ചരിത്രം വഴിമാറി; ക്രെ​ായേഷ്യയോട്​ പകരംവീട്ടി ഇംഗ്ലണ്ട്​ തുടങ്ങി

ലണ്ടൻ: ചരിത്രമുറങ്ങുന്ന വെംബ്ലി സ്​റ്റേഡിയത്തിൽ ഇംഗ്ലണ്ട്​ ചരിത്രം തിരുത്തിയെഴുതി. ക്രൊയേഷ്യക്കെതിരെയുള്ള ഒറ്റഗോൾ ജയത്തോടെ യൂറോകപ്പ്​ ചരിത്രത്തിൽ ഇന്നേവരെ ആദ്യ മത്സരം വിജയിച്ചി​ട്ടില്ലെന്ന നാണക്കേട്​ ഇംഗ്ലണ്ട്​ തിരുത്തിയെഴുതി. ഒപ്പം 2018 ലോകകപ്പ്​ സെമിഫൈനലിൽ തങ്ങളെ നാട്ടിലേക്ക്​ മടക്കിയ ക്രൊയേഷ്യൻ പടയോട്​ ​ അന്താരാഷ്​ട്ര വേദിയിൽ വെച്ചൊരു മധുര പ്രതികാരവും. 54ാം മിനുറ്റിൽ റഹീം സ്​റ്റെർലിങ്​ കുറിച്ച ഗോളാണ്​ ഇംഗ്ലീഷ്​ ടീമിന്‍റെ ചരിത്രം മാറ്റിക്കുറിച്ചത്​.

നാല്​ റൈറ്റ്​ ബാക്കുകളെ അണിനിരത്തി മത്സരത്തിനിറങ്ങിയ ഗാരത്​ സൗത്ത്​ഗേറ്റിന്‍റെ ഇംഗ്ലണ്ട്​ ടീമിനെ കണ്ട്​ ആദ്യം എല്ലാവരും ഒന്നമ്പരന്നു. ആവനാഴിയിൽ അസ്​ത്രങ്ങളൊരുപാടുള്ള ഇംഗ്ലണ്ടിന്‍റെ പ്രതിരോധനിര കാത്തത്​ കൈൽ വാൽക്കർ, കീരൺ ട്രിപ്പിയർ, ജോൺ സ്​റ്റോൺസ്​, തിറോൺ മിങ്​സ്​ എന്നിവരായിരുന്നു. ഫിൽ ഫോഡൻ, മേസൺ മൗണ്ട്​, റഹീം സ്​റ്റെർലിങ്​ ത്രയത്തിനൊപ്പം ആക്രമണത്തിന്​ ഹാരി കെയ്​ൻ ചുക്കാൻ പിടിച്ചു.

മത്സരത്തിന്‍റെ ആദ്യം മുതൽ ഗോൾമുഖത്തേക്ക്​ ഇരമ്പിയാർത്ത ഇംഗ്ലീഷ്​ പട ക്രൊയേഷ്യൻ പടക്ക്​ തലവേദന തീർത്തു. അവസരങ്ങൾ സൃഷ്​ടിച്ചെങ്കിലും ആദ്യ പകുതി ഗോളൊഴിഞ്ഞുതന്നെ നിന്നു. 54ാം മിനുറ്റിലായിരുന്നു ഇംഗ്ലണ്ട്​ ആരാധകരെ ഉന്മാദത്തിലാക്കി സ്​റ്റെർലിങ്ങിന്‍റെ ഗോളെത്തിയത്​. അതിമനോഹര മുന്നേറ്റത്തിനൊടുവിൽ കാൽവിൻ ഫിലിപ്​സ്​ കൊടുത്ത ഒന്നാംതരം പാസ്​ സ്​റ്റെർലിങ്​ വലതുകാൽ കൊണ്ട്​ വലയിലേക്ക്​ കോരിയിടുകയായിരുന്നു. ക്രൊയേഷ്യൻ നിരയെ ഗോളടിക്കാനനുവദിക്കാതെ വിജയം നുണയാനുള്ള പദ്ധതികളായിരുന്നു ഇംഗ്ലണ്ട്​ പിന്നീട്​ ആവിഷ്​കരിച്ചത്​.