച്ചപ്പടക്ക്​ തളച്ചിടാനായതെന്നതാണ്​ വിലയിരുത്തൽ. കിരീടാവകാശിയുടെ നിർദേശം ഉൾക്കൊണ്ട്​ സൗദി കായിക മന്ത്രാലയവും ലോകോത്തര നിലവാരത്തിലുള്ള മികച്ച കളിക്കാരെ വളർത്തി കൊണ്ടുവരുന്നതിന്​ വേണ്ട പരിപാടികളാണ്​ അടുത്തിടെയായി നടത്തികൊണ്ടിരിക്കുന്നത്​. അതാണ്​ ലോകകപ്പി​ന്റെ മൈതാനത്ത്​ സധൈര്യം ആസ്വദിച്ച് ​ഒത്തൊരുമയോടെ​ കളിക്കാനും പ്രമുഖ ടീമായ അർജൻറീനയെ പരാജയപ്പെടുത്താനും സൗദി ടീമിന്​​ സാധിച്ചത്​.

ലോകകപ്പ്​ മത്സരത്തിന്​​ യോഗ്യത നേടിയ ശേഷം ദേശീയ ടീം കളിക്കാരുമായി കിരീടാവകാശി നടത്തിയ സംസാരം അവർക്ക്​ വലിയ ആശ്വാസവും​ പ്രതീക്ഷയുമാണുണ്ടാക്കിയത്​. കിരീടാവകാശി പറഞ്ഞു. 'മൂന്ന് മത്സരങ്ങൾ ആസ്വദിക്കുക. സാധാരണ പ്രകടനത്തെ ബാധിക്കാവുന്ന മാനസിക സമ്മർദ്ദമില്ലാതെ ഗ്രൂപ്പ് മത്സരങ്ങളിൽ പങ്കാളിയാകുക. മികച്ച ഫലങ്ങൾ നേടുമെന്ന് പ്രതീക്ഷിക്കുന്നില്ലെന്ന്​ ഗ്രൂപ്പിലെ ടീമുകളെ സൂചിപ്പിച്ച്​ കിരീടാവകാശി പറഞ്ഞു. പ്രാർഥനകളുണ്ടാകും. ദൈവം ഇഛിക്കുകയാണെങ്കിൽ വരാനിരിക്കുന്നത്​ മികച്ചതാണ്'. ആ വാക്കുകൾ 'പച്ചപടയിൽ' വലിയ സ്വാധീനമുണ്ടാക്കുമെന്ന്​ കിരീടാവകാശി ഉറപ്പിച്ചു. അതവർ നെഞ്ചേറ്റി. ആസ്വാദിച്ചു കളിച്ചു. ലക്ഷ്യങ്ങൾ നേടി. ഖത്തറി​ന്റെ മണ്ണിൽ ഏറ്റവും വലിയ ടീമിനെ പരാജയപ്പെടുത്തി. പ്രതാപത്തി​ന്റെ ആകാശത്തേക്ക്​ സൗദി ഉയർന്നു. 'തുവൈഖിന്​' മാത്രം കിടപിടിക്കാവുന്ന നിശ്ചയദാർഢ്യത്തോടെയും കരുത്തോടെയും നടത്തിയ പ്രയത്​നത്തി​ന്റെ ഫലം സൗദി ടീം കൊയ്​തു. 2022 ലോകകപ്പിൽ അർജൻറീനെയ്‌ക്കെതിരായ ആദ്യ ഏറ്റുമുട്ടലിൽ സൗദി ദേശീയ ടീം കനത്ത ആശ്ചര്യമായി. ഒന്നിനെതിരെ രണ്ട് ഗോളുകൾക്ക് അർജൻറീനെയ പരാജയപ്പെടുത്തി ലോകത്തെ ഞെട്ടിച്ചു.