ഇന്ത്യൻ ബൗളിങ് ആക്രമണത്തിൽ വീണു; പാകിസ്താന് എട്ടു വിക്കറ്റ് തോൽവി

ദുബൈ: ഭൂഖണ്ഡം കാത്തിരുന്ന അയൽക്കാരുടെ ആവേശപ്പോരിൽ ഇന്ത്യൻ വിജയഗാഥ. ഭുവനേശ്വർ കുമാറും കേദാർ ജാദവും പന്തുകൊണ്ടും അതിവേഗ അർധസെഞ്ചുറിയുമായി രോഹിതും കളംനിറഞ്ഞ ഏഷ്യാകപ്പ്​ ക്രിക്കറ്റിലെ ഗ്രൂപ്​ എ മത്സരത്തിൽ പാകിസ്താനെ എട്ട്​ വിക്കറ്റിനാണ്​ ഇന്ത്യ വീഴ്​ത്തിയത്​. സ്​കോർ പാകിസ്​താൻ 43.1 ഒാവറിൽ 162 റൺസ്​. ഇന്ത്യ 29 ഒാവറിൽ രണ്ടു വിക്കറ്റിന്​ 164.

ശരാശരി സ്​കോർ പിന്തുടർന്ന്​ ബാറ്റിങ്ങിനിറങ്ങിയ ഇന്ത്യൻ ഒാപണർമാർ അനായാസമാണ്​ ​ബാറ്റുവീശിയത്​. മുഹമ്മദ്​ ആമിർ നയിച്ച പാക്​ ബൗളിങ്ങിനെ തെല്ലും കൂസാതെ പന്ത്​ തലങ്ങും വിലങ്ങും പായിച്ച്​ അതിവേഗം അർധസെഞ്ചുറി തികച്ച്​ ക്യാപ്​റ്റൻ രോഹിത്​ ശർമയും ഉറച്ച പിന്തുണയുമായി ശിഖർ ധവാനും കളംനിറഞ്ഞപ്പോൾ ഇന്ത്യൻ വിജയത്തിന്​ അതിവേഗമായി. ശദാബി​​െൻറ ഗൂഗ്​ളിയിൽ ആദ്യം​ രോഹിതും തൊട്ടുപിറകെ ഫഹീം അഷ്​റഫി​​െൻറ പന്തിൽ 46 റൺസുമായി ധവാനും വീണെങ്കിലും തുടർന്നുവന്ന അംബാട്ടി റായ്​ഡുവും മുരളി കാർത്തികും ഇന്ത്യയെ കരക്കെത്തിച്ചു. റായ്​ഡുവും കാർത്തികും 31 വീതം റൺസുമെടുത്തു.

ഇമാം ഉൾ ഹഖിൻെറ വിക്കറ്റ് നേട്ടം ഭുവനേശ്വർ കുമാർ ആഘോഷിക്കുന്നു

നേരത്തേ, പ്രമുഖർക്ക്​ വിശ്രമംനൽകി ദുർബലരായ ഹോ​േങ്കാങ്ങിനെതിരെ അങ്കം ജയിച്ച ആത്മവിശ്വാസവുമായാണ്​ പാകിസ്​താനെതിരെ ഇന്ത്യ ‘അയൽപക്ക യുദ്ധ’ത്തിന്​ ദുബൈ ക്രിക്കറ്റ്​ സ്​റ്റേഡിയത്തിൽ ഇറങ്ങിയത്​. ടോസ്​ നേടി ബാറ്റിങ്​ തെരഞ്ഞെടുത്ത പാകിസ്​താന്​ പക്ഷേ, ചുവടുറപ്പിക്കും മുമ്പ്​ ആദ്യമുനയൊടിഞ്ഞു. സ്​കോർ ബോർഡിൽ മൂന്ന്​ റൺസ്​ ചേർക്കു​േമ്പാഴേക്ക്​ ഒാപണിങ്​ ബാറ്റ്​സ്​മാന്മാരായ ഇമാമുൽ ഹഖിനെയും ഫഖർ സമാനെയും ഭുവനേശ്വർ കുമാർ മടക്കി. പിന്നീട്​ വന്ന ബാബർ അഅ്​സമും ക്യാപ്​റ്റൻ ശു​െഎബ്​ മാലികും പിടിച്ചുനിന്നതോടെ പാക്​ ഇന്നിങ്​സിന്​ വീണ്ടും ജീവൻ വെച്ചുതുടങ്ങി. ബൗളർമാർ മാറിമാറി എത്തിയിട്ടും അനായാസം സ്​കോർബോർഡ്​ മുന്നോട്ടുനീങ്ങുന്നതിനിടെ 22ാം ഒാവറിൽ ബാബർ വീണു. കുൽദീപ്​ യാദവി​​െൻറ മൂർച്ചയേറിയ പന്തിൽ ബൗൾഡായ ബാബർ 62 പന്തിൽ 47 റൺസും ശു​െഎബ്​ മാലികുമൊത്ത്​ 82 റൺസി​​െൻറ മോശമല്ലാത്ത​ കൂട്ടുകെട്ടും തീർത്തായിരുന്നു കൂടാരം കയറിയത്​.

