തന്ത്രങ്ങൾ മെനയുന്ന കാര്യത്തിൽ പരാജയം; ഇന്ത്യൻ ടീമിനെതിരെ ആഞ്ഞടിച്ച്​ കപിൽ

ന്യൂഡൽഹി: ന്യൂസിലന്‍ഡിനെതിരെ തുടരുന്ന കനത്ത തോല്‍വികൾക്കു പിന്നാലെ ഇന്ത്യന്‍ ടീമിനെതിരെ കടുത്ത വിമർശനവുമാ യി മുൻ ഇതിഹാസ നായകൻ കപിൽ ദേവ്​. ഇന്ത്യൻ ടീമി​​െൻറ നിലിവിലെ സെലക്ഷന്‍ രീതിക്കെതിരെയാണ്​ കപിൽ ആഞ്ഞടിച്ചത്​. ടീമി നെ ഇടക്കിടെ മാറ്റി പരീക്ഷിക്കുന്നതാണ് തുടർതോൽവികൾക്ക്​ കാരണമെന്നും ഈ രീതി മാറ്റണമെന്നും​ അദ്ദേഹം പറഞ്ഞു​.

ടീമില്‍ ആരും സ്ഥിരമല്ല. ആരുടെ സ്ഥാനത്തിനും ഒരു ഉറപ്പുമില്ലാത്ത സ്ഥിതിയാണ്​. ഒരു ടീമില്‍ എങ്ങനെയാണ് ഇത്രയധികം മാറ്റങ്ങള്‍ വരുത്താന്‍ കഴിയുന്നതെന്നും കപില്‍ദേവ്​ ചോദിച്ചു. ഇത്തരം നടപടികൾ താരങ്ങളുടെ പ്രകടനത്തെ മോശമായി ബാധിക്കുമെന്നും അദ്ദേഹം പറഞ്ഞു. സാഹചര്യങ്ങളല്ല ഇന്ത്യൻ ടീമിനെ പരാജയപ്പെടുത്തിയത്​. സാഹചര്യങ്ങള്‍ക്കൊത്ത് കളിക്കാത്തതാണ്​. തന്ത്രങ്ങള്‍ മെനയുന്ന കാര്യത്തിലും ടീം പരാജയമാണെന്ന്​ കപില്‍ വിലയിരുത്തി. മികച്ച ഫോമിൽ തുടരുന്ന രാഹുല്‍ പുറത്തിരിക്കുന്നത് ന്യൂസിലന്‍ഡ് പോലുള്ള ടീമുമായി കളിക്കുമ്പോള്‍ സാമാന്യബുദ്ധിക്കു നിരക്കുന്നതല്ലെന്നും കപിൽ ദേവ്​ കൂട്ടിച്ചേർത്തു.