സചിനെ സെഞ്ച്വറിയിൽ സെഞ്ച്വറിയടിക്കാൻ വിട്ടില്ല; ഇംഗ്ലീഷ്​ ബൗളർക്കും അമ്പയർക്കും വധഭീഷണി ഉയർന്നെന്ന്​​ 

ലണ്ടൻ: സചിൻ ടെണ്ടുൽക്കർ എന്നാൽ ഇന്ത്യക്കാർക്ക്​ വെറുമൊരു പേരല്ല മറിച്ച്​ ഒരു വികാരമാണ്​. സചിന്​ വേണ്ടി എന്തും ചെയ്യാൻ മടിക്കാത്തവരാണ്​ ഇന്ത്യൻ ക്രിക്കറ്റ്​ ആരാധകർ. 99ാം അന്താരാഷ്​ട്ര സെഞ്ച്വറിക്ക്​ ശേഷം 100 എന്ന മ​ാന്ത്രിക സംഖ്യയിലെത്താൻ ഒരു വർഷവും 33 ഇന്നിങ്​സുകളുമാണ്​ സചിനും ആരാധകരും കാത്തിരുന്നത്​. 

അക്കാലയളവിൽ സചി​ന്​ അർഹിക്കുന്ന സെഞ്ച്വറി നിഷേധിച്ച​ തനിക്കും അമ്പയർ റോഡ്​ ടക്കറിനും നേരെ വധഭീഷണി ഉയർന്നതായി വെളിപ്പെടുത്തിയിരിക്കുകയാണ്​ ഇംഗ്ലീഷ്​ പേസർ ടിം ബ്രെസ്​നൻ. 2011ൽ ഓവലിൽ നടന്ന ടെസ്​റ്റിൽ സചിനെ 91 റൺസിന്​ പുറത്താക്കിയതാണ്​ സംഭവത്തിന്​ ആധാരം. 

അന്ന്​ നാലു മത്സരങ്ങളടങ്ങിയ പരമ്പര കളിക്കാനായാണ്​ ഇന്ത്യ ഇംഗ്ലണ്ടിലെത്തിയത്​. ആദ്യ മുന്ന്​ മത്സരങ്ങളും തോറ്റ നിരാശയിലായിരുന്നു ഇന്ത്യ. മൂന്ന്​ മത്സരങ്ങളിൽ നിന്ന്​ സചിന്​ നേടാനായത്​ ഒരു ഫിഫ്​റ്റി മാ​ത്രം. നാലാം ടെസ്​റ്റിൽ റെക്കോഡ്​ സെഞ്ച്വറിയിലേക്ക്​ നീങ്ങുന്ന സചി​​െൻറ ഇന്നിങ്​സ്​ വിരൽ കടിച്ചിരുന്നായിരുന്നു ഏവരും ആസ്വദിച്ചത്​. സ്​കോർ 91ൽ എത്തി നിൽക്കേ ബ്രെസ്​ന​​െൻറ പന്ത്​ സചി​​െൻറ പാഡിൽ ഉരസിയതോടെ ഇംഗ്ലീഷ്​ താരങ്ങൾ ശക്​തമായി അപ്പീൽ ചെയ്​തു. ഇതേത്തുടർന്ന്​ അമ്പയർ ടക്കർ വിരലുയർത്തി. പന്ത്​ ലെഗ്​ സ്​റ്റംപിന്​ പുറത്തേക്കാണ്​ പോയതെന്നും​ വിക്കറ്റിൽ സ്​പർശിക്കുന്നില്ലെന്നും ടി.വി റിപ്ലേകളിൽ വ്യക്​തമായിരുന്നു. ഇന്ത്യൻ ക്രിക്കറ്റ്​ കൺട്രോൾ ബോർഡ്​ ഡിസിഷൻ റിവ്യൂ സിസ്​റ്റ​െ​ത്ത (ഡി.ആർ.എസ്​) ശക്​തമായി എതിർക്കുന്ന സമയമായതിനാൽ സചിന്​ തിരിഞ്ഞു നടക്കേണ്ടി വന്നു. 

‘ഓവലിൽ ലെഗ് സ്​റ്റംപിന് പുറത്തുപോയ ഒരു പന്തിൽ ഞങ്ങളുടെ അപ്പീലിനെ തുടർന്ന് ഓസീസ് അംപയർ ടക്കർ സചിനെതിരെ ഔട്ട് വിളിച്ചു. സെഞ്ച്വറിക്ക് അരികെയായിരുന്ന സചിൻ ആ ഫോം വെച്ച്​ 100ാം സെഞ്ച്വറി തികയ്ക്കുമെന്ന് ഉറപ്പുള്ള മത്സരം. പക്ഷേ സച്ചിൻ ഔട്ടായി. പരമ്പര ജയിച്ചു​വെന്ന്​ മാത്രമല്ല ലോക റാങ്കിങ്ങിൽ ഒന്നാം സ്​ഥാനവും ഞങ്ങൾ നേടി’ യോർക്​ഷെയർ ക്രിക്കറ്റ്​ കവേഴ്​സ്​ പോഡ്​കാസ്​റ്റിലൂടെ ബ്രെസ്​നൻ പറഞ്ഞു. 

‘ഞങ്ങൾ രണ്ടുപേർക്കും ഏറെക്കാലം വധഭീഷണികൾ ലഭിച്ചുകൊണ്ടിരുന്നു. എനിക്ക് ട്വിറ്ററിലൂടെയാണ് കൂടുതൽ വധഭീഷണി ലഭിച്ചത്. ടക്കറിന് അദ്ദേഹത്തി​​െൻറ ആസ്ട്രേലിയയിലെ സ്വന്തം മേൽവിലാസത്തിൽ ഭീഷണി കത്തുകൾ വന്നു’- ബ്രെസ്​നൻ ഉള്ളുതുറന്നു.  

‘എന്തു ധൈര്യത്തിലാണ് നിങ്ങൾ സചിനെ ഔട്ട് വിളിച്ചത്. ആ പന്ത് ലെഗ് സ്​റ്റംപിന് പുറത്തേക്കാണ് പോയത്’ എന്നായിരുന്നു ഭീഷണികളുടെ ഉള്ളടക്കമെന്ന്​ ബ്രസ്​നൻ കൂട്ടിച്ചേർത്തു. ഭീഷണിയെത്തുടർന്ന്​ പൊലീസ്​ സംരക്ഷണത്തിലായിരുന്നു ടക്കർ ഏ​റെക്കാലം ജീവിച്ചതെന്നും ​െബ്രസ്​നൻ​ വെളിപ്പെടുത്തി. 

2011 മാർച്ച്​ 12ന്​ നാഗ്​പൂരിൽ ലോകകപ്പിൽ ദക്ഷിണാഫ്രിക്കക്കെതിരെയായിരുന്നു (111) സചി​​െൻറ 99ാം സെഞ്ച്വറി. പിറ്റേ വർഷം മാർച്ച്​ വരെയാണ്​ ചരിത്ര നിമിഷത്തിനായി സചിനും ആരാധകരും ഒരുപോലെ കാത്തിരുന്നത്​. 2012 മാർച്ച്​ 16ന്​ ഏഷ്യാ കപ്പിൽ ബംഗ്ലാദേശിനെതിരെയാണ്​ സചിൻ സെഞ്ച്വറിയിൽ സെഞ്ച്വറിയടിച്ചത്​.