എഫ്​.എ കപ്പ്​: സിറ്റിയെ വീഴ്​ത്തി ആഴ്​സനൽ ഫൈനലിൽ

ലണ്ടൻ: ആഴ്​സനൽ പഴയ പ്രതാപത്തി​​െൻറ മിന്നലാട്ടങ്ങൾ പകരുകയാണ്​. നാലു ദിവസത്തിനിടെ രണ്ടു ചാമ്പ്യൻ ടീമുകൾക്കെതിരായ ജയത്തോടെ മൈക്കൽ ആർടേറ്റയിലൂടെ പീരങ്കിപ്പട പുനർജനിക്കുന്നു. നാലു ദിനം മുമ്പ്​ പ്രീമിയർ ലീഗ്​ ജേതാക്കളായ ലിവർപൂളിനെയാണെങ്കിൽ (2-1), ശനിയാഴ്​ച രാത്രിയിൽ എഫ്​.എ കപ്പ്​ സെമിയിൽ മാഞ്ചസ്​റ്റർ സിറ്റിയെ തച്ചുടച്ചാണ്​ (2-0) ആഴ്​സനലി​​െൻറ ജൈത്രയാത്ര. വെംബ്ലി സ്​റ്റേഡിയത്തിൽ നടന്ന മത്സരത്തിൽ പിയറി എംറിക്​ ഒബുമെയാങ്ങി​​െൻറ ഇരട്ട ഗോളിലായിരുന്നു ആഴ്​സനൽ വിജയം. ആശാനും ശിഷ്യനും തമ്മിലെ പോരാട്ടമായാണ്​ ഇംഗ്ലീഷ്​ മാധ്യമങ്ങൾ സിറ്റി-ആഴ്​സനൽ മത്സരത്തെ വിശേഷിപ്പിച്ചത്​. സിറ്റിയിൽ പെപ്​ ഗ്വാർഡിയോളയുടെ സഹായിയായി നിൽക്കെയാണ്​ ആർടേറ്റ ത​​െൻറ പഴയ ടീമി​​െൻറ പരിശീലകവേഷമേറ്റെടുക്കുന്നത്​. 

കളിയുടെ ആദ്യ പത്ത്​ മിനിറ്റ്​ സിറ്റിയുടെ മുന്നേറ്റത്തിൽ ​ പ്രകമ്പനം കൊണ്ടു. ഗബ്രിയേൽ ജീസസ്​, ഡിബ്രുയിൻ, സ്​റ്റർലിങ്​, ഡേവിഡ്​ സിൽവ, റിയാദ്​​ മെഹ്​റസ്​ താരപ്പട ആഴ്​സനൽ പെനാൽറ്റി ബോക്​സിനുള്ളിൽതന്നെ താവളമടിച്ചു. എന്നാൽ, ഡേവിഡ്​ ലൂയിസ്​, ഷൊദ്​റാൻ മുസ്​തഫി, കീരൺ ടിയർനി പ്രതിരോധവും ഗോളി എമിലിയാനോ മാർടിനസും ഫോമിലേക്കുയർന്നതോടെ എതിരാളികളുടെ അടവുകളെല്ലാം പാഴായി. കൊടുങ്കാറ്റു വേഗത്തിൽ ആക്രമിക്കുന്ന സിറ്റി ശൈലിയെ പ്രതിരോധിച്ച്​ ആക്രമിക്കുന്നതായിരുന്നു ആർടേറ്റ രീതി.

അത്​ 19ാം മിനിറ്റിൽതന്നെ ഫലം കണ്ടു. സ്വന്തം ബോക്​സിനുള്ളിൽനിന്നു തുടങ്ങിയ നീക്കം വിങ്ങിൽ നികോളസ്​ പെപെയിലൂടെ ഒബുമെയാങ്ങി​​െൻറ ടൈറ്റ്​ ആംഗിൾ ഫിനിഷിങ്ങിൽ ഗോൾ വലതൊടു​േമ്പാഴേക്കും 18 പാസ്​ പൂർത്തിയായിരുന്നു. കളത്തിലുണ്ടായിരുന്ന 11 ആഴ്​സനൽ താരങ്ങൾ അതിൽ സ്​പർശിക്കുകയും ചെയ്​തു. സിറ്റിയെ മാനസികമായി ഞെട്ടിക്കാൻ ശേഷിയുള്ളതായിരുന്നു ആ ടീം ഗോൾ. രണ്ടാം പകുതിയിലെ 71ാം മിനിറ്റിൽ മറ്റൊരു അ​തിവേഗ കൗണ്ടർ അറ്റാക്കിലൂടെ ഒബുമെയാങ്​ വീണ്ടും വലകുലുക്കി. മാഞ്ചസ്​റ്റർ യുനൈറ്റഡ്​ -ചെൽസി രണ്ടാം സെമിയിലെ വിജയികളാവും ആഗസ്​റ്റ്​ ഒന്നിന്​ നടക്കുന്ന ഫൈനലിൽ ആഴ്​സനലി​​െൻറ എതിരാളികൾ.