ആസ്​ട്രേലിയൻ സൂപ്പർ സീരീസ്​ ബാഡ്​മിൻറൺ: ​ശ്രീകാന്ത്​ സെമിയിൽ​; സിന്ധു, സൈന വീണു

സിഡ്​നി: ആസ്​ട്രേലിയൻ സൂപ്പർ സീരീസ്​ ബാഡ്​മിൻറൺ ചാമ്പ്യൻഷിപ്പിൽ ഇന്ത്യയുടെ കിദംബി ശ്രീകാന്ത്​ സെമിഫൈനലിൽ കടന്നു. ഇന്ത്യൻ ക്വാർട്ടർ ഫൈനലിൽ സായ്​ പ്രണീതിനെ നേരിട്ടുള്ള സെറ്റുകളിൽ കീഴടക്കിയായിരുന്നു ശ്രീകാന്തി​​െൻറ മുന്നേറ്റം. സ്​കോർ: 25-23, 21-17. അതേസമയം, വനിത വിഭാഗത്തിൽ ഇന്ത്യൻ പോരാട്ടം ക്വാർട്ടറിൽ അവസാനിച്ചു. നിലവിലെ ജേത്രി സൈന നെഹ്​വാളും ഒളിമ്പിക്​ വെള്ളി മെഡൽ ജേത്രി പി.വി. സിന്ധുവും സെമി കാണാതെ പുറത്തായി. 
ഇന്തോനേഷ്യൻ ഒാപൺ ​േജതാവ്​ ശ്രീകാന്തും സിംഗപ്പൂർ ഒാപൺ ജേതാവ്​ പ്രണീതും തമ്മിലുള്ള മത്സരം നേരിട്ടുള്ള സെറ്റുകളിൽ തീർന്നെങ്കിലും പോരാട്ടം ഏകപക്ഷീയമായിരുന്നില്ല.

കഴിഞ്ഞറൗണ്ടിൽ ലോക ഒന്നാം നമ്പർ താരം ദക്ഷിണ കൊറിയയുടെ സൺ വാൻ ഹോയെ മലർത്തിയടിച്ചെത്തിയ ലോക 11ാം നമ്പറുകാരനായ ശ്രീകാന്ത്​ തുടക്കത്തിൽ 4-1ന്​ പിറകിലായെങ്കിലും തിരിച്ചടിച്ച്​​ 11-10ന്​ മുന്നിലെത്തി. തുടർന്ന്​ ഇഞ്ചോടിഞ്ച്​​ പോരാട്ടമായിരുന്നു. 20-17ൽ സെറ്റ്​ പോയൻറിലെത്തിയ ശ്രീകാന്തിനെ അവിടെ നിർത്തി പ്രണീത്​ തുടർച്ചയായ നാലു പോയൻറുമായി 21^20ന്​ മുന്നിലെത്തി. എന്നാൽ, തിരിച്ചുവന്ന ശ്രീകാന്ത്​ ഒടുവിൽ 25-23ന്​ സെറ്റ്​ സ്വന്തമാക്കി. രണ്ടാം സെറ്റിലും  4-1ന് മുന്നിലെത്തിയ പ്രണീതിനെതിരെ 11-9ന്​ മുൻതൂക്കം ​േനടിയ ശ്രീകാന്ത്​ പിന്നീട്​ എതിരാളിക്ക്​ കാര്യമായ അവസരം നൽകാതെ 21-17ന്​ സെറ്റും മത്സരവും കരസ്​ഥമാക്കുകയായിരുന്നു. സെമിയിൽ ചൈനയുടെ ലോക നാലാം നമ്പറുകാരൻ ഷീ യുഖി ആണ്​ ശ്രീകാന്തി​​െൻറ എതിരാളി. ഡെന്മാർക്കി​​െൻറ ഹാൻസ്​ ക്രിസ്​റ്റ്യൻ വിറ്റിംഗസിനെ 21-17, 21-12നാണ്​ ഷീ യുഖി തോൽപിച്ചത്​. 

വനിത വിഭാഗത്തിൽ സിന്ധുവും സൈനയും മൂന്നു സെറ്റ്​ പോരാട്ടങ്ങളിലാണ്​ അടിയറവ്​ പറഞ്ഞത്​. ലോക ഒന്നാം നമ്പർ താരം ചൈനീസ്​ തായ്​പേയിയുടെ തായ്​ സു യിങ്ങിനെതിരെ ആദ്യ സെറ്റ്​ കരസ്​ഥമാക്കുകയും രണ്ടാം സെറ്റിൽ മാച്ച്​ പോയൻറിലെത്തുകയും ചെയ്​ത ശേഷമായിരുന്നു സിന്ധുവി​​െൻറ തോൽവി. സ്​കോർ: 21-10, 2022, 16-21. തുടക്കത്തിൽ  8-7നും പിന്നീട്​ 13-7നും മുന്നിലെത്തിയ സിന്ധു അനായാസം ആദ്യ സെറ്റ്​ നേടി. രണ്ടാം സെറ്റിൽ സിന്ധു 11-8 ന്​ ലീഡെടുത്തെങ്കിലും തിരിച്ചുവന്ന സു യിങ്​ 16-13ന്​ മുന്നിലെത്തി.

എന്നാൽ, മികച്ച പോരാട്ടം നടത്തിയ ഇന്ത്യക്കാരി 20-19 മുൻതൂക്കവുമായി മാച്ച്​ പോയൻറിലെത്തി. പക്ഷേ മികച്ച രണ്ട്​ വിന്നറുകളിലൂടെ സെറ്റ്​ പിടിച്ച സു യിങ്​ മത്സരം മൂന്നാം സെറ്റിലേക്ക്​ നീട്ടി. നിർണായകമായ അവസാന സെറ്റിൽ 8-4നും 14-10നും സിന്ധു ലീഡ്​ ചെയ്​തെങ്കിലും അവസരത്തിനൊത്തുയർന്ന ലോക ഒന്നാം നമ്പർ താരത്തിനെതിരെ പിടിച്ചുനിൽക്കാനാവാതെ 16-21ന്​ സെറ്റും മത്സരവും അടിയറ വെച്ചു. കഴിഞ്ഞവർഷത്തെ ഫൈനലിസ്​റ്റുകളുടെ പോരാട്ടത്തിൽ ചൈനയുടെ സുൻ യൂവിനോട്​ 17-21, 21-10, 17-21 തോറ്റാണ്​ സൈന പുറത്തായത്​. ആദ്യ സെറ്റ്​ നഷ്​ടമായശേഷം രണ്ടാം സെറ്റ്​ പിടിച്ചെങ്കിലും നിർണായകമായ മൂന്നാം സെറ്റിൽ സൈനക്ക്​ അടിപതറുകയായിരുന്നു.