1000 ജയം തികച്ച് ബയേണ്‍

മ്യൂണിക്: പരിക്കില്‍നിന്നും മോചിതനായി മടങ്ങിയത്തെിയ ആര്‍യന്‍ റോബന്‍ വലകുലുക്കിയ മത്സരത്തില്‍ ബയേണ്‍ മ്യൂണിക്കിന് ജയം. ജര്‍മന്‍ ബുണ്ടസ് ലിഗയില്‍ ക്ളബിന്‍െറ 1000ാമത്തെ ജയവും. ക്ളോണ്‍ എഫ്.സിയെ 4-0ത്തിന് തോല്‍പിച്ചാണ് ചാമ്പ്യന്‍ ക്ളബ് ചരിത്രനേട്ടം സ്വന്തമാക്കിയത്. ജര്‍മനിയില്‍ 1000 ജയം നേടുന്ന ആദ്യ ടീമെന്ന റെക്കോഡും ബയേണ്‍ സ്വന്തംപേരിലെഴുതി. കളിയുടെ 35ാം മിനിറ്റില്‍ റോബനിലൂടെ സ്കോറിങ് തുടങ്ങിയ ചാമ്പ്യന്മാര്‍ക്കുവേണ്ടി അര്‍തുറോ വിദാല്‍, റോബര്‍ട്ട് ലെവന്‍ഡോവ്സ്കി, തോമസ് മ്യൂളര്‍ എന്നിവരും വലകുലുക്കി. തുടര്‍ച്ചയായി 10ാം ജയം നേടിയ ബയേണ്‍ രണ്ടാം സ്ഥാനക്കാരില്‍നിന്നും 10 പോയന്‍റ് ലീഡും നേടി. ബയേണിന് 30ഉം, ബൊറൂസിയ ഡോര്‍ട്മുണ്ടിന് 20ഉം പോയന്‍റാണുള്ളത്. ബയര്‍ ലെവര്‍കൂസന്‍ 4^3ന് സ്റ്റുട്ട്ഗട്ടിനെ തോല്‍പിച്ചു.