ദേശീയ ബീച്ച് വോളി വനിതാ കിരീടം കേരളത്തിന് 

കോഴിക്കോട്: 16ാമത് ദേശീയ ബീച്ച് വോളിബാള്‍ ചാമ്പ്യന്‍ഷിപ്പില്‍ വനിതാ വിഭാഗത്തില്‍ ആന്ധ്രപ്രദേശിനെ ഒന്നിനെതിരെ രണ്ടു സെറ്റുകള്‍ക്ക് പരാജയപ്പെടുത്തി ആതിഥേയരായ കേരളം ചാമ്പ്യന്മാരായി. കേരളത്തിന്‍െറ കെ.പി. ആതിര, മേരി അമിഷ എന്നിവരടങ്ങിയ ടീമാണ് ആവേശകരമായ മത്സരത്തിനൊടുവില്‍ കിരീടമണിഞ്ഞത്. സ്കോര്‍: 20-22, 27-25, 15-10. പുരുഷവിഭാഗം ഫൈനലില്‍ തമിഴ്നാടിനെ നേരിട്ടുള്ള സെറ്റുകള്‍ക്ക് പരാജയപ്പെടുത്തി തെലങ്കാന ചാമ്പ്യന്മാരായി. തെലങ്കാനയുടെ പി. കൃഷ്ണ ചൈതന്യ, എസ്. രവീന്ദ്ര റെഡ്ഡി എന്നിവരാണ് തമിഴ്നാടിന്‍െറ ശിവബാലന്‍-ദാമോദരന്‍ സഖ്യത്തെ 21-15, 21-19 എന്ന സ്കോറിന് പരാജയപ്പെടുത്തിയത്. ആന്ധ്രപ്രദേശിന്‍െറ മഹേശ്വരി-മഹാലക്ഷ്മി ടീമിനെയാണ് കേരളത്തിന്‍െറ വനിതാ ടീം ഫൈനലില്‍ പരാജയപ്പെടുത്തിയത്.