'എന്‍റെ മോനെ ഒന്നെടുക്കൂ; ഞാനൊരു ഫോ​ട്ടോയെടുക്ക​ട്ടെ'...'മെസ്സി മാനിയ'യിലലിഞ്ഞ്​ എതിർഗോളിയും

പാരിസ്​: റീംസിലെ സ്​റ്റേഡ്​ ആഗസ്​റ്റെ ​െഡലോണിനെ പൊതിഞ്ഞ 'മെസ്സി മാനിയ' പതിയെ മൈതാന​േത്തക്കും പടർന്നു. കളി കത്തിത്തീരു​േമ്പാഴും അതങ്ങനെ ആളിപ്പടർന്നുകൊണ്ടിരുന്നു. ആ അതിശയവും ആവേശവും പതിയെ എതിരാളികളിലേക്കും പടർന്നുകയറുന്നതായിരുന്നു സവിശേഷ കാഴ്ച. ഫ്രഞ്ച്​ ലീഗിൽ റീംസിനെതിരെ പി.എസ്​.ജിക്കുവേണ്ടി അരങ്ങേറ്റ മത്സരത്തിനിറങ്ങിയ ​െമസ്സിയുടെ സാന്നിധ്യം ഗാലറിയിലും പുറത്തും അനിതരസാധാരണമായ ആവേശമാണ്​ നിറച്ചത്​.

പുതിയ കളിസംഘത്തോടൊപ്പം ആദ്യമായി കളത്തിലിറങ്ങിയ ലയണൽ മെസ്സി അങ്കം കഴിഞ്ഞ്​ തിരിച്ചുകയറുന്നതിനിടക്ക്​​ ആരാധന നിറച്ച മുഖവും മനസ്സുമായി​ റീംസ്​ ഗോൾകീപ്പർ പ്രെഡ്രാക്​ റൈകോവിച്ച്​ പതിയെ താരത്തിനടുത്തേക്ക്​ നടന്നെത്തി. കുഞ്ഞുമകനെയുമെടുത്തായിരുന്നു റൈകോവിച്ചിന്‍റെ വരവ്​.

മകനുമൊത്ത്​ മെസ്സിക്കൊപ്പം ഒരു ഫോ​ട്ടോ. അതുമാത്രമായിരുന്നു റൈകോവിച്ചിന്‍റെ മനസ്സിൽ. പി.എസ്​.ജി ഗോളി കെയ്​ലർ നവാസിനൊപ്പം നടന്നുനീങ്ങുന്നതിനി​െടയാണ്​ എതിർഗോളി വരുന്നത്​ മെസ്സി കണ്ടത്​. അതോടെ താരം, റൈകോവിച്ചിനു നേർക്ക്​ ചെന്നു. മകനെ റൈകോവിച്ച്​ മെസ്സിയുടെ നേർക്ക്​ നീട്ടി. സ്​നേഹത്തോടെ മെസ്സി കുഞ്ഞിനെ എടുത്ത്​ നിറഞ്ഞ ചിരിയോടെ ഫോ​ട്ടോക്ക്​ പോസ്​ ചെയ്​തു.

ഈ സമയമത്രയും റീംസ്​ താരം വാൻ ബെർഗൻ തൊട്ടപ്പുറത്ത്​ കാത്തുനിൽക്കുന്നുണ്ടായിരുന്നു. ഫോ​ട്ടോയെടുത്ത്​ കഴിഞ്ഞപ്പോൾ തനിക്കരികിലെത്തിയ ബെർഗന്‍റെ തോളിൽ കൈയിട്ട്​ മെസ്സിയുടെ കുശലം. അതുകഴിഞ്ഞ്​ ഗാലറിക്കുകീഴെ ബാനറു​മായി കാത്തിരുന്നവരുടെ അടുത്തേക്ക്​. 'മിസ്റ്റർ മെസ്സി' എന്നു തുടങ്ങുന്ന ബാനറിൽ ഒപ്പുവെച്ച്​ കാണികളെ അഭിവാദ്യം ചെയ്​ത്​ മെസ്സി ഡ്രസ്സിങ്​ റൂമിലേക്ക്​ നീങ്ങി.

റൈകോവിച്ചിന്‍റെ മകനൊപ്പം മെസ്സി ഫോ​ട്ടോക്ക്​ പോസ്​ ചെയ്യുന്ന ചിത്രം നിമിഷങ്ങൾക്കകം സാമൂഹിക മാധ്യമങ്ങളിൽ ​വൈറലായി. 'ലിയോ മെസ്സി, താങ്ക്​യൂ' എന്ന അടിക്കുറിപ്പോടെ റൈക്കോവിച്ചിന്‍റെ ഭാര്യ അന ഇൻസ്റ്റഗ്രാമിൽ പോസ്റ്റ്​ ചെയ്​ത ചിത്രം നിരവധി പേരാണ്​ പങ്കുവെച്ചത്​.