കിക്ക്​ പാഴാക്കിയത്​ 'പെനാൽറ്റി സ്​പെഷലിസ്റ്റുകൾ'; ഒടുവിൽ കുറ്റസമ്മതം നടത്തി സൗത്ത്​ഗേറ്റ്​

ലണ്ടൻ: യൂറോകപ്പ്​ ഫൈനലിൽ ഷൂട്ടൗട്ടിൽ ഇംഗ്ലണ്ടിന്‍റെ അവസാന കിക്ക്​ പാഴാക്കിയ ബുക്കായോ സാക്കയെ മാറോടണക്കു​േമ്പാൾ അവന്‍റെ വേദന മറ്റാരെക്കാളും അയാൾക്ക്​ മനസിലാകുമായിരുന്നു. ജർമനിക്കെതിരെ തനിക്കുണ്ടായ സമാനമായ ഒരു അനുഭവം 25 വർഷങ്ങൾക്കിപ്പുറവും ഗാരത്​ സൗത്ത്​ഗേറ്റ്​ എന്ന ഇംഗ്ലീഷ്​ കോച്ചിനെ വേട്ടയാടുന്നുണ്ടായിരുന്നു.

മത്സരം പെനാൽറ്റി ഷൂട്ടൗട്ടിലേക്ക്​ നീളുമെന്ന്​ മനസിലാക്കി കളത്തിലിറക്കിയ മൂന്നു താരങ്ങളും കിക്കുകൾ പാഴാക്കിയതോടെ വിമർശന ശരങ്ങൾ ഉയരുന്നത്​ സൗത്ത്​ഗേറ്റിന്‍റെ തന്ത്രങ്ങൾക്ക്​ നേരെയാണ്​. സമ്മർദ ഘട്ടത്തിൽ 19കാരനായ സാക്കയെ പെനാൽറ്റി കിക്കെടുക്കാൻ വിട്ട തീരുമാനത്തിലും സൗത്ത്ഗേറ്റ്​ ഇപ്പോൾ പശ്ചാതപിക്കുന്നുണ്ടാവണം. റഹീം സ്റ്റർലിങ്ങിനെ പോലെ പരിചയസമ്പന്നനായ ഒരാൾ ഇരിക്കേ 19കാരനെ കിക്കെടുക്കാൻ പറഞ്ഞയച്ച തീരുമാനത്തിനെതിരെ വിമർശനങ്ങൾ ഉയർന്നതോടെ സൗത്ത്​ഗേറ്റ്​ കുറ്റമേറ്റിരിക്കുകയാണ്​. നാല്​ യൂറോകളിൽ പന്തുതട്ടിയ സ്റ്റർലിങ്ങിനെ പെനാൽറ്റി കിക്കെടുക്കുന്ന അഞ്ചുപേരുടെ പട്ടികയിൽ ഉൾപെടുത്തുക പോലും ചെയ്​തിട്ടില്ല.

1966ന്​ ശേഷം ഒരു മേജർ കിരീടം പോലും നേടാൻ സാധിക്കാത്ത ഇംഗ്ലണ്ട്​ സമീപഭാവിയിൽ സൗത്ത്​ഗേറ്റിന്‍റെ പെനാൽറ്റി തന്ത്രങ്ങൾ പഠനവിധേയമാക്കുമെന്നുറപ്പ്​. 'പരീശീലന സമയത്താണ്​ ഞങ്ങൾ പെനാൽറ്റി കിക്കെടുക്കേണ്ടവരെ തീരുമാനിച്ചത്​. അത്​ എന്‍റെ തീരുമാനമായിരുന്നു. എനിക്കാണ്​ അതിന്‍റെ ഉത്തരവാദിത്വം' -സൗത്ത്​ഗേറ്റ്​ പറഞ്ഞു.

കളി പെനാൽറ്റിയിലേക്ക് നീങ്ങുമെന്നുറപ്പായതോടെ 120ാം മിനിറ്റിലാണ്​ ഇംഗ്ലണ്ട്​ മാർകസ്​ റാഷ്ഫോഡിനെയും ജേഡൻ സാഞ്ചോയെയും പകരക്കാരായി കളത്തിലിറക്കിയത്​. പെനാൽറ്റി കിക്കെടുക്കാൻ കണക്കാക്കിയായിരുന്നു സൗത്ത്​ഗേറ്റിന്‍റെ ഈ നീക്കം. ​ ൈകൽ വാക്കറിനെയും ഹെൻഡേഴ്​സണെയും പിൻവലിച്ചായിരുന്നു ഇരുവരെയും ഇറക്കിയത്​.

ലിവർപൂളിനൊപ്പം ചാമ്പ്യൻസ്​ ലീഗ്​ നേടിയ ഹെൻഡേഴ്​സണെ മാറ്റിയാണ്​ പെനാൽറ്റി എടുക്കാൻ യോഗ്യൻ സാഞ്ചോയാണെന്ന്​ സൗത്ത്​ഗേറ്റ്​ തീരുമാനിച്ചത്. അന്തിമ സെക്കൻഡുകളൊഴികെ അധിക സമയവും ബെഞ്ചിൽ ചെലവഴിച്ച റാഷ്​ഫോഡിനും സാഞ്ചോക്കും അതൊരു പരീക്ഷണമായിരുന്നു. സാക്കക്ക്​ മുമ്പ്​ കിക്കെടുത്ത ഇരുവരും പരാജയപ്പെട്ടു.

റാഷ്ഫോഡിന്‍റെ കിക്ക്​ പോസ്റ്റിന്​ തട്ടി മടങ്ങിയപ്പോൾ സാഞ്ചോയുടെ കിക്ക്​ ഇറ്റാലിയൻ ഗോൾകീപ്പർ തട്ടിയകറ്റി. ഇതോടെ ഇംഗ്ലണ്ട്​ ഷൂട്ടൗട്ടിൽ 3-2ന്​ തോറ്റു. ടൈബ്രേക്കറിൽ തുടക്കത്തിൽ മുൻതൂക്കം നേടിയ ശേഷമായിരുന്നു ഇംഗ്ലണ്ടിൻ്റെ നിർഭാഗ്യകരമായ കീഴടങ്ങൽ. ഇറ്റലിയുടെ ബെലോട്ടിയുടേയും ജോർജീഞ്ഞോയുടേയും കിക്കുകൾ ഇംഗ്ലീഷ്​ ഗോൾകീപ്പർ ജോർദൻ പിക്​ഫോർഡ്​ തടുത്തിട്ടിരുന്നു.

ഷൂട്ടൗട്ടിൽ തോറ്റതിന്​ പിന്നാ​െല മൂന്ന്​ കൗമാര താരങ്ങൾക്കെതിരെ സാമൂഹിക മാധ്യമങ്ങളിൽ വംശീയാധിക്ഷേപ പോസ്​റ്റുകൾ പ്രത്യക്ഷപ്പെട്ടിരുന്നു. സോഷ്യൽ മീഡിയയിൽ ഇംഗ്ലണ്ട് കളിക്കാരെ ലക്ഷ്യം ​െവച്ചുള്ള വംശീയാധിക്ഷേപങ്ങളെ ഇംഗ്ലീഷ്​ ഫുട്​ബാൾ അസോസിയേഷൻ ശക്​തമായി അപലപിച്ചു.