ബൗച്ചറും സ്​മിത്തും കളമൊരുക്കും; ഡിവില്ലേഴ്​സ്​ മടങ്ങി വരുന്നു?

ജൊഹന്നാസ്​ബർഗ്​: ലോകമെമ്പാടുമുള്ള ക്രിക്കറ്റ്​ പ്രേമികളുടെ കണ്ണിന്​ വിരുന്നൂട്ടാൻ എ.ബി ഡിവില്ലേഴ്​്​സ്​ വീണ്ടും വരുമെന്ന്​ സൂചനകൾ. ദക്ഷിണാഫ്രിക്കയുടെ ശ്രീലങ്കൻ പര്യടനത്തിലെ ട്വൻറി 20 പരമ്പരയിൽ ഡിവില്ലേഴ്​സിന്​ ഇട ം ലഭിക്കുമെന്നും അഭ്യൂഹങ്ങളുണ്ട്​. 2018 മാർച്ചിലാണ്​ വലിയ ആരാധക പിന്തുണയുള്ള എ.ബി.ഡി അന്താരാഷ്​ട്ര ക്രിക്കറ്റിന ോട്​ വിട പറഞ്ഞത്​.

മികച്ച ഫോമിലുള്ള ഡിവില്ലേഴ്സ്​ സന്നദ്ധതയറിയിക്കുകയും പ്രാപ്​തനാണെന്ന്​ തെളിയിക്കുകയും ചെയ്​താൽ ട്വൻറി 20 ലോകകപ്പിലേക്ക്​ പരിഗണിക്കുമെന്ന്​ ദക്ഷിണാഫ്രിക്കൻ പരിശീലകൻ മാർക്ക്​ ബൗച്ചർ ഒരു ചടങ്ങിനിടെ പ്രസ്​താവിച്ചതോടെയാണ്​ അഭ്യൂഹങ്ങൾ ശക്തമായത്​. ജൂൺ 1ന്​ മുമ്പായി ഡിവില്ലേഴ്​സ്​, ഇമ്രാൻ താഹിർ, ക്രിസ്​ മോറിസ്​ എന്നിവർക്ക്​ അന്തിമ തീരുമാനമെടുക്കാൻ സമയം നൽകിയിട്ടുണ്ടെന്നും ബൗച്ചർ​ പറഞ്ഞു.

ഡിവില്ലേഴ്​സിന്​ താൽപര്യമുണ്ടെങ്കിൽ അദ്ദേഹത്തെ ​ട്വൻറി 20ലോകകപ്പിന്​ പരിഗണിക്കുമെന്ന്​ ബൗച്ചർ​ മുമ്പും പറഞ്ഞിരുന്നു. ഡിവില്ലേഴ്​സിനെ തിരിച്ചുവിളിക്കുന്നതിൽ ഈഗോയുടെ പ്രശ്​നമില്ലെന്നും ട്വൻറി 20 ലോകകപ്പിന്​ ഏറ്റവും മികച്ച ടീമിനെ അയക്കാനാണ്​ ശ്രമിക്കുന്നതെന്നും ബൗച്ചർ അറിയിച്ചിരുന്നു. പഴയ സഹതാരങ്ങളായ മാർക്ക്​ ബൗച്ചർ പരിശീലകനും ഗ്രെയിം സ്​മിത്ത്​ ദക്ഷിണാഫ്രിക്കയുടെ ക്രിക്കറ്റ്​ ഡയറക്​ടറുമായതിനാൽ ഡിവില്ലേഴ്​സിനും താൽപര്യമുണ്ടെന്ന്​​​ ​റിപ്പോർട്ടുകളുണ്ട്​.

കരിയറിൽ മികച്ച ഫോമിൽ നിൽക്കെ 34ാം വയസ്സിൽ ഡിവില്ലേഴ്​സ്​ വിരമിക്കൽ പ്രഖ്യാപിച്ചത്​ അവിശ്വസനീയതയോടെയാണ്​ ക്രിക്കറ്റ് ​ലോകം ശ്രവിച്ചത്​. ദേശീയ ടീമിൽ നിന്നും വിരമിച്ച ശേഷവും ഐ.പി.എൽ, വിറ്റലിറ്റി ബ്ലാസ്​റ്റ്​, ബിഗ്​ബാഷ്​ എന്നിവയിൽ സജ്ജീവമായിരുന്നു. ബിഗ്​ബാഷിലും വിറ്റലിറ്റി ബ്ലാസ്​റ്റിലും എ.ബി.ഡി മികച്ച പ്രകടനങ്ങൾ പുറത്തെടുത്തിരുന്നു. ഏകദിന ലോകകപ്പിൽ സെമികാണാതെ പുറത്തായതോടെ എ.ബി.ഡിയെ തിരിച്ചുവിളിക്കണമെന്ന്​ അഭിപ്രായം ഉയർന്നിരുന്നു.