വിജയിയായി പക്വിയാവോ പടിയിറങ്ങി

ലാസ്വെഗാസ്: ഇടിക്കൂട്ടിലെ മറ്റൊരു സൂപ്പര്‍താരംകൂടി ഗ്ളൗസ് അഴിച്ച് പടിയിറങ്ങി. 21 വര്‍ഷത്തെ പ്രഫഷനല്‍ ബോക്സിങ് കരിയറിന് ജയത്തോടെ അന്ത്യംകുറിച്ച് ഫിലിപ്പീന്‍സുകാരനായ മാനി പക്വിയാവോ റിങ്ങിനോട് വിടപറഞ്ഞു. യാത്രയയപ്പ് മത്സരത്തില്‍ ടിം ബ്രാഡ്ലെയെ 116-110 മാര്‍ജിനില്‍ ഇടിച്ചുവീഴ്ത്തിയാണ് എട്ട് ഡിവിഷന്‍ ലോകചാമ്പ്യനായ പക്വിയാവോ ഇടിക്കൂട്ടിലെ പോരാട്ടം മതിയാക്കിയത്. ഇനി ഫിലിപ്പീന്‍സിലെ രാഷ്ട്രീയ പോരാട്ടച്ചൂടിലേക്കുള്ള അരങ്ങേറ്റം. അടുത്തമാസത്തെ സെനറ്റ് തെരഞ്ഞെടുപ്പില്‍ പുതിയ കരിയറില്‍ കുപ്പായമണിയും.