68 വയതിനിലെ.....

പാലാ: പട്ടിണി വേട്ടയാടിയ കുഞ്ഞുനാളുകൾ, 14-ാം വയസ്സിൽ വിവാഹം, ചെറുപ്രായത്തിൽ അസുഖം ബാധിച്ച്​ വിടപറഞ്ഞ കുഞ്ഞോമനകൾ... വിധിയുടെ കരിനിഴൽ തളർത്തിയ സഫിയുമ്മയുടെ ഭൂതകാലത്തിന്‍റെ ഓർമകളാണിവ. കാലം കുതിക്കുന്നതിന്​ പിന്നാലെ തന്‍റെ വ്യസനങ്ങൾ മറന്ന്​ ട്രാക്കിൽ സജീവമായതോടെ 68കാരിയായ കണ്ണൂർ ധർമ്മടം സ്വദേശിനി സഫിയ ചിറമ്മലിന്‍റെ ജീവിതം ടോപ്​ഗിയറിലായി. സേലത്ത്​ സ്ഥിരതാമസമാക്കിയ സഫിയ തിരുവനന്തപുരത്തിന്​ വേണ്ടിയാണ്​ മത്സരിച്ചത്​. 65 പ്ലസ്​ കാറ്റഗറിയിൽ സ്ത്രീകളുടെ വിഭാഗത്തിൽ ഡിസ്ക്​ത്രോയിൽ ഒന്നാംസ്ഥാനവും മൂന്ന്​ കിലോമീറ്റർ നടത്തത്തിൽ രണ്ടാംസ്ഥാനവും സഫിയ നേടി.

സേലത്ത്​ മെഡിക്കൽ വിദ്യാർഥിനികൾ താമസിക്കുന്ന ഹോസ്റ്റലിന്‍റെയും കാന്‍റീനിന്‍റെയും നടത്തിപ്പുകാരിയാണ്​ സഫിയ. സ്കൂളിൽനിന്ന്​ ലഭിക്കുന്ന ഉച്ചഭക്ഷണത്തിനായി നാലാംക്ലാസ്​ പൂർത്തിയാക്കിയ സഫിയുമ്മ പത്രങ്ങളിലെയും മറ്റും അക്ഷരങ്ങൾ മറ്റുള്ളവരോട്​ ചോദിച്ച്​ മനസ്സിലാക്കിയാണ്​ വായിക്കാൻ പഠിച്ചത്​. എണ്ണിപ്പെറുക്കിയാണ്​ വായിക്കുന്നതെങ്കിലും സഫിയുമ്മ ഏറെ സംസാരപ്രിയയാണ്​.

തളിപ്പറമ്പിലെ ഗവ.ഹോമിയോ ആശുപത്രിയിലെ ജീവനക്കാരിയായിരുന്ന സഫിയ തന്‍റെ റിട്ടയർമെന്‍റിന്​ ശേഷമാണ്​ വെറ്ററൻസ്​ അത്​​ലറ്റിക്​ മീറ്റുകളിൽ സ്ഥിരസാന്നിധ്യമാകുന്നത്​. അന്താരാഷ്ട്രതലത്തിൽ ചൈനയിലെും സിംഗപ്പൂരിലെയും ട്രാക്കുകളിൽ അഞ്ച്​ കിലോ മീറ്റർ, 10 കിലോമീറ്റർ നടത്ത മത്സരങ്ങളിൽ പ​ങ്കെടുത്ത്​ തന്‍റെ സാന്നിധ്യമറിയിച്ചിട്ടുണ്ട്​ ഇവർ. മുഹമ്മദാലിയാണ്​ ഭർത്താവ്​. ഏറെ ദുരിതമനുഭവിച്ച തന്‍റെ മാതാവ്​ ഇനിയുള്ള കാലങ്ങളിൽ സ്വന്തം ചിറകിൽപറക്കുന്ന കാഴ്​ചക്കായി സപ്പോർട്ടുമായി മക്കളും സഫിയുമ്മക്കൊപ്പമുണ്ട്​. ​