ഖത്തറിലെ മുത്തുകൾ

ഫുട്​ബാൾ, ടീം ഗെയിമാണെന്ന്​ ഏത്​ കാൽപന്തുപ്രേമിക്കുമറിയാം. ടീമിലെ 11 പേരും ഒരേ മനസ്സോടെ പന്തിന്​ പിറകെ പായുമ്പോഴാണ്​ ഏതൊരു കളിസംഘവും വിജയത്തിലേക്ക്​ മുന്നേറുന്നത്​. എന്നാലും കളിയുടെ രസച്ചരട്​ പൊട്ടാതെ നോക്കുന്നതിലും എതിരാളികളുടെ കോട്ടകൊത്തളങ്ങൾ തകർക്കുന്നതിലും എതിർമുന്നേറ്റങ്ങളുടെ മുനയൊടിക്കുന്നതിലും അസാമാന്യ വൈഭവമുള്ള ചില കളിക്കാരുണ്ടാവും. അവരാവും ടീമിന്‍റെ ഭാഗഥേയം നിർണയിക്കുക. അതിലുപരി കളിയാരാധകരുടെ മനസ്സകങ്ങളിൽ കൂടുകെട്ടുന്നതും അവരുടെ നീക്കങ്ങളാവും. ഖത്തറിലെ പുൽമൈതാനങ്ങളിൽ ഏഷ്യൻ കപ്പിന്​ ​കേളികൊട്ടുയരുമ്പോൾ വിവിധ രാജ്യങ്ങളുടെ പ്രതീക്ഷകൾ ചുമലിലേറ്റുന്ന ചിലരെ പരിച​യപ്പെടാം.

1. സൺ ഹ്യൂങ്​ മിൻ (ദക്ഷിണ കൊറിയ)

ഏഷ്യൻ കപ്പിനെത്തുന്ന മിന്നും താരം ആരെന്ന്​ ചോദിച്ചാൽ ഒരൊറ്റ ഉത്തരമേയുള്ളൂ. ദക്ഷിണ കൊറിയയുടെ സൺ ഹ്യൂങ്​ മിൻ. ആറു പതിറ്റാണ്ടിനുശേഷം ഏഷ്യൻ കപ്പിൽ കിരീടമുത്തം സ്വപ്നം കാണുന്ന ദക്ഷിണ ​കൊറിയയുടെ സ്വപ്നനായകനാണ്​ ഒരു വ്യാഴവട്ടം മുമ്പ്​ ഖത്തറിൽ തന്നെ നടന്ന ടൂർണമെന്‍റിൽ ദേശീയ ജഴ്​സിയിൽ ആദ്യ ഗോൾ സ്​കോർ ചെയ്ത സൺ. 2011ൽ ഇന്ത്യക്കെതിരെ ഗ്രൂപ്​ മത്സരത്തിൽ 4-1ന്​ ജയിച്ച കളിയിൽ പകരക്കാരനായി ഇറങ്ങിയായിരുന്നു സണിന്‍റെ കന്നി അന്താരാഷ്ട്ര ​ഗോൾ.

2. അലി മബ്​ഖൂത്ത്​ (യു.എ.ഇ)

ഖത്തർ ലോകകപ്പിൽ ലോക ചാമ്പ്യന്മാരായ അർജന്‍റീനയെ ഗ്രൂപ്​ ഘട്ടത്തിൽ സൗദി​ അറേബ്യ മറിച്ചിട്ട​പ്പോൾ മ​നോഹരമായ ഗോളോടെ അതിന്​ ചുക്കാൻ പിടിച്ചത്​ സാലിം അൽ ദൗസരിയായിരുന്നു. മെസ്സിയുടെ ഗോളിന്​ സാലിഹ്​ അൽ ഷഹ്​രി മറുപടി നൽകിയശേഷം അൽദൗസരിയുടെ ​ഷോട്ട്​ അർജന്‍റീന ഗോളി എമിലിയാനോ മാർട്ടിനെസിനെ മറികടന്ന്​ വലക്കണ്ണികളിൽ മുത്തമിട്ടപ്പോൾ കാൽപന്തുലോകം അമ്പരന്നുനിന്നു.

