ഇങ്ങനെയൊക്കെ ചെയ്യാമോ പി.എസ്​.ജി ഫാൻസ്​... !

അങ്ങാടിയിൽ തോറ്റതിന്​ അമ്മയോട്​ കൊമ്പുകോർത്തിട്ട്​ എന്തു കാര്യം...അതെ, അതു ശരിയാണ്​. പക്ഷേ, പാരിസിലെ ചില പി.എസ്​.ജി ആരാധകർ അങ്ങനെയാണ്​. ചാമ്പ്യൻസ്​ ലീഗ്​ ഫൈനലിൽ ബയേൺ മ്യൂണിക്കിനോട്​ തോറ്റ്​ മടങ്ങിയതിനു പിന്നാലെ പാരിസിൽ ആരാധകർ കാണിച്ചുകൂട്ടിയത്​ കണ്ടാൽ ആ​രും അമ്പരന്നു പോകും. പൊലീസുമായി കൊമ്പുകോർത്ത്​ കണ്ണിൽ കണ്ടതെല്ലാം അടിച്ചു തകർത്തു.

ഒരു പക്ഷേ, ആദ്യമായി യൂറോപ്പ്യൻ ചാമ്പ്യൻ പോരാട്ടത്തിലെ ഫൈനലിൽ എത്തിയതിൻെറ അങ്കലാപ്പായിരിക്കും. അല്ലെങ്കിൽ, മത്സരത്തിനു മുന്നെ കപ്പുറപ്പിച്ച​ അമിത ആഹ്ലാദത്തിനേറ്റ തിരിച്ചടിയിൽ നിന്നുണ്ടായ ഷോക്കായിരിക്കും.

ഏതായാലും ആ രാവിൽ പാരിസ്​ നഗരത്തിൽ പി.എസ്​.ജി ആരാധകർ അഴിഞ്ഞാടി. കോവിഡോ, സമൂഹിക അക​​ലമോ, ലോക്​ഡൗണോ ഒന്നും നോക്കിയില്ല. അതിരുവിട്ട ആരാധകർ നിരവധി കാറുകൾ അടിച്ചു തകർത്തു, കത്തിച്ചു കളഞ്ഞു.

മത്സരത്തിനു മുന്നെ പാർക്​ ഡെസ്​ പ്രിൻസെസ്​ സ്​റ്റേഡിയത്തിനു മുന്നിൽ തടിച്ചു കൂടിയ 5000ത്തിൽപരം വരുന്ന ആരാധകരാണ്​ അക്രമത്തിലേക്കു നീങ്ങിയത്​​. തീഗോളങ്ങൾ എറിഞ്ഞും കടകൾ തകർത്തും വാഹനങ്ങൾ കത്തിച്ചും അവർ ബയേണിനോടുള്ള 'പ്രതിഷേധം' അറിയിച്ചു. സംഭവത്തിൽ, 148 പേരെ അറസ്​റ്റു ചെയ്​തതായി പൊലീസ്​ പറഞ്ഞു.

പാരിസ്​ മേയർ അന്നെ ഹിഡാൽഗോ അക്രമത്തെ അപലപിച്ചു രംഗത്തെത്തി. നേരത്തെ, പി.എസ്​.ജി സെമിയിൽ ജയിച്ചപ്പോൾ തന്നെ കാണികൾ സംയമനം പാലിക്കണമെന്ന്​ നഗര ഭരണകൂടം ആവശ്യ​പ്പെട്ടിരുന്നു.