ജര്‍മന്‍ ഓപണ്‍: ശ്രീകാന്തും കശ്യപും രണ്ടാം റൗണ്ടില്‍

മ്യൂണിക്: ജര്‍മന്‍ ബാഡ്മിന്‍റണ്‍ ഓപണില്‍ ഇന്ത്യയുടെ കെ. ശ്രീകാന്ത്, പി. കശ്യപ് എന്നിവര്‍ രണ്ടാം റൗണ്ടില്‍ പ്രവേശിച്ചു. ജപ്പാന്‍താരം തകുമ ഉവേദയെ തോല്‍പിച്ചാണ് ശ്രീകാന്ത് ഒന്നാം റൗണ്ട് പിന്നിട്ടത്. സ്കോര്‍: 12-21, 21-18, 21-11. നെതര്‍ലന്‍ഡ്സ് താരം എറിക് മെയ്ജസാണ് രണ്ടാം റൗണ്ടില്‍ ശ്രീകാന്തിന്‍െറ എതിരാളി. യുക്രെയ്ന്‍ താരം ആര്‍ടെം പോക്തരേവിനെ നേരിട്ടുള്ള സെറ്റുകള്‍ക്ക് തോല്‍പിച്ചാണ് കശ്യപ് മുന്നേറിയത് (21-9, 21-9). ഐറിഷ് താരം ജോഷ്വാ മഗിയായിരിക്കും അടുത്ത റൗണ്ടില്‍ എതിരാളി. ഇന്ത്യന്‍ യുവതാരം സമീര്‍ വെര്‍മയും രണ്ടാം റൗണ്ടില്‍ പ്രവേശിച്ചു. ദിമിത്രോ സവാഡ്സ്കിയെ തോല്‍പിച്ചാണ് സമീര്‍ മുന്നേറിയത് (21-8, 21-8). മറ്റൊരു ഇന്ത്യന്‍താരം കൗശല്‍ ധര്‍മമര്‍ ഒന്നാം റൗണ്ടില്‍ തോറ്റു പുറത്തായി.