സചിൻ പറയുന്നു; കൊറോണക്ക്​ ‘ടെസ്​റ്റ്​ ഡോസ്​’ ഉണ്ട്​

മുംബൈ: കൊറോണ ഭീഷണി മൂലം കായിക മേഖല പ്രതിസന്ധി നേരിടുന്ന പശ്​ചാത്തലത്തിൽ ക്രിക്കറ്റി​​െൻറ എക്കാലത്തെയ​ും ക്ല ാസിക്​ ഫോം ആയ ടെസ്​റ്റിൽ നിന്നും വൈറസ്​​ പ്രതിരോധത്തിന്​ പാഠങ്ങളുൾക്കൊള്ളാമെന്ന്​ മാസ്​റ്റർ ബ്ലാസ്​റ്റർ സചിൻ ടെണ്ടുൽക്കർ. കോവിഡ്​ ഭീഷണി നാൾക്കുനാൾ വർധിക്കുന്ന സാഹചര്യത്തിൽ കൊറോണ പ്രതിരോധത്തിന്​ ടെസ്​റ്റ്​ ക്രിക്കറ്റിൽ നിന്ന്​ സചിൻ കണ്ടെത്തിയ പ്രായോഗിക പാഠങ്ങൾ ആരാധകർ ഏറ്റെടുത്തിരിക്കുകയാണ്​. കൊറോണ വൈറസ്​ വ്യാപനത്തി​​െൻറ പശ്​ചാത്തലത്തിൽ കളിക്കളങ്ങൾ നിർജീവമായതുപോലൊരു പ്രതിസന്ധി ത​​െൻറ കരിയറിലൊരിക്കലും നേരിടേണ്ടി വന്നിട്ടില്ലെന്നും സചിൻ വ്യക്​തമാക്കുന്നു. ​െകാറോണയെ ‘ബൗണ്ടറി’ കടത്താനുള്ള സചിൻ ടിപ്​സ്​ ഇതൊക്കെയാണ്​.

ക്ഷമയുടെ വലിയ പാഠം

ക്ഷമയുടെ വലിയ പാഠമാണ്​ ടെസ്​റ്റ്​ ക്രിക്കറ്റ്​ പഠിപ്പിക്കുന്നത്​. പിച്ചി​​െൻറ അവസ്​ഥയോ പന്തുകളുടെ മാറുന്ന ഗതിയോ മനസ്സിലാകാതെ വരു​േമ്പാൾ ടെസ്​റ്റിലെ ഏറ്റവും വലിയ ആക്രമണമായി പ്രതിരോധം മാറുന്നു. നിങ്ങൾക്കു മനസ്സിലാകാത്ത കാര്യങ്ങളെ ക്ഷമയോടെ പ്രതിരോധിക്കാനുള്ള പാഠമാണ്​ ടെസ്​റ്റ്​ ക്രിക്കറ്റ്​ പകരുന്നത്​. കൊറോണ വൈറസിനെ പ്രതിരോധിക്കാൻ നമുക്കേറ്റവും അത്യാവശ്യം ഇതേ ക്ഷമയാണ്.

ടീം വർക്ക്​ പ്രധാനം

നിശ്​ചിത ഓവർ മത്സരങ്ങൾ, ഏകദിനമായാലും ട്വൻറി20 ആയാലും വ്യക്​തിഗത ​പ്രകടനങ്ങൾക്ക്​ ടീമിനെ ജയിപ്പിക്കാം. പക്ഷേ, ടെസ്​റ്റ്​ ക്രിക്കറ്റിൽ അങ്ങിനെയല്ല. അവിടെ ടീം വർക്കിനാണ്​ പ്രാധാന്യം.
ഒരു ബാറ്റ്സ്മാൻ എളുപ്പമുള്ള പന്തുകൾ മാത്രം നേരിടുകയും ബുദ്ധിമുട്ടുള്ള ബോളർ എത്തു​േമ്പാൾ കൂടെ നിൽക്കുന്ന താരത്തിന്​ സ്​ട്രൈക്ക്​ കൊടുക്കുകയും ചെയ്യുന്നെന്ന്​ കരുതുക. ആദ്യം പറഞ്ഞയാൾക്ക്​ കൂടുതൽ റൺസ് നേടാനായേക്കും. എന്നാൽ, ടീമിന്​ അത്​ ഗുണകരമാകില്ല. കൊറോണയെ നേരിട​ാനും ടീം വർക്ക്​ ആവശ്യമാണ്​. ​

