‘മൂന്ന്​ തവണ ആത്മഹത്യയെക്കുറിച്ച്​ ചിന്തിച്ചു’ വെളിപ്പെടുത്തലുമായി മുഹമ്മദ്​ ഷമി

ന്യൂഡൽഹി: തൻെറ ജീവിതത്തിൽ മുന്ന്​ തവണ ആത്മഹത്യയെ പറ്റി ചിന്തിച്ച ഇരുണ്ട കാലത്തെക്കുറിച്ച്​ തുറന്നുപറഞ്ഞ്​​ ഇന്ത്യൻ ക്രിക്കറ്റ്​ താരം മുഹമ്മദ്​ ഷമി. സഹതാരം രോഹിത്​ ശർമയുമായി നടത്തിയ ഇൻസ്​റ്റഗ്രാം ചാറ്റ്​ ഷോയിലാണ്​ ഷമിയുടെ ഞെട്ടിക്കുന്ന വെളിപ്പെടുത്തൽ.

‘2015 ലോകപ്പി​നിടെ എനിക്ക്​ പരിക്കേറ്റു. ജീവിതത്തിലെ ഏറ്റവും വേദന നിറഞ്ഞ സമയമായിരുന്നു അത്​. വളരെയധികം സംഘർഷഭരിതമായ കാലഘട്ടം കൂടിയായിരുന്നു​. വീണ്ടും കളി തുടങ്ങിയപ്പോൾ ചില വ്യക്​തിപരമായ പ്രശ്​നങ്ങളിലൂടെ കടന്ന്​ പോകേണ്ടി വന്നു. എൻെറ കു​ടുംബത്തിൻെറ പിന്തുണയില്ലായിരുന്നെങ്കിൽ എനിക്ക്​ കരിയർ തന്നെ നഷ്​ടമായേനെ. മൂന്ന്​ തവണയാണ്​ ഞാൻ ആത്മഹത്യയെക്കുറിച്ച്​ ചിന്തിച്ചത്​’ ഷമി പറഞ്ഞു. 

‘24ാം നിലയിലാണ് ഞങ്ങൾ താമസിച്ചിരുന്നത്. ക്രിക്കറ്റ്​ അന്ന്​ എൻെറ ചിന്തയിലേ ഇല്ലായിരുന്നു. മാനസികവിഷമം കാരണം ഞാന്‍ ബാല്‍ക്കണിയില്‍ നിന്നും എടുത്തുച്ചാടുമോയെന്ന് വരെ കുടുംബം ഭയന്നു. മാനസികമായി തകർന്നിരിക്കുന്ന സാഹചര്യത്തിൽ എൻെറ രണ്ട്​ മൂന്ന്​ സുഹൃത്തുക്കൾ എപ്പോഴും കൂടെയുണ്ടായിരുന്നു. കുടുംബം കൂടെയുണ്ടെങ്കിൽ ഏത്​ സാഹചര്യത്തിലൂടെയും നമുക്ക്​ കടന്ന്​ പോകാം. അന്നവർ കൂടെ നിന്നില്ലായിരുന്നെങ്കിൽ ഞാൻ ആ കടുംകൈ ചെയ്​തേനെ. മറ്റൊന്നിനെക്കുറിച്ചും ചിന്തിക്കാതെ ക്രിക്കറ്റിൽ ശ്രദ്ധ കേന്ദ്രീകരിക്കാൻ മാതാപിതാക്കൾ എന്നോട്​ പറഞ്ഞു. ഡെറാഡൂണിലെ അക്കാദമിയിൽ പരിശീലനം പുനരാരംഭിച്ച ഞാൻ ഏറെ വിയർപ്പൊഴുക്കി’ ഷമി പറഞ്ഞു.  

18 മാസങ്ങൾക്ക്​ ശേഷമാണ്​ പരിക്ക്​ പൂർണമായി ഭേദമായി ഷമി വീണ്ടും കളത്തിൽ സജീവമായത്​. 2018ലാണ്​ ഗാർഹിക പീഢനം ആരോപിച്ച്​ ഭാര്യ ഹസിൻ ജഹാൻ ഷമിക്കെരതിരെ കേസ്​ കൊടുത്തത്​.