സങ്കടക്കലാശം: കേരളത്തിന്റെ അപരാജിത യാത്രക്ക് ഫൈനലിൽ അന്ത്യം

ഹൈദരാബാദ്: സന്തോഷ്​ ട്രോഫിയിൽ കേരളത്തിന്​ പുതുവത്സര സമ്മാനമെന്ന മോഹം പൊലിഞ്ഞു.രണ്ടാം പകുതിയിൽ കേരളത്തിനെതിരെ ഇരമ്പിക്കയറിയ വംഗനാട്ടുകാർ 33 ആം കിരീടത്തിൽ മുത്തമിട്ടു. ഗച്ചിബൗളിയിലെ ജി.എം.സി ബാലയോഗി സ്​റ്റേഡിയത്തിൽ ചൊവ്വാഴ്ച രാത്രി നടന്ന 78ആമത്​ സന്തോഷ്​ ട്രോഫി ഫൈനലിൽ കളിയുടെ അന്ത്യനിമിഷത്തിൽ കുറിച്ച ഒറ്റ ഗോളിന്‍റെ മികവിലാണ്​ കിരീടം കേരളത്തിൽനിന്ന്​ കൊത്തിയെടുത്തത്​. വിജയികൾക്കായി സൂപ്പർ സ്​ട്രൈക്കർ റോബി ഹൻസ്​ദാ (90 + 4) ഗോൾ നേടി. ടൂർണമെന്‍റിൽ 12 ഗോളുകളുമായി ഹൻസ്​ദാ തന്നെയാണ്​ ടോപ്​ സ്​കോറർ.

ആദ്യ പകുതിയിൽ കേരള കുതിപ്പ്​

സെമി ലൈനപ്പിൽനിന്ന്​ ഒരു മാറ്റവുമായാണ്​ കേരളം ഇറങ്ങിയത്​. ചുവപ്പുകാർഡ്​ മൂലം സസ്​പെൻഷനിലായ മനോജിന്​ പകരം ആദിൽ അമൻ സെന്‍റർ ബാക്കിൽ ക്യാപ്​റ്റൻ സഞ്ജുവിന്​ കൂട്ടായെത്തി. ബംഗാൾ നിരയിൽ കോച്ച്​ സഞ്ജയ്​ സെൻ രണ്ടു മാറ്റം വരുത്തി. പരിക്കേറ്റ പ്ലേമേക്കൾ നരോഹരി ശ്രേഷ്ഠക്ക്​ പകരം ഫോർവേഡായി അബൂസൂഫിയാനെയും ഇസ്​റഫുൽ ദിവാനു പകരം മിഡ്​ഫീൽഡർ ആദിത്യ താപ്പയെയും ഇറക്കി. മൂന്നു ഫോർവേഡുകളെ മുന്നിൽ നിരത്തി 4-3-3 ശൈലിയിൽ ബംഗാളും അജ്​സലിനെ കുന്തമുനയാക്കി 5-4-1 ശൈലിയിൽ കേരളവും പടയൊരുക്കി.

കേരളത്തിന്‍റെ ടച്ചോടെയായിരുന്നു തുടക്കം. ആദ്യ അഞ്ചു മിനിറ്റിൽ കേരള ഗോൾമുഖത്തേക്ക്​ പാഞ്ഞടുത്ത ബംഗാളിൽനിന്ന്​ കളി പതിയെ കേരളം പിടിച്ചു. ആറാം മിനിറ്റിൽ ബംഗാൾ ബോക്​സിൽ കേരളത്തിന്‍റെ അറ്റാക്കിങ്​ മിഡ്​ഫീൽഡർ നസീബ്​ റഹ്​മാന്‍റെ റെയ്​ഡ്​. ഇടതു ബോക്സിൽനിന്ന്​ ഷോട്ടുതിർക്കും മുമ്പ്​ പ്രതിരോ ധതാരം ബിക്രം പ്രധാൻ ടാക്കിളിലൂടെ രക്ഷക്കെത്തി. രണ്ടു മിനിറ്റിന്​ ശേഷം നിജോയും റിയാസും ചേർന്ന മറ്റൊരു നീക്കവും കണ്ടു. നിജോ നൽകിയ പന്തുമായി നീങ്ങിയ മുഹമ്മദ്​ റിയാസ്​ നൽകിയ ക്രോസിൽ മുഹമ്മദ്​ അജ്​സൽ പന്തിനായി ഉയർന്നുചാടിയെങ്കിലും ബംഗാൾ പ്രതിരോധം അപകടമൊഴിവാക്കി. റോബി ഹൻസ്​ദായും സൂഫിയാനും മനതോസ്​ മാജിയും ചേർന്ന ബംഗാൾ മുന്നേറ്റം ഇടക്കിടെ കേരള ബോക്സിലും ഗോൾ സാധ്യത തേടി കറങ്ങി നടന്നു.

