ലോകേഷ്​ രാഹുൽ 84; രാജസ്​ഥാനെതിരെ പഞ്ചാബിന്​ ആറ്​ വിക്കറ്റ്​ ജയം

ഇന്ദോർ: രാജസ്​ഥാൻ റോയൽസിനെതിരെ കിങ്​സ്​ ഇലവൻ പഞ്ചാബിന്​ ആറ്​ വിക്കറ്റ്​ ജയം. രാജസ്​ഥാൻ ഉയർത്തിയ 152 റൺസ്​ വിജയലക്ഷ്യം എട്ട്​ പന്ത്​ ശേഷിക്കെ പഞ്ചാബ്​ മറികടന്നു. സ്​കോർ: രാജസ്​ഥാൻ: 152/9. പഞ്ചാബ്​: 155/4 (18.4). അപരാജിത പ്രകടനവുമായി മുന്നിൽനിന്ന്​ നയിച്ച ഒാപണർ ലോകേഷ്​ രാഹുലാണ്​ (54 പന്തിൽ 84) പഞ്ചാബിന്​ അനായാസ ജയമൊരുക്കിയത്​. കരുൺ നായർ (31), സ്​റ്റോണിസ്​ (23) എന്നിവർ പിന്തുണ നൽകി. 

ആദ്യം ബാറ്റ്​ ചെയ്​ത രാജസ്​ഥാൻ നിരയിൽ​ ജോസ്​ ബട്​​ലർ (51) മാത്രമാണ്​ തിളങ്ങിയത്​. മലയാളി താരം സഞ്​ജു വി. സാംസൺ 23 പന്തിൽ 28 റൺസെടുത്തു.  അഫ്​ഗാൻ താരം മുജീബുറഹ്​മാൻ പഞ്ചാബിനായി മൂന്ന്​ വിക്കറ്റ്​ വീഴ്​ത്തി.