ഈ പ്രശ്നം ഇപ്പോഴും ലോക രാജ്യങ്ങൾക്ക് പൂർണമായും മനസ്സിലാക്കാനായിട്ടില്ല. കൃത്യമായ സമയത്ത് പ്രതിരോധത്തിന് നടപടിയെടുക്കാത്ത രാജ്യങ്ങളിൽ വൈറസ് ക്രമാതീതമായി പടരുന്നുമുണ്ട്​. നമ്മുടെ സാമാന്യയുക്തിക്ക് നിരക്കാത്ത രീതിയിലാണ് കൊറോണയുടെ വ്യാപനമെന്നത്​ അംഗീകരിച്ച് അതിനെ പ്രതിരോധിക്കാനുള്ള നടപടികൾ കൈക്കൊള്ളണം. ഇക്കാര്യത്തിൽ നാം നമ്മെ മാത്രം ശ്രദ്ധിച്ചിട്ട് കാര്യമില്ല. ചുറ്റുമുള്ളവരെക്കൂടി പരിഗണിക്കണം.

തിരിച്ചുവരവ്​ സാധ്യം

തിരിച്ചുവരവുകളുടെ സാധ്യത ഏറെയുള്ള കളിയാണ്​ ടെസ്​റ്റ്​ ക്രിക്കറ്റ്​. ടെസ്​റ്റിൽ ഒരു രണ്ടാം ഇന്നിങ്സ് എപ്പോഴും നമ്മളെ കാത്തിരിക്കും. ഒന്നാം ഇന്നിങ്സിലെ പ്രകടനം മോശമായാലും അത്​ മറികടക്കാനുള്ള അവസരം രണ്ടാം ഇന്നിങ്സിൽ ലഭിക്കും. കൊറോണക്കെതിരായ പോരാട്ടം വിവിധ രാജ്യങ്ങളിൽ വ്യത്യസ്ത ഘട്ടങ്ങളിലാണ്. പക്ഷേ, ക്രിയാത്മകമായി സമീപിച്ചാൽ സ്വതസിദ്ധമായ ശൈലിയിൽ ഈ വൈറസിനെ വിജയകരമായി പ്രതിരോധിക്കാം. ഈ പോരാട്ടത്തിൽ ‘ഒരേ ടീമി​​െൻറ ഭാഗമാണ് എല്ലാ രാജ്യങ്ങളു’മെന്ന മനോഭാവമാണ് വേണ്ടത്. ഇതിനായി പരസ്പരം സംസാരിക്കാനും പ്രചോദിപ്പിക്കാനും പിന്തുണക്കാനും നമ്മൾ തയാറാകണം. ഇന്ന്​ അൽപം മോശം ആണെങ്കിലും കൂടുതൽ കരുത്തോടെ കൂട്ടുകെട്ടു തുടർന്ന്​ അടുത്ത ദിവസം തിരിച്ചെത്തണം.

അനാവശ്യ ഷോട്ടുകൾ ഒഴിവാക്കണം

അനാവ​ശ്യ ഷോട്ടുകളും റ​ണ്ണും എടുക്കാനുള്ള ശ്രമങ്ങൾ കളിയെ ദോഷമായി ബാധിക്കും. അതുപോലെ ഈ സമയത്ത്​ അനാവശ്യ യാത്രകളും ഒത്ത​ുചേരലുകളും നമ്മൾ ഒഴിവാക്കണം. ഡോക്ടർമാരുടെയും നഴ്സുമാരുടെയും ആരോഗ്യപ്രവർത്തകരുടെയും ജോലിഭാരം ലഘൂകരിക്കാനുള്ള ബാധ്യത നമുക്കുണ്ട്​. അനാവശ്യ യാത്രകളും ഒത്തുചേരലുകളും ഒഴിവാക്കിയാൽ പരിശോധിക്കേണ്ട ആളുകളുടെ എണ്ണം കുത്തനെ കുറയ്ക്കാൻ കഴിയും. ഒരാൾ മാത്രമല്ല, എല്ലാവരും ശുചിത്വം പാലിച്ചാലേ വൈറസ് വ്യാപനത്തിന് തടയിടാനാകൂ.
ആരോഗ്യരംഗത്തെ വിദഗ്ധർ നൽകുന്ന മുന്നറിയിപ്പുകളും നിർദേശങ്ങളും പാലിക്കാൻ തയാറാകണം. ടെസ്​റ്റ്​ ക്രിക്കറ്റിലേതുപോലെ, ഓരോ ഇന്നിങ്​സുകളിലായി ഈ വൈറസിനെ നമുക്ക്​ നേരിടാം. ഒടുവിൽ വിജയിക്കാം.