തോൽവിയറിയാതെ വിജേന്ദർ; തുടര്‍ച്ചയായ ആറാം ജയം

ബോള്‍ട്ടന്‍: പ്രഫഷനല്‍ ബോക്സിങ്ങില്‍ ഇന്ത്യയുടെ വിജേന്ദര്‍ സിങ്ങിന് തുടര്‍ച്ചയായ ആറാം ജയം. പോളണ്ട് താരം ആന്ദ്രെ സോള്‍ദ്രയെയാണ് വിജേന്ദര്‍ ഇത്തവണ ഇടിച്ചിട്ടത്. വിജേന്ദര്‍ ഇതുവരെ നേരിട്ടതില്‍ ഏറ്റവും കരുത്തനായ എതിരാളിയായിരുന്നു സോള്‍ദ്ര. എന്നാല്‍, എട്ടു റൗണ്ട് മത്സരത്തില്‍ മൂന്നു റൗണ്ട് പിന്നിട്ടപ്പോഴേക്കും സോള്‍ദ്ര തോല്‍വി സമ്മതിച്ചു. ഒളിമ്പിക്സ് മെഡല്‍ ജേതാവായ വിജേന്ദര്‍ പ്രഫഷനല്‍ രംഗത്തേക്ക് തിരിഞ്ഞതിനുശേഷം തോല്‍വിയറിഞ്ഞിട്ടില്ല. ജൂണില്‍ ഡല്‍ഹിയില്‍ നടക്കുന്ന ഏഷ്യാ ബെല്‍റ്റ് പോരാട്ടമാണ് അടുത്ത മത്സരം. വിജേന്ദറിന്‍െറ ഇന്ത്യയിലെ ആദ്യ പ്രഫഷനല്‍ മത്സരമാണിത്. എതിരാളിയാരെന്ന് തീരുമാനമായിട്ടില്ല.