ഇംഗ്ലീഷിലെഴുതിയ മലയാളിയുടെ ലോകകപ്പ് ഗാനം ഏറ്റെടുത്ത് ഫുട്ബാൾ ആരാധകർ

റിയാദ്: കാൽപന്ത് കളിയുടെ കാമ്പറിഞ്ഞ് പ്രവാസി മലയാളി ഇംഗ്ലീഷിൽ കുറിച്ച് മലയാളി ഗായിക യുംന അജിൻ ആലപിച്ച ലോകകപ്പ് ഗാനം ഏറ്റെടുത്ത് ഫുട്ബാൾ ആരാധകർ. റിയാദിൽ പ്രവാസിയായ മലപ്പുറം താനൂർ സ്വദേശി നൗഫൽ പാലേരി ഗാനരചനയും സംവിധാനവും നിർവഹിച്ച 'ഹോല ഖത്തർ' എന്ന ആൽബം റിലീസ് ചെയ്ത് മണിക്കൂറുകൾക്കകം ആയിരങ്ങളാണ് നെഞ്ചേറ്റിയത്. കാൽപന്ത് കളിയുടെ ആവേശം ജ്വലിക്കുന്നതാണ് വരികൾ.

അതിരറ്റ ആവേശത്തിൽ ബഹുവർണ പതാകകൾ ആകാശത്ത് പറക്കുന്നത് കണ്ട് ഹൃദയം കൊണ്ട് എഴുതിയ 'ഫ്ലാഗ് ആർ ഫ്ലയിങ് ഓൺ ദി സ്‌കൈ...' എന്ന വരിയിൽ തുടങ്ങുന്ന ഗാനം ഖത്തറിൽ ബൂട്ടണിയുന്ന താരങ്ങളുടെ പ്രകടനങ്ങളെയും ഇതെല്ലാം കണ്ട് ആഹ്ലാദിച്ച് ആകാശത്ത് നക്ഷത്രങ്ങളായി ജ്വലിച്ചുനിൽക്കുന്ന ഡീഗോ മറഡോണ ഉൾപ്പെടെയുള്ള ഫുട്ബാൾ ഇതിഹാസങ്ങളുടെ ഓർമകളെയും തഴുകി ഒഴുകിപ്പരക്കുന്നു. ആ വരികൾ ഇങ്ങനെയാണ്... 'സ്റ്റാർസ് ആർ ഷൈനിങ് ഓൺ ദി സ്‌കൈ... ഫുട്ബാൾ ഈസ് ക്രേസി... ഫുട്ബാൾ ഈസ് ഇമോഷൻ... ഫുട്ബാൾ ഈസ് ബ്യൂട്ടി... ഫുട്ബാൾ ഈസ് മാജിക്...'

ഫുട്ബാൾ മാന്ത്രികവും ഭ്രാന്തവും മനോഹരവുമായ വൈകാരികതയാണെന്നും പാടി മുന്നേറുന്ന വരികൾ അവസാനിക്കുന്നത് കാൽപന്ത് കളിയൊരു യുദ്ധമാണെന്നും കളിക്കുന്നവർ രാജ്യത്തിന്റെ പട്ടാളമാണെന്നും പറഞ്ഞുവെച്ചാണ്. നൗഫൽ സംവിധാനം ചെയ്ത് ഒരുക്കിയ ആൽബത്തിന്റെ എഡിറ്റിങ് നിർവഹിച്ചത് എൻ.എൻ. മുനീറാണ്. കോഴിക്കോട് സ്വദേശികളായ ബാലതാരങ്ങൾ സയാൻ അഫ്‍ഹാമും ഹത്തിമ് മുബീറുമാണ് പ്രധാന കാഥാപാത്രങ്ങൾ.

'ഹലോ' എന്ന അഭിവാദ്യത്തിന് തുല്യമായ സ്പാനിഷ് ഭാഷയിലെ അഭിവാദ്യമാണ് 'ഹോല'. ലോകകപ്പ് മത്സരങ്ങൾക്ക് വേദിയാകുന്ന ഖത്തറിലെത്തുന്നവരെയും മത്സരങ്ങൾ വീക്ഷിക്കാൻ ലോകത്തിന്റെ വിവിധ കോണുകളിൽ തയാറെടുക്കുന്നവരെയും അഭിവാദ്യം ചെയ്യുകയാണ് ഇതിലൂടെ ഉദ്ദേശിക്കുന്നത്. മലപ്പുറം ജില്ലയിലെ തിരൂരിലും കണ്ണൂർ മുഴപ്പിലങ്ങാട്‌ കടൽത്തീരത്തും ചിത്രീകരിച്ച ആൽബത്തിന്റെ ജോലി പ്രവാസത്തിന്റ തിരക്കിനിടയിലാണ് നൗഫൽ പൂർത്തീകരിച്ചത്.

റിയാദ് മുറബ്ബ ലുലു മാളിലെ അസിസ്റ്റന്റ് ലോജിസ്റ്റിക് മാനേജരാണ് നൗഫൽ പാലേരി. 13 വർഷമായി ലുലുവിൽ ജോലി ചെയ്യുന്ന അദ്ദേഹം നിരവധി ഹ്രസ്വചിത്രങ്ങൾ സംവിധാനം ചെയ്തിട്ടുണ്ട്. മഖ്ബൂൽ സൽമാൻ നായകനാകുന്ന സിനിമയുടെ പണിപ്പുരയിലാണ്. ലുലു ഗ്രൂപ്പ് ചെയർമാൻ എം.എ. യൂസഫലിയുടെ കാരുണ്യ പ്രവർത്തനങ്ങൾ ഇതിവൃത്തമാക്കി പുറത്തിറക്കിയ 'തണൽ' എന്ന ആൽബവും ഹിറ്റായിരുന്നു. ആൽബം കാണാനിടയായ യൂസഫലി നേരിട്ട് വിളിച്ചു അഭിനന്ദിച്ചതും സഹപ്രവർത്തകരുടെ പ്രോത്സാഹനവും പ്രവാസ തിരക്കിനിടയിലും കല കൈവിടാതെ മുന്നോട്ട് കൊണ്ടുപോകാൻ ഊർജം പകരുന്നതായും നൗഫൽ 'ഗൾഫ് മാധ്യമ'ത്തോട് പറഞ്ഞു.