വീണ്ടും വീരാട​ സെഞ്ച്വറി; ​ദക്ഷിണാഫ്രിക്കക്ക്​ 304 റൺസ് വിജയ ലക്ഷ്യം

കേപ്​ടൗൺ: നായകൻ വിരാട്​ കോഹ്​ലിയുടെ അപരാജിത സെഞ്ച്വറിയുടെ (160) മികവിൽ മൂന്നാം ഏകദിനത്തിൽ ഇന്ത്യക്ക്​ മികച്ച സ്​കോർ. സന്ദർശകരുടെ ബാറ്റിങ്​ അവസാനിച്ചപ്പോൾ ദക്ഷിണാഫ്രിക്കക്ക്​ ജയിക്കാൻ 304 റൺസ്​ വേണം. തുടക്കത്തിൽ  റബദെയുടെ പന്തിൽ കോഹ്​ലി എൽബിയിൽ കുടുങ്ങിയത്​ അംപയർ ഒൗട്ട്​ വിധിച്ചിരുന്നു. റിവ്യൂവിലൂടെ തിരിച്ച്​ വന്ന കോഹ്​ലി പിന്നീട്​ ദക്ഷിണാഫ്രിക്കയുടെ അന്തകനാകുന്ന കാഴ്​ചയാണ്​ കണ്ടത്​. ഒാപണർ ശിഖർ ധവാ​​​​​െൻറയും (76) കോഹ്​ലിയുടെയും പ്രകടനമാണ്​ ചെറിയ സ്​കോറിന്​ ഒതുങ്ങുമായിരുന്ന ഇന്ത്യയെ കൂറ്റൻ സ്​കോറിലെത്തിച്ചത്​. സ്​കോർ: ഇന്ത്യ 303/6 

ടോസ്​ നഷ്​ടമായി ബാറ്റിങ്ങിനിറങ്ങിയ ഇന്ത്യക്ക്​ റൺസൊന്നുമെടുക്കാതെ രോഹിത്​ ശർമയെയാണ്​​ തുടക്കത്തിൽ തന്നെ നഷ്​ടമായത്​. പേസർ കഗിസൊ റബദെയാണ്​ ശർമയെ തിരിച്ചയച്ചത്​​. തുടർന്ന്​ ഒത്ത്​ ചേർന്ന കോഹ്​ലി ധവാൻ കൂട്ടു​കെട്ട്​​ ഇന്ത്യയെ മികച്ച സ്​കോർ പടുത്തുയർത്താൻ സഹായിച്ചു​. എന്നാൽ സ്​കോർ 140 നിൽകെ ജെ.പി ഡ്യുമിനിയുടെ പന്തിൽ ​െഎഡൻ മാക്രമിന്​ ക്യാച്ച്​ നൽകി ധവാൻ മടങ്ങിയത്​ ഇന്ത്യക്ക്​ ക്ഷിണമായി. തുടർന്ന്​ വന്ന അജിൻക്യ രഹാനെ (11) ഹർദ്ദിക്​ പാണ്ഡ്യ(14) എന്നിവരും എളുപ്പം പുറത്തായി. എം.എസ്​ ധോനിയും കേദർ ജാഥവും പിടിച്ചു നിന്നില്ല. ദക്ഷിണാഫ്രിക്കക്ക്​ വേണ്ടി ജെ.പി ഡ്യുമിനി രണ്ട്​ വിക്കറ്റുകളെടുത്തു.  കഗിസൊ റബദെ, ക്രിസ്​ മോറിസ്​, ഇമ്രാൻ താഹിർ എന്നിവർ ഒാരോ വിക്കറ്റുകളുമെടുത്തു. 

ആദ്യ രണ്ട്​ ഏകദിനങ്ങളിലേറ്റ പരാജയത്തിന്​ മറുപടി നൽകാൻ കേപ്​ടൗണിൽ ഇറങ്ങിയ ദക്ഷിണാഫ്രിക്ക ടോസ്​ നേടി ബൗളിങ്​ തിരഞ്ഞെടുക്കുകയായിരുന്നു. ആദ്യ ഏകദിനത്തിൽ സെഞ്ച്വറി നേടിയ നായകൻ ഡുപ്ലെസിസി​​​​​െൻറ അഭാവത്തിൽ തന്നെയാണ്​ ഇന്നും ദക്ഷിണാഫ്രിക്ക ഇറങ്ങിയത്​. ക്വിൻറിൻ ഡികോക്കും ഇന്ന്​ കളിക്കില്ല. അതേ സമയം ലുങ്കി എംഗിഡി, ഹൈൻറിച്ച്​ ക്ലാസെൻ എന്നിവരുടെ ആദ്യ ഏകദിന മത്സരമാണ്​ ഇന്നത്തെത്​.