11 ആം മിനിറ്റിൽ നിജോയുടെ കൃത്യതയാർന്ന ക്രോസ്​ ബോക്സിൽ അജ്​സലിന്‍റെ തലക്കുപാകമായി വന്നിറങ്ങി. അ്​സലിന്‍റെ ഹെഡർ പക്ഷേ, ക്രോസ്​ബാറിനെ തൊട്ടുരുമ്മി കടന്നുപോയി. 19ആം മിനിറ്റിൽ എതിർ താരത്തിൽനിന്ന്​ പന്ത്​ പിടിച്ചെടുത്ത്​ ​അജ്​സൽ ഷോട്ട്​ പായിച്ചെങ്കിലും പുറത്തേക്കായി.

ഇരു വിങ്ങിലൂടെയും കേരളം മാറി മാറി ആക്രമണം മെനഞ്ഞപ്പോൾ ബംഗാളിന്​ പലപ്പോൾ പരുക്കൻ അടവ്​ പുറത്തെടുക്കേണ്ടി വന്നു. അജ്​സലിനെയും നസീബിനെയും ഫൗൾ ചെയ്തതിന്​ ബംഗാളിന്‍റെ പ്രതിരോധ താരങ്ങളായ ജുവൽ അഹ്​മദും ബിക്രം പ്രധാനും ആദ്യ പകുതിയിൽ മഞ്ഞക്കാർഡ്​ കണ്ടു. നസീബിനെ വീഴ്ത്തിയതിന്​ 34ആം മിനിറ്റിൽ ലഭിച്ച ഫ്രീകിക്ക്​ എടുത്ത ക്യാപ്​റ്റൻ സഞ്ജു ഗണേഷ് പന്ത്​ നസീബിലേക്കെത്തിച്ചു. നസീബിൽനിന്ന്​ അജ്​സലിലേക്കും അജ്​സലിൽനിന്ന്​ മുഷറഫിലേക്കും നീങ്ങിയ പന്തിൽ മുഷറഫിന്‍റെ അടി പക്ഷേ ഗോൾകീപ്പർ സൗരവ്​ സാമന്ത്​ തടുത്ത്​ കോർണർ വഴങ്ങി. ആദ്യ പകുതി അവസാനിക്കാൻ അഞ്ചുമിനിറ്റ്​ ശേഷിക്കെ, നസീബിനെ വീഴ്ത്തിയതിന്​ ലഭിച്ച ഫ്രീകിക്ക്​ ബംഗാൾ താരം ഹെഡ്​ ചെയ്​തകറ്റിയത്​ പിടിച്ചെടുത്ത മുഷറഫ്​ ഷോട്ടെടുത്തെങ്കിലും പന്ത്​ ലക്ഷ്യത്തിൽനിന്ന്​ മാറി. ബംഗാളിന്‍റെ ഒറ്റപ്പെട്ട പല മുന്നേറ്റങ്ങളും കേരളത്തിന്‍റെ ഓഫ്​സൈഡ്​ കെണിയിൽ കുടുങ്ങി.