ഒരിക്കൽ കൂടി അതേ മണ്ണിൽ സൗദി ഇറങ്ങുമ്പോൾ കിരീടപ്രതീക്ഷകൾ അൽദൗസരിയുടെ ചുമലിലാണ്​. ലോകോത്തര താരങ്ങളുടെ വരവോടെ പകിട്ടേറിയ സൗദി പ്രോ ലീഗിലും മിന്നും താരമാണ്​ അൽഹിലാലിന്‍റെ കുപ്പായമണിയുന്ന 32കാരൻ. ഇത്തവണത്തെ ഏഷ്യയിലെ മികച്ച താരത്തിനുള്ള പുരസ്കാരവും അൽദൗസരിക്കായിരുന്നു. 27 വർഷമായി ഏഷ്യൻ കപ്പ്​ നേടിയിട്ടില്ലാത്ത സൗദി നാലാം കിരീടത്തിനായി ഖത്തറിൽ ബൂട്ടുകെട്ടു​​മ്പോൾ പ്രതീക്ഷക​ളേറെയും കൂടുകെട്ടുന്നത്​ അൽ ദൗസരിയിലാണ്​.

3. സാലിം അൽ ദൗസരി (സൗദി അറേബ്യ)

ഖത്തർ ലോകകപ്പിൽ ലോക ചാമ്പ്യന്മാരായ അർജന്‍റീനയെ ഗ്രൂപ്​ ഘട്ടത്തിൽ സൗദി​ അറേബ്യ മറിച്ചിട്ട​പ്പോൾ മ​നോഹരമായ ഗോളോടെ അതിന്​ ചുക്കാൻ പിടിച്ചത്​ സാലിം അൽ ദൗസരിയായിരുന്നു. മെസ്സിയുടെ ഗോളിന്​ സാലിഹ്​ അൽ ഷഹ്​രി മറുപടി നൽകിയശേഷം അൽദൗസരിയുടെ ​ഷോട്ട്​ അർജന്‍റീന ഗോളി എമിലിയാനോ മാർട്ടിനെസിനെ മറികടന്ന്​ വലക്കണ്ണികളിൽ മുത്തമിട്ടപ്പോൾ കാൽപന്തുലോകം അമ്പരന്നുനിന്നു.

ഒരിക്കൽ കൂടി അതേ മണ്ണിൽ സൗദി ഇറങ്ങുമ്പോൾ കിരീടപ്രതീക്ഷകൾ അൽദൗസരിയുടെ ചുമലിലാണ്​. ലോകോത്തര താരങ്ങളുടെ വരവോടെ പകിട്ടേറിയ സൗദി പ്രോ ലീഗിലും മിന്നും താരമാണ്​ അൽഹിലാലിന്‍റെ കുപ്പായമണിയുന്ന 32കാരൻ. ഇത്തവണത്തെ ഏഷ്യയിലെ മികച്ച താരത്തിനുള്ള പുരസ്കാരവും അൽദൗസരിക്കായിരുന്നു. 27 വർഷമായി ഏഷ്യൻ കപ്പ്​ നേടിയിട്ടില്ലാത്ത സൗദി നാലാം കിരീടത്തിനായി ഖത്തറിൽ ബൂട്ടുകെട്ടു​​മ്പോൾ പ്രതീക്ഷക​ളേറെയും കൂടുകെട്ടുന്നത്​ അൽ ദൗസരിയിലാണ്​.

4. മാത്യു ​റയാൻ (ആസ്​ട്രേലിയ)

2015ൽ ആൻഗെ പോസ്​​റ്റെകോഗ്​ലുവിന്‍റെ പരിശീലനത്തിൽ ആസ്​ട്രേലിയ ആദ്യമായി ഏഷ്യൻ കപ്പ്​ ചാമ്പ്യന്മാരായപ്പോൾ ബാറിനുകീഴിൽ മാത്യൂ റയാനായിരുന്നു. കഴിഞ്ഞ രണ്ടു ലോകകപ്പുകളിൽ സോക്കറൂസിനായി വല കാത്തതും മറ്റാരുമായിരുന്നില്ല. സ്വന്തം നാട്ടിൽ നേടിയ കിരീടം യു.എ.ഇയിൽ നഷ്ടമായത്​ തിരിച്ചുപിടിക്കാൻ ഖത്തറിലെത്തുമ്പോൾ നായകനായി സഹകളിക്കാരുടെ ‘മാറ്റ്​’ മുന്നിലുണ്ട്​.

