ലങ്കാദഹനം പൂർണം; ട്വൻറി 20യിലും ഇന്ത്യക്ക്​ ജയം

കൊളംബോ: ടെസ്​റ്റിലും ഏകദിനത്തിലും തോറ്റമ്പിയശേഷം ആശ്വാസജയം തേടി ട്വൻറി20  മത്സരത്തിനിറങ്ങിയ ലങ്കക്ക്​ വീണ്ടും പിഴച്ചു. ഏക ട്വൻറി20 മത്സരത്തിലും ഇന്ത്യക്ക്​ ആധികാരിക ജയം. ശ്രീലങ്ക പടുത്തുയർത്തിയ 171 റൺസെന്ന വെല്ലുവിളി ഇന്ത്യ നാലു​ പന്ത്​ ബാക്കിനിൽക്കെ മൂന്ന്​ വിക്കറ്റ്​ നഷ്​ടത്തിൽ അനായാസം മറികടന്നു. ക്യാപ്​റ്റൻ ​േകാഹ്​ലിയുടെയും (54 പന്തിൽ 82) മനീഷ്​ പാണ്ഡെയുടെയും (36 പന്തിൽ 51 നോ​ട്ടൗട്ട്​) അർധ സെഞ്ച്വറിയാണ്​ ഇന്ത്യക്ക്​ തകർപ്പൻ ജയം സമ്മാനിച്ചത്.

171 റൺസെന്ന ലക്ഷ്യവുമായി മറുപടി ബാറ്റിങ്ങിനിറങ്ങിയ ഇന്ത്യയുടെ തുടക്കം മന്ദഗതിയിലായിരുന്നു. 22 റൺസെടുക്കുന്നതിനിടെ രോഹിത്​ ശർമയിലൂടെ ഇന്ത്യക്ക്​ ആദ്യ വിക്കറ്റ്​ നഷ്​​ടപ്പെ​ട്ടു. പിന്നീടെത്തിയ രാഹുലും കാര്യമായ സംഭാവന ചെയ്യാതെ മടങ്ങി. 

എന്നാൽ, ഒരറ്റത്ത്​ പാണ്ഡെയെ കൂട്ടുപിടിച്ച്​ ക്യാപ്​റ്റൻ കോഹ്​ലി നടത്തിയ മനോഹരമായ തിരിച്ചുവരവാണ്​ ഒടുവിൽ ഇന്ത്യയെ വിജയത്തിലെത്തിച്ചത്​. കോഹ്​ലി തന്നെയാണ്​ കളിയിലെ കേമൻ. ലങ്കക്ക്​ വേണ്ടി ലസിത്​ മലിംഗ, സീക്കുഗെ പ്രസന്ന, ഇസുരു ഉദന എന്നിവർ ഒാരോ വിക്കറ്റ്​ വീതം നേടി. നേര​േത്ത ടോസ്​ നഷ്​ടപ്പെട്ട്​ ബാറ്റിങ്ങിനിറങ്ങിയ ശ്രീലങ്കക്ക്​ ദിൽഷൻ മുനവീരയും (29 പന്തിൽ 53) അശൻ പ്രിയഞ്​ജനുമാണ്​ (40 പന്തിൽ 41) ഭേദപ്പെട്ട സ്​കോർ സമ്മാനിച്ചത്​. ഇന്ത്യക്കായി സ്​പിന്നർ യുസ്​വേന്ദ്ര ചഹൽ 43 റൺസ്​ വഴങ്ങി മൂന്ന്​ വിക്കറ്റെടുത്തു. കുൽദീപ്​ യാദവ്​ രണ്ടു​ പേരെ പുറത്താക്കിയപ്പോൾ ഭു​വനേശ്വർ കുമാറും ജസ്​പ്രീത്​ ബുംറയും ഒാരോ വിക്കറ്റെടുത്തു.