വീണ്ടും തോറ്റ്​ ബാംഗ്ലൂർ; സൺറൈസേഴ്​സ്​ പ്ലേഒാഫിലേക്ക്​

ഹൈദരാബാദ്​: നായകൻ കെയ്​ൻ വില്യസണും ടീം സൺറൈസേഴ്​സുമാ​ണെങ്കിൽ രണ്ടാമത്​ ബാറ്റ്​ ​ചെയ്യുന്ന ടീം കരുതിയിരിക്കണം. സൺറൈസേഴ്​സിനെ കുറഞ്ഞ സ്​കോറിലൊതുക്കി എളുപ്പം ജയിച്ചു കയറാമെന്ന ബാംഗ്ലൂർ നായകൻ വിരാട്​ കോഹ്​ലിയുടെ അതിമോഹം തകർത്ത്​ തരിപ്പണമാക്കി അഞ്ച്​ റൺസ്​ വിജയവുമായി സൺറൈസേഴ്​സ് ​െഎ.പി.എൽ​ ​പതിനൊന്നാം സീസണിൽ പ്ലേഒാഫിലേക്ക്​ കടക്കുന്ന ആദ്യ ടീമായി.

ആദ്യം ബാറ്റ്​ ചെയ്​ത സൺറൈസേഴ്​സ്​ ഉയർത്തിയ 147 റൺസെന്ന ലക്ഷ്യം പിന്തുടർന്ന ബാംഗ്ലൂർ ഇന്നിങ്​സ്​ 141 റൺസിലൊതുങ്ങി. അവസാന പന്തിൽ ആറ്​ റൺസ്​ വേണമെന്ന അവസ്​ഥയിലായിരുന്നു ബാംഗ്ലൂർ. എന്നാൽ പുറം തിരിഞ്ഞൊരു ഷോട്ടിന്​ ​ശ്രമിച്ച കോളിന്‍ ഡി ഗ്രാന്‍ഡ്‌ഹോമിനെ ബൗള്‍ഡാക്കി ഭുവനേശ്വര്‍ കുമാര്‍ ടീമിന്​ എട്ടാം ജയം നൽകുകയായിരുന്നു.

13 പന്തില്‍ 20 റണ്‍സടിച്ച പാര്‍ഥിവ് പട്ടേലും നായകൻ വിരാട് കോഹ്‌ലിയും (39) മികച്ച തുടക്കം നൽകിയിട്ടും അത്​ തുടരാൺ ബാംഗ്ലൂർ നിരക്കായില്ല. മന്ദീപ് സിംഗും(21) കോളിന്‍ ഡി ഗ്രാന്‍ഡ്‌ഹോമും (33) ആറാം വിക്കറ്റില്‍ ചെറിയൊരു രക്ഷാപ്രവർത്തനം നടത്തിയില്ലായിരുന്നുവെങ്കിൽ പരിതാപകരമാവുമായിരുന്നു ബാംഗ്ലൂരി​​​െൻറ അവസ്ഥ.  മറുവശത്ത്​ ഹൈദരാബാദ് മികച്ച ബൗളിങും ഫീൽഡിങ്ങും കാഴ്​ചവെച്ചു. 

അവസാന ഒാവറിൽ 12 റണ്‍സായിരുന്നു ബാംഗ്ലൂരി​​​െൻറ ലക്ഷ്യം. ആദ്യ അഞ്ചു പന്തില്‍ ആറു റണ്‍സടിച്ച്​ ലക്ഷ്യം ഒരു പന്തില്‍ ആറെന്ന നിലയിലായി. എന്നാൽ അവസാന പന്തില്‍ ഭുവനേശ്വര്‍ ഗ്രാന്‍ഡ്‌ഹോമിനെ ക്ലീന്‍ബൗള്‍ഡാക്കുകയായിരുന്നു.