ക്ലബ്​ ബ്രൂഗ്​, വലൻസിയ, ബ്രൈറ്റൺ, ജെൻക്​, ആഴ്​സനൽ, റയൽ ​സോസിഡാഡ്​, കോപ്പൻഹേഗൻ ക്ലബുകൾക്ക്​ കളിച്ചിട്ടുള്ള റയാൻ നിലവിൽ ഡച്ച്​ ക്ലബ്​ എ.സെഡ്​ അൽക്​മാറിനൊപ്പമാണ്​. മൈതാനത്തിന്‍റെ വിവിധ ഭാഗങ്ങളിൽ തിളങ്ങുന്ന ഒരുപിടി മികച്ച താരങ്ങളുണ്ടെങ്കിലും കോച്ച്​ ഗ്രഹാം ആർനൾഡിന്‍റെ ടീം ഷീറ്റിലെ ആദ്യ പേരുകളിലൊന്നാണ്​ മാത്യു ​റയാന്‍റേത്​. 31കാരന്‍റെ കളി മികവും പരിചയസമ്പത്തും ഒരിക്കൽ കൂടി കിരീടം ചൂടാൻ ടീമിന്​ തുണയാവുമെന്ന കണക്കുകൂട്ടലിലാണ്​ ഓസീസ്​ സംഘം.

5. സുനിൽ ഛേത്രി (ഇന്ത്യ)

ഇന്ത്യയുടെ എക്കാലത്തെയും മികച്ച ഗോൾ സ്​കോററായ സുനിൽ ഛേത്രി 39ാം വയസ്സിലും ടീമിന്‍റെ പ്രധാന പ്രതീക്ഷയാണെന്നത്​ തന്നെ താരത്തിന്‍റെ മാറ്റ്​ വ്യക്​തമാക്കുന്നു. ക്രിസ്റ്റ്യാനോക്കും അലി ദായിക്കും മെസ്സിക്കും പിറകിൽ അന്താരാഷ്ട്ര ഫുട്​ബാളിലെ ടോപ്​ സ്​കോറർമാരുടെ പട്ടികയിൽ നാലാം സ്ഥാനത്തുള്ള ഛേത്രിയുടെ അവസാന ഏഷ്യൻ കപ്പാവുമിത്​.

27 വർഷത്തെ ഇടവേളക്കുശേഷം ഇന്ത്യയോഗ്യത നേടിയ 2011ൽ ഖത്തർ തന്നെ ആതിഥേയത്വം വഹിച്ച ഏഷ്യൻ കപ്പിൽ കളിച്ചിട്ടുള്ള ഛേത്രി രണ്ടു ഗോളുകളുമായി തിളങ്ങുകയും ചെയ്തു. 2015ൽ യോഗ്യത നേടാനാവാതിരുന്ന ശേഷം 2019ൽ യു.എ.ഇയിൽ തായ്​ലൻഡിനെ 4-1ന്​ തകർത്ത്​ 55 വർഷത്തിനിടെ ഇന്ത്യ ഏഷ്യൻ കപ്പിൽ ആദ്യ ജയം സ്വന്തമാക്കിയപ്പോൾ ഇരട്ട​ഗോളുമായി നിറഞ്ഞാടിയത്​ ഛേത്രിയായിരുന്നു. പിന്നീട്​ രണ്ടു തോൽവികളുമായി ഇന്ത്യ ഗ്രൂപ്​ ഘട്ടത്തിൽ മടങ്ങിയെങ്കിലും ഇത്തവണ ടീമിനെ വീണ്ടും ഏഷ്യൻ കപ്പിനെത്തിച്ചത്​ ഛേത്രി തന്നെയാണ്​. ഗോൾനേട്ടത്തിൽ സെഞ്ച്വറിയിലേക്ക്​ നീങ്ങുന്ന ഛേത്രി തന്നെയാണ്​ ഖത്തറിൽ ഇന്ത്യൻ പ്രതീക്ഷയുടെ ഗോൾമുഖത്ത്​. ഗ്രൂപ്​ ഘട്ടമെങ്കിലും കടക്കുകയെന്ന ഇഗോർ സ്റ്റിമാക്കിന്‍റെ ലക്ഷ്യത്തിലേക്കുള്ള പ്രധാന ചാട്ടുളി ഇതിനകം തന്നെ ഇതിഹാസമായി മാറിക്കഴിഞ്ഞ ഛേത്രി തന്നെയായിരിക്കും.

