വിജയ് ഹസാരെ ട്രോഫി കേരളത്തിന് തോല്‍വി

ബംഗളൂരു: വിജയ് ഹസാരെ ട്രോഫി ക്രിക്കറ്റ് മത്സരത്തില്‍ ഗ്രൂപ് ബിയിലെ മത്സരത്തില്‍ ഝാര്‍ഖണ്ഡിനെതിരെ കേരളത്തിന് തോല്‍വി. അഞ്ച് വിക്കറ്റിനാണ് കേരളം പരാജയപ്പെട്ടത്. മൂന്നാമത്തെ മത്സരത്തില്‍ കേരളത്തിന്‍െറ രണ്ടാമത്തെ തോല്‍വിയാണിത്. സ്കോര്‍: കേരളം 50 ഓവറില്‍ എട്ടിന് 236. ഝാര്‍ഖണ്ഡ്  47 ഓവറില്‍ അഞ്ചിന് 240.
ടോസ് ലഭിച്ച ഝാര്‍ഖണ്ഡ് കേരളത്തെ ബാറ്റിങ്ങിനയക്കുകയായിരുന്നു. മോശം ഫോം തുടരുന്ന ഓപണര്‍ മുഹമ്മദ് അസ്ഹറുദ്ദീന്‍ സ്കോര്‍ ബോര്‍ഡ് രണ്ടക്കം കടക്കും മുമ്പേ കൂടാരം കയറി. സഞ്ജു വി. സാംസണ്‍ പിന്നെയും നിരാശപ്പെടുത്തി.കഴിഞ്ഞ മത്സരത്തില്‍ സെഞ്ച്വറി നേടി ടീമിനെ വിജയത്തിലേക്ക് നയിച്ച വി.എ. ജഗദീശിനും (60), ക്യാപ്റ്റന്‍ സചിന്‍ ബേബിക്കും (61) മാത്രമാണ് കേരളനിരയില്‍ ചെറുത്തു നില്‍ക്കാനായുള്ളൂ. ഝാര്‍ഖണ്ഡിന്‍െറ സൗരഭ് തിവാരി (87) കേരളത്തിന്‍െറ പ്രതീക്ഷകള്‍ തല്ലിക്കെടുത്തി. ഇന്ത്യന്‍ ക്യാപ്റ്റന്‍ മഹേന്ദ്ര സിങ് ധോണി (18) എളുപ്പം മടങ്ങിയിരുന്നു.