ഫിറ്റല്ല, പോരാത്തതിന്​ തടിയനും; പാക്​ നായകനെ വിമർശിച്ച്​ അക്​തർ

ലണ്ടൻ: പാകിസ്​താൻ നായകൻ സർഫറാസ്​ അഹമദിനെ ശക്​തമായി വിമർശിച്ച്​ എക്കാലത്തെയും മികച്ച ഫാസ്റ്റ്​ ബൗളർമാരിലൊരാളായ ശുഐബ്​ അക്​തർ. സർഫറാസ്​ തടിയനാണെന്നും ഒട്ടും ശാരീരിക ക്ഷമതയില്ലെന്നുമാണ്​​ അക്​തർ ട്വിറ്ററിലൂടെ പരിഹസിച്ചത്​​.

‘ടോസ്​ ചെയ്യാൻ സർഫറാസ്​ വന്നപ്പോൾ അദ്ദേഹത്തിൻെറ വയറ്​ പുറന്തള്ളിയ നിലയിലും മുഖം തടിച്ച്​ തൂങ്ങിയ അവസ്ഥയിലുമായിരുന്നു. ഞാൻ കണ്ടതിൽ വെച്ച്​ ശാരീരിക ക്ഷമത തീരെയില്ലാത്ത ആദ്യത്തെ നായകനാണ്​ അദ്ദേഹം. ഒരിടത്ത്​ നിന്ന്​ മറ്റൊരിടത്തേക്ക്​ ചലിക്കാൻ പോലും സാധിക്കുന്നില്ല. സ്റ്റംപിന്​ പിറകിൽ അയാൾ കഷ്​ടപ്പെടുകയാണ്’​. -അക്തർ​ തുറന്നടിച്ചു.

വെസ്റ്റ്​ ഇൻഡീസിനെതിരായ മത്സരത്തിലേറ്റ കനത്ത പരാജയമാണ്​​ പാകിസ്​താൻ ടീമിന്​ നേരെ വൻ വിമർശനമുയരാൻ കാരണമായത്​. ആരാധകരും മുൻ താരങ്ങളും ടീമിനെ പരസ്യമായി വിമർശിച്ച്​ രംഗത്തുവന്നിട്ടുണ്ട്​. 105 റൺസിന്​ പുറത്തായ പാകിസ്​താനെതിരെ 14ഓവറിൽ വിൻഡീസ്​ വിജയം നേടിയിരുന്നു.