റായുഡുവിന്​ സെഞ്ച്വറി; ചെന്നൈക്ക്​ തകർപ്പൻ​ ജയം

പുണെ: പോയൻറ്​ പട്ടികയിലെ മുമ്പന്മാരുടെ പോരാട്ടത്തിൽ സൺറൈസേഴ്​സ്​ ഹൈദരാബാദിനെതിരെ ചെന്നൈ സൂപ്പർകിങ്​സ്​ തകർപ്പൻ വിജയം. ഒാപണർ അമ്പാട്ടി റായുഡു കന്നി സെഞ്ച്വറി നേടിയ മത്സരത്തിൽ എട്ട്​ വിക്കറ്റിനായിരുന്നു ചെന്നൈയുടെ വിജയം. ആദ്യം ബാറ്റ് ചെയ്ത ഹൈദരാബാദ്​ 20 ഓവറില്‍ നാലുവിക്കറ്റ്​ നഷ്​ടത്തിൽ 179 റണ്‍സെടുത്തു. റായുഡുവി​​െൻറയും ഷെയ്​ൻ വാട്​സ​​െൻറയും (57) മികവിൽ ചെന്നൈ 19 ഓവറില്‍ രണ്ടു വിക്കറ്റ് മാത്രം നഷ്​ടപ്പെടുത്തി ലക്ഷ്യം മറികടന്നു.

ധോണിയുടെ ബാറ്റിങ്

 

മികച്ച ബൗളിങ്​ നിരയെന്ന്​ പേരുകേട്ട ഹൈദരാബാദിനെതിരെ ഓപണര്‍മാരായ വാട്‌സനും റായുഡുവും തുടക്കംമുതല്‍ കത്തിക്കയറി. ആക്രമിച്ച്​ കളിച്ച ഇരുവരും അതിവേഗം സ്​കോർ ചലിപ്പിച്ചു. 31 പന്തില്‍ വാട്‌സനും 32 പന്തില്‍ റായുഡുവും അര്‍ധസെഞ്ച്വറി പൂര്‍ത്തിയാക്കി. 57 റണ്‍സെടുത്ത വാട്‌സണ്‍ റണ്ണൗട്ടായി മടങ്ങി. തൊട്ടുപിന്നാലെ രണ്ട്​ റണ്‍സെടുത്ത സുരേഷ്​ റെയ്‌ന സന്ദീപ്​ ശർമക്ക്​ വിക്കറ്റ്​ നൽകി മടങ്ങി. എന്നാല്‍, അർധസെഞ്ച്വറിക്കുശേഷം ഗിയർ മാറ്റിയ റായുഡു 62 പന്തില്‍ സെഞ്ച്വറി പൂര്‍ത്തിയാക്കി. ഏഴ്​ ബൗണ്ടറികളും ഏഴ്​ സിക്‌സുകളും അടക്കം 100 റണ്‍സെടുത്ത്​ റായുഡു ക്യാപ്​റ്റൻ എം.എസ്​. ധോണിയെ (20) സാക്ഷിനിർത്തി ചെന്നൈയെ വിജയത്തിലെത്തിച്ചു. 

അർധ സെഞ്ച്വറി നേടിയ കെയ്ൻ വില്യംസൺ കാണികളെ അഭിവാദ്യം ചെയ്യുന്നു

 

ആദ്യം ബാറ്റിങ്ങിനിറങ്ങിയ ഹൈദരാബാദിന് മോശം തുടക്കമാണ് ലഭിച്ചത്. ഓപണര്‍ അലക്‌സ് ഹെയ്ല്‍സ് (2) എളുപ്പം മടങ്ങി. ആദ്യ 10 ഒാവറിൽ റൺസ്​ കണ്ടെത്താൻ പ്രയാസപ്പെട്ട ഹൈദരാബാദി​​െൻറ​ സ്​കോർ 62-1 എന്ന നിലയിലായിരുന്നു. എന്നാല്‍, നിലയുറപ്പിച്ചശേഷം അടിച്ചുകളിച്ച ശിഖർ ധവാനും (49 പന്തിൽ 79) കെയ്​ൻ വില്യംസണുമാണ്​ (39 പന്തിൽ 51) മാന്യമായ സ്​കോർ സമ്മാനിച്ചത്​.