സന്തോഷ് ട്രോഫി: ആന്ധ്രക്കെതിരെ മിസോറമിന് ജയം

കോഴിക്കോട്: കോർപറേഷൻ സ്റ്റേഡിയത്തിൽ നടക്കുന്ന 76ാമത് സന്തോഷ് ട്രോഫി ഗ്രൂപ് രണ്ടിലെ മൂന്നാം മത്സരത്തിൽ മിസോറം എതിരില്ലാത്ത മൂന്നു ഗോളുകൾക്ക് ആന്ധ്രയെ പരാജയപ്പെടുത്തി.

ആദ്യ പകുതിയിൽ ഒരു ഗോളിന് മുന്നിട്ടുനിന്ന മിസോറം രണ്ടാം പകുതിയുടെ അവസാന നിമിഷങ്ങളിലാണ് രണ്ടു ഗോളുകൾകൂടി നേടിയത്. 26ാം മിനിറ്റിൽ ലാൽ ബിയാക്ഡിക്കയുടെ ക്രോസ് മാൽസാംഫെലയാണ് വലയിൽ എത്തിച്ചത്. 82ാം മിനിറ്റിലും 90ാം മിനിറ്റിലും സബ്സ്റ്റിറ്റ്യൂട്ട് ജോസഫ്‍ലാൽ വെനിഹ്മ ഗോൾവല കുലുക്കി. മൂന്നു ഗോൾ ജയത്തോടെ ഗ്രൂപ്പിൽ രണ്ടാമതാണ് മിസോറം.

മറുപടിയില്ലാത്ത ഏഴു ഗോളുകൾക്ക് രാജസ്ഥാനെ തോൽപിച്ച കേരളമാണ് ഒന്നാമത്. അടുത്ത കളിയിൽ ഡിസംബർ 29ന് രാവിലെ എട്ടിന് മിസോറം ജമ്മു-കശ്മീരിനെ നേരിടും. രണ്ടാം മത്സരത്തിൽ ഉച്ചക്കുശേഷം 3.30ന് കേരളം ബിഹാറിനെ നേരിടും.