തീയായി ബംഗാൾ

കൂടുതൽ ആക്രമണങ്ങളുമായി രണ്ടാം പകുതിയിൽ ബംഗാൾ കളിയിലേക്ക്​ തിരിച്ചുവന്നു. 53 ആം മിനിറ്റിൽ കേരള ഗോൾമുഖത്തേക്ക്​ എതിർ ഫോർവേഡ്​ അബൂസൂഫിയാൻ നടത്തിയ ഒറ്റയാൻ നീക്കം ഫലം കണ്ടില്ല. ഒരു മിനിറ്റ്​ ശേഷം നസീബ്​-നിജോ കൂട്ടുകെട്ടിലൂടെ പിറന്ന അവസരത്തിനൊടുവിൽ എതിർ ബോക്​സിൽ അജ്​സൽ സ്ലൈഡ്​ ചെയ്​തെത്തിയെങ്കിലും പന്ത്​ ബംഗാൾ ഗോൾകീപ്പർ പിടിച്ചെടുത്തു. പിന്നാലെ മനോതോസ്​ മാജിയുടെ മുന്നേറ്റം സഞ്ജുവിന്​ ഫൗളിൽ തടയേണ്ടി വന്നു. ഇടതു ബോക്സിന്​ തൊട്ടുമുന്നിൽനിന്ന്​ ഫ്രീകിക്ക്​. റോബി ഹൻസ്​ദാ എടുത്ത കിക്ക്​ കേരളത്തിന്‍റെ നെഞ്ചിൽ തീപടർത്തി ക്രോസ്​ ബാറിന്​ തൊട്ടുമുകളിലൂടെ കടന്നുപോയി.

63ആം മിനിറ്റിൽ ബംഗാൾ താരം സുപ്രദീപ്​ ഹസ്​റയെ നസീബ്​ ഫീൾ ചെയ്തതിന്​ വലതുബോക്സിന്​ തൊട്ടുമുന്നിൽനിന്ന്​ റഫറി ഫ്രീകിക്ക്​ അനുവദിച്ചു. കിക്ക്​ പക്ഷേ കേരള പ്രതിരോധം തടഞ്ഞു. പത്തുമിനിറ്റിനു ശേഷം മറ്റൊരു ഫ്രീകിക്ക്​ ബോക്സിൽ റോബി ഹൻസ്​ദായുടെ കാലിൽ ലഭിച്ചെങ്കിലും പ്രതിരോധ നിര വീണ്ടും രക്ഷക്കെത്തി. ഇതിനിടെ ബംഗാൾ നിരയിൽ അബൂസൂഫിയാന്​ പകരം ഇസ്​റഫുൽ എത്തി. തൊട്ടുപിന്നാലെ നിജോ ഗിൽബർട്ടിന്​ കനത്ത ഫൗൾ ഏറ്റ്​ പുറത്തുപോവേണ്ടി വന്നു. പകരം സെമിയിലെ ഹീറോ മുഹമ്മദ്​ റോഷൽ ഇറങ്ങി.

82ആം മിനിറ്റിൽ കേരള ഗോൾമുഖത്ത്​ അപകടഭീഷണിയുമായി ബംഗാൾ താരങ്ങൾ തലങ്ങും വിലങ്ങും കറങ്ങി. മൂന്നു കോർണറുകളാണ്​ ഈ നീക്കത്തിൽ കേരളം വഴങ്ങിയത്​. 88 ആം മിനിറ്റിൽ കേരളം ഗോളിനടു​ത്തെത്തി. റോഷൻ നൽകിയ പാസിൽ മുഷറഫിന്‍റെ അടി പക്ഷേ പാളി. 90 ആം മിനിറ്റിൽ അജ്​സലിന്​ പകരം മുന്നേറ്റത്തിലേക്ക്​ ഷിജിൻ വന്നെങ്കിലും രക്ഷയുണ്ടായില്ല. ആറു മിനിറ്റ്​ ഇഞ്ചുറി ടൈമിലേക്ക്​ കടന്ന കളിയിൽ രണ്ടു മിനിറ്റ്​ ശേഷിക്കെ, ഓപൺ ഗെയിമിലൂടെ ബംഗാൾ വിജയ ഗോൾ കുറിച്ചു. മനതോസ്​ മാജി നൽകിയ പന്ത്​ പിഴവില്ലാതെ റോബി ഹൻസ്​ദാ വലയിലാക്കി. അന്ത്യ നിമിഷത്തിൽ ലഭിച്ച ഫ്രീകിക്കിൽനിന്ന്​ സമനില നേടാനായുള്ള അവസരത്തിൽ സഞ്ജുവിന്‍റെ ഷോട്ട്​ പുറത്തുപോവുകയും ചെയ്തു.