ബെൻസേമ മികവിൽ റയൽ; ലാ ലിഗയിൽ രണ്ടാമത്​

മഡ്രിഡ്​: ഒരു ദിവസത്തേ​​​ക്കെങ്കിലും ലാ ലിഗയിൽ രണ്ടാം സ്​ഥാനം തിരിച്ചുപിടിച്ച്​ റയൽ മഡ്രിഡ്​. സീസണിലെ 24ാം ഗോളുമായി കരീം ബെൻസേമയും നാലാം ഗോളുമായി മാർകോ അസൻസിയോയും സ്​കോർ ചെയ്​ത കളിയിൽ തരംതാഴ്​ത്തൽ ഭീഷണിയിലുള്ള ഐബറിനെ ഏകപക്ഷീയമായ രണ്ടു ഗോളുകൾക്കാണ്​ റയൽ വീഴ്​ത്തിയത്​. ഇതോടെ, ഒന്നാം സ്​ഥാനത്തുള്ള അത്​ലറ്റികോ മഡ്രിഡിലേക്ക്​ ദൂരം മൂന്നു പോയിന്‍റായി റയൽ കുറച്ചു. അതേ സമയം, രണ്ടാമതായിരുന്ന ബാഴ്​സലോണക്കും ഒന്നാമന്മാരായ അത്​ലറ്റികോക്കും ഞായറാഴ്ച കളിയുണ്ട്​. ഇരുവരും ജയിച്ചാൽ റയൽ വീണ്ടും മൂന്നാം സ്​ഥാനത്തേക്കിറങ്ങും.

ലോസ്​ ​ബ്ലാ​ങ്കോസിനൊപ്പം പരിശീലക പദവിയിൽ 250 കളി തികച്ച സിനദിൻ സിദാന്​ നേരത്തെ കിങ്​സ്​ കപ്പിൽ ഡിപ്പോർട്ടിവോക്കു മുന്നിൽ തോൽവിയറിഞ്ഞതിന്‍റെ ക്ഷീണം തത്​കാലം തീർക്കുന്നതായി ജയം. രണ്ടു ഗോളുകൾക്ക്​ പുറമെ മൂന്നുവട്ടം റയൽ താരങ്ങൾ പിന്നെയും സ്​കോർ ചെയ്​തെങ്കിലും ഓഫ്​സൈഡിൽ കുടുങ്ങി. കണ്ണഞ്ചും പ്രകടനവുമായി റയൽ മുന്നേറ്റത്തിന്‍റെ ജീവവായുവായി തുടരുന്ന ബെൻസേമ ലാ ലിഗ സീസണിൽ 18ാം ഗോളാണ്​ ഐബറിനെതിരെ കുറിച്ചത്​. അവസാന ഏഴു കളികളിൽ താരം എതിർവലയിൽ നിക്ഷേപിച്ചത്​ ഒമ്പതു ഗോളുകൾ. ശനിയാഴ്ച മൂന്നാം മിനിറ്റിൽ തന്നെ റയൽ കരുത്ത്​ ഒന്നുകൂടി വ്യക്​തമാക്കി ബെൻസേമ ഐബർ വലയിൽ പന്തെത്തിച്ചെങ്കിലും റഫറി അനുവദിച്ചില്ല.

ജയത്തോടെ ചൊവ്വാഴ്​ച ചാമ്പ്യൻസ്​ ലീഗ്​ അവസാന എട്ടിൽ പ്രിമിയർ ലീഗ്​ കരുത്തരായ ലിവർപൂളിനെതിരെ ജയിക്കാനാകുമെന്ന പ്രതീക്ഷയിലേക്ക്​ പകുതി ചുവടുവെക്കാനായ ആശ്വാസത്തിലാണ്​ റയലും സിദാനും.

മറ്റു മത്സരങ്ങിൽ വിയ്യാറയൽ 3-0ന്​ ഗ്രനഡയെ മറികടന്നപ്പോൾ ഗെറ്റാഫെ- ഒസാസുന മത്സരം ഗോൾരഹിത സമനിലയിലായി.