6. അക്രം അഫീഫ്​ (ഖത്തർ)

ഖത്തറിന്‍റെ മുത്താണ്​ അക്രം അഫീഫ്​. ഏതു പൊസിഷനിലും എങ്ങനെയും കളിക്കാൻ കഴിവുള്ള താരമെന്ന്​ സ്​പെയിൻ, ബാഴ്​സലോണ ഇതിഹാസം ചാവി വിശേഷിപ്പിച്ച താരം. ഖത്തർ ക്ലബായ അൽസദ്ദിന്‍റെ പരിശീലകനായിരിക്കെ 2019ലാണ്​ ചാവി അഫീഫിനെ പ്രശംസകൊണ്ട്​ മൂടിയത്​. അതിനുതൊട്ടുപിന്നാലെയായിരുന്നു അഫീഫിന്‍റെ ഗംഭീര പ്രകടനത്തിന്​ ലോകം സാക്ഷിയായതും. അതേവർഷം യു.എ.ഇയിൽ നടന്ന ഏഷ്യൻ കപ്പിൽ വമ്പന്മാരെ ഒന്നൊന്നായി അരിഞ്ഞുവീഴ്ത്തി ഖത്തർ ആദ്യമായി ചാമ്പ്യന്മാരാ​യപ്പോൾ അതിന്​ ചുക്കാൻ പിടിച്ചത്​ ടൂർണമെന്‍റിൽ 10 അസിസ്റ്റുമായി മിന്നിത്തിളങ്ങിയ അഫീഫ്​ എന്ന 23കാരനായിരുന്നു. ഉത്തര കൊറിയക്കെതിരെ നാലും സെമിയിൽ ആതിഥേയർക്കെതിരെ മൂന്നും അസിസ്റ്റ്​ സ്വന്തം പേരിൽ കുറിച്ച അഫീഫ്​ ഫൈനലിൽ കരുത്തരായ ജപ്പാനെ 3-1ന്​ മലർത്തിയ​ടിച്ചപ്പോൾ ഖത്തറിന്‍റെ അവസാന ഗോളും സ്​കോർ ചെയ്തു.

അയൽനാട്ടിൽ നേടിയ കന്നിക്കിരീടം സ്വന്തം മണ്ണിൽ നിലനിർത്താനൊരുങ്ങുന്ന ഖത്തർ ടീമിൽ 2019ലെ പ്രധാന താരങ്ങളായ അൽ​​മുഇസ്​ അലി, ഹസൽ അൽഹൈദോസ്​, ബൗലിം ഖൗക്കി, ബസ്സാം അൽറാവി എന്നിവരൊക്കെയുണ്ടെങ്കിലും പുതിയ​ പരി​ശീലകൻ മാർക്വസ്​ ലോപസിന്‍റെയും പ്രധാന ആയുധം അഫീഫ്​ തന്നെയായിരിക്കും.

7. മെഹ്​ദി തരേമി (ഇറാൻ)

ഏറക്കാലം അന്താരാഷ്ട്ര ഫുട്​ബാളിൽ ടോപ്സ്​കോറർ പദവിയിൽ വിരാജിച്ച അലി ദായിയുടെ നാട്ടിൽ കിടയറ്റ സ്​ട്രൈക്കർമാർക്ക്​ പഞ്ഞമുണ്ടാവാറില്ല. അക്കൂട്ടത്തിലെ അടർത്തിമാറ്റാനാവാത്ത കണ്ണിയാണ്​ മെഹ്​ദി തരേമി എന്ന 31കാരൻ. ഇതിഹാസ താരമായ ദായിയുടെ (148 മത്സരങ്ങളിൽ 108 ഗോൾ) അടുത്തെങ്ങുമെത്തിയിട്ടില്ലെങ്കിലും ഇന്ന്​ ഏഷ്യയിലെ മികച്ച മുന്നേറ്റ നിരക്കാരിലൊരാളാണ്​ തരേമി.