ഷുഹൈബ് മാലിക്കും ബാബർ അസമും റണ്ണിനായി ഒാടുന്നു

വീണ്ടും അപകടം മണത്ത പാക്​ ബാറ്റിങ്ങി​​െൻറ ഒരുവശത്ത്​ ശു​െഎബ്​ മാലിക്​ നങ്കൂരമി​െട്ടങ്കിലും പിന്നീടുവന്ന മൂന്നുപേരും രണ്ടക്കം കാണാതെ പവലിയനിൽ തിരിച്ചെത്തി​. ബൗണ്ടറി ലൈനിൽ ഉജ്ജ്വല ​ക്യാച്ചുമായി മനീഷ്​ പാ​ണ്ഡെ സർഫറാസിനെ മടക്കിയപ്പോൾ, കൃത്യത കാത്ത സ്​റ്റംപിങ്ങുമായി ഷദാബ്​ ഖാനെയും ക്യാച്ചെടുത്ത്​ ആസിഫ്​ അലിയെയും ധോണിയും മടക്കി. ദൗത്യം പാതിവഴിയിൽ നിർത്തി മുൻനിര മടങ്ങിയ പാക്​ ബാറ്റിങ്ങിനെ കരപിടിക്കാൻ സഹായിക്കുന്നതിൽ വാലറ്റം പരാജയമായത്​ ഇന്നിങ്​സ്​ എളുപ്പം അവസാനിപ്പിച്ചു. മധ്യനിരയെ കറക്കിവീഴ്​ത്തിയ ​േകദാർ ജാദവും മികച്ച പ്രകടനവുമായി കൂട്ടുനിന്ന ഭുവി, ബുംറ, കുൽദീപ്​ തുടങ്ങിയവരു​ം ഇന്ത്യൻ ബൗളിങ്ങി​​െൻറ തിരിച്ചുവരവി​​െൻറ ആഘോഷവുമായി.

മത്സരത്തിനിടെ പരിക്കേറ്റ ഹാർദിക്​ പാണ്ഡ്യയെ ഗ്രൗണ്ടിന് പുറത്തേക്ക് കൊണ്ടു പോകുന്നു

മനീഷ്​ പാണ്ഡ്യ മാജിക്​
ബൗളിങ്ങി​നിടെ നടുവിന്​ പരിക്കേറ്റ്​ മടങ്ങിയ ഹാർദികി​​െൻറ പകരക്കാരനായി മൈതാനത്തെത്തിയ മനീഷ്​ പാണ്ഡെ ബൗണ്ടറി ലൈനിൽ എടുത്ത മാജിക്​ ക്യാച്ചായിരുന്നു ബുധനാഴ്​ച ​ദുബൈയുടെ ഹൃദയം കവർന്നത്​​. അതിർത്തികടക്കുമെന്നുറപ്പിച്ച സർഫറാസി​​െൻറ നെടുനീളൻ ഷോട്ട്​ ചാടിപ്പിടിച്ച മനീഷ്​ നിയന്ത്രണം വിട്ട്​ ബൗണ്ടറി കടക്കുംമുമ്പ്​ പന്ത്​ മാനത്തേക്കെറിഞ്ഞും തിരിച്ചെത്തി ക്യാച്ച്​ പൂർത്തീകരിച്ചുമായിരുന്നു കാണികളെ ആവേശത്തിലാഴ്​ത്തിയത്​. തെന്നി വീണു പ​രിക്കേറ്റ ഹാർദികിനെ തൊട്ടുമുമ്പ്​ സ്​ട്രച്ചറിലാണ്​ മൈതാനത്തുനിന്ന്​ കൊണ്ടുപോയത്​.