പല കാര്യങ്ങളിലും ഞങ്ങൾ ഹാപ്പിയല്ല -കേരള കോച്ച് ബിബി തോമസ്

ഹൈദരാബാദ്: സന്തോഷ് ട്രോഫിയുമായി ബന്ധപ്പെട്ട് പല കാര്യങ്ങളിലും തങ്ങൾ സന്തുഷ്ടരല്ലെന്ന് കേരള ഫുട്ബാൾ ടീം പരിശീലകൻ ബിബി തോമസ് മുട്ടത്ത് പറഞ്ഞു. കപ്പ്​ കൈവിട്ടതിൽ കനത്ത നിരാശയുണ്ട്. ടീമിൽ കുറെ യുവതാരങ്ങളുണ്ട്​. അവർക്കിനിയും കേരളത്തിനായി മികച്ച കളി​ കാഴ്ചവെക്കാനാവും. സൂപ്പർ ലീഗ്​ കേരളയുടെ ഇംപാക്ട്​ വരുംവർഷങ്ങളിൽ കേരളത്തിന്‍റെ കളിയിലുമുണ്ടാവും.

പരിചയ സമ്പന്നനായ ഗനി അഹമ്മദ്​ നിഗത്തിനേറ്റ പരിക്ക്​ ഒരു വിടവാണ്​. അദ്ദേഹം ഐലീഗിലും ഐ.എസ്​.എല്ലിലും അനുഭവ സമ്പത്തുള്ള താരമാണ്​. അദ്ദേഹത്തിന്‍റെ അസാന്നിധ്യത്തിലും മറ്റുള്ളവർ നന്നായി കളിച്ചു. ഗനി ഇല്ലാത്തതുകൊണ്ട്​ ടീം തോറ്റു എന്ന്​ പറയാനാവില്ല. ടീമിനെ ബാധിച്ചത്​ സെമി ഫൈനലിലെ റെഡ്​ കാർഡ്​ സംഭവം തന്നെയാണെന്ന്​ ഞാനിപ്പോഴും വിശ്വസിക്കുന്നു. അനാവശ്യമായ ഒരു കാർഡായിരുന്നു അത്​. അത്​ ഞങ്ങളെ സ്റ്റാർട്ടിങ്​ ഇലവനിൽ മാറ്റം വരുത്താൻ നിർബന്ധിതരാക്കി. മനോജ്​ കളത്തിലുണ്ടായിരുന്നെങ്കിൽ ടീമിന്‍റെ പ്രകടനം മറ്റൊന്നാകുമായിരു​​ന്നു. കുറച്ചുകൂടി മെച്ചപ്പെട്ട്​ കളിക്കാനാവുമായിരുന്നെന്നും ഞാൻ വിശ്വസിക്കുന്നു.

റഫറിയുടെ ആ തീരുമാനത്തിൽ എല്ലാവരും നിരാശയിലാണ്​. ആ മത്സരത്തിന്‍റെ വിഡിയോ ദൃശ്യം പരിശോധിച്ചാൽ ആർക്കും തിരിച്ചറിയാം സത്യാവസ്ഥ എന്താണ്​ എന്നത്​. ഞങ്ങൾ ജയിച്ചിരുന്നെങ്കിൽ പോലും സെമിഫൈനലിലെ ആ സംഭവം മറക്കാനെനിക്ക്​ കഴിയില്ല. അത്​ ഇന്ത്യൻ ഫുട്​ബാളിന്​ നാണക്കേട്​ തന്നെനയാണ്​. എങ്ങനെയാണ്​ ഒരു റഫറിക്ക്​ ഒരു ടീമിനെ ഇല്ലാതാക്കാൻ കഴിയുക എന്നതിന്‍റെ വലിയൊരു ഉദാഹരമാണിത്​. ഒരാളുടെ ഈഗോ ഒരു സംസ്ഥാനത്തിന്‍റെ തന്നെ കിരീടമോഹങ്ങളെയാണ്​ തകർത്തത്​ - ബിബി തോമസ് പറഞ്ഞു.

പ്രതിസന്ധികൾ കടന്നാണ് കേരളം മികച്ച പ്രകടനത്തോടെ ഫൈനലിലെത്തിയത്. പരിശീലനത്തിന്​ നല്ലൊരു മൈതാനമില്ലെന്നതായിരുന്നു പ്രധാന പ്രശ്നം. ആദ്യം പരിശീലനത്തിന്​ അനുവദിച്ച ഹൈദരാബാദ്​ കമീഷണർ ഓഫിസ്​ മൈതാനം മോശമായതിനാൽ കേരളം ആവശ്യപ്പെട്ട്​ ഹോപ്സ്​ മൈതാനത്തേക്ക്​ പരിശീലനം മാറ്റി. ഇതാകട്ടെ അരികുകളിൽ കുഴികളുള്ള മൈതാനമായതിനാൽ മുഴുവൻ ഗ്രൗണ്ടും ഉപയോഗിച്ചുള്ള പരിശീലനവും സാധ്യമായില്ല. ക്വാർട്ടർ വരെയുള്ള ആറു മത്സരങ്ങൾ നടന്നത്​ ടർഫ്​ മൈതാനത്തായിരുന്നു എന്നതും വെല്ലുവിളിയായി. കളിക്കാർക്ക്​ പരിക്കേൽക്കാനുള്ള സാധ്യത ഏറെയായിരുന്നു. സൂപ്പർലീഗ്​ കേരളയിൽ കാലിക്കറ്റ്​ എഫ്​.സിയെ കിരീടവിജയത്തിലേക്ക്​ നയിച്ച പരിചയസമ്പന്നനായ സ്റ്റാർ സ്​ട്രൈക്കർ ഗനി അഹമ്മദ്​ നിഗത്തിനേറ്റ പരിക്കും ടീമിനെ വലച്ചു. ഒടുവിൽ ഫൈനലിൽ പ്രതിരോധ താരം മനോജിന്‍റെ അസാന്നിധ്യം തീർത്ത വിടവാണ് ബംഗാളിന് ആക്രമണത്തിന് വഴിയൊരുക്കിയത്.

മംഗളൂരു യേനപോയ സർവകലാശാലയുടെ ഫുട്​ബാൾ കോച്ചായ ബിബി തോമസ്​ സൂപ്പർ ലീഗ്​ കേരളയിൽ കാലിക്കറ്റ്​ എഫ്​.സിയുടെ സഹ പരിശീലകനായിരുന്നു. 2021-22 സീസണിൽ മലപ്പുറം മഞ്ചേരിയിൽ നടന്ന സന്തോഷ്​ ട്രോഫിയിൽ കർണാടക ടീമിനെ പരിശീലിപ്പിച്ച അദ്ദേഹം ടീമിനെ സെമി ഫൈനലിലെത്തിച്ചു. സെമിയിൽ കേരളത്തോട്​ തോറ്റാണ്​ കർണാടക പുറത്തായത്​.