പോർചുഗൽ ക്ലബ്​ എഫ്​.സി പോർട്ടോക്ക്​ ബൂട്ടുകെട്ടുന്ന തരേമി 2021-22 സീസണിൽ ലീഗ്​ കിരീടവും കഴിഞ്ഞ സീസണിൽ ലീഗിലെ ടോപ് സ്​കോറർ പദവിയും സ്വന്തമാക്കി. ദേശീയ ടീമിനായി കൂടുതൽ ഗോൾ നേടിയവരിൽ അലി ദായിക്കും കരീം ബഗേരിക്കും (50) സർദാർ അസ്മൗനും (49) മാത്രം പിറകിലാണ്​ തരേമി. 2023ലെ മികച്ച ഫോമും തരേമിക്ക്​ മുതൽകൂട്ടാണ്​. കഴിഞ്ഞ വർഷം 11 കളികളിൽ 12 ​അന്താരാഷ്ട്ര ഗോളുകളുണ്ട്​ തരേമിയുടെ ക്രെഡിറ്റിൽ. യുവേഫ ചാമ്പ്യൻസ്​ ലീഗിൽ കൂടുതൽ ഗോൾ സ്​കോർ ചെയ്ത ഏഷ്യക്കാരൻ എന്ന നേട്ടവും തരേമിയുടെ പേരിലാണ്​. 24 കളികളിൽ ഒമ്പത്​ ഗോളുകളാണ്​ ചാമ്പ്യൻസ്​ ലീഗിൽ തരേമി സ്വന്തമാക്കിയത്​. പോർട്ടോക്കായി 171 മത്സരങ്ങളിൽ 86 തവണ വല കുലുക്കിയ കരീമിക്കൊപ്പം മറ്റൊരു ഗംഭീര സ്​ട്രൈക്കർ അസ്മൗനും ചേരുന്നതോടെ ഇറാൻ മുന്നേറ്റനിര ഇരട്ടക്കുഴലുള്ള തോക്കാവും.

8. തകേഫുസോ കൂബോ​ (ജപ്പാൻ)

ലോകഫുട്​ബാളിലെ ഏറ്റവും മികച്ച ക്ലബുകളിൽ ഉൾപ്പെടുന്ന സ്പാനിഷ്​ വമ്പന്മാരായ ബാഴ്​സലോണയുടെയും റയൽ മഡ്രിഡിന്‍റെയും ജഴ്​സികളിൽ കളിക്കാൻ അപൂർവ ഭാഗ്യം കിട്ടിയ താരങ്ങളിലൊരാളാണ്​ തകേഫൂസോ കൂബോ. പത്താം വയസ്സിൽ ബാഴ്​സയുടെ ലാ മാസിയ അക്കാദമിയിലെത്തിയ കൂബോ യൂത്ത്​ ടീമുകൾക്കായി തകർത്തുകളിച്ച നാലു വർഷത്തിനുശേഷം ബാഴ്​സ വിട്ടെങ്കിലും 18ാം വയസ്സിൽ റയൽ മഡ്രിഡിന്‍റെ വിളിയെത്തി.

16ാം വയസ്സിൽ ജെ ലീഗിലെ പ്രായം കുറഞ്ഞ സ്​കോറർ ആയതിനശേഷമായിരുന്നു റയലിലേക്കുള്ള വരവ്​. റയലിന്‍റെ ഫസ്റ്റ്​ ടീമിൽ കാര്യമായ അവസരം ലഭിച്ചില്ലെങ്കിലും വായ്​പ്പാടിസ്ഥാനത്തിൽ കളിച്ച റയൽ മയ്യോർക, വിയ്യാറയൽ, ഗെറ്റാഫെ എന്നിവിടങ്ങളിലെല്ലാം കൂബോ ഓളങ്ങളുണ്ടാക്കി. ഒടുവിൽ കഴിഞ്ഞ സീസണിൽ റയൽ സോസിഡാഡിന്‍റെ കുപ്പായമണിഞ്ഞ കൂബോ മിന്നും ഫോമിലേക്കു​യർന്നതോടെ ടീം ലാ ലിഗയിൽ നാലാമതെത്തുകയും ചാമ്പ്യൻസ്​ ലീഗിന്​ യോഗ്യത​ നേടുകയും ചെയ്തു. ചാമ്പ്യൻസ്​ ലീഗിൽ നോക്കൗട്ട്​ ഘട്ടത്തിലേക്കും ടിക്കറ്റെടുത്തിരിക്കുകയാണ്​ കൂബോയുടെ ടീം.

ഇടങ്കാലുകളിൽ മാ​ന്ത്രികതയൊളിപ്പിച്ചിരിക്കുന്ന കൂബോ വലതുവിങ്ങിലും ഇടതുവിങ്ങിൽ വലങ്കാലൻ കിറോ മിറ്റോമയും അണിനിരക്കുന്നതോടെ ഹാജിമെ മോറിയാസുവിന്‍റെ ജപ്പാനെ ഖത്തറിൽ പിടിച്ചുകെട്ടാൻ എതിരാളികൾ വിയർക്കുമെന്നുറപ്പ്​.