മകാവുവിനെ തോൽപിച്ചു; ഇന്ത്യ ഏഷ്യ കപ്പ്​ യോഗ്യതക്കരികെ

മകാവു: പകരക്കാരനായി ഇറങ്ങി ഹീറോ ആയ ബൽവന്ത്​​​ സിങ്ങി​​െൻറ മികച്ച രണ്ടു ഗോളുകളിൽ മകാവുവിനെതിരെ ഇന്ത്യക്ക്​ ജയം. ഏഷ്യ കപ്പ്​ യോഗ്യത മത്സരത്തിൽ മറുപടിയില്ലാത്ത രണ്ടു​ ഗോളിന്​ ബൽവന്ത്​ ജയമൊരുക്കിയപ്പോൾ, ഇന്ത്യക്കിത്​ തുടർച്ചയായ 11ാം അന്താരാഷ്​ട്ര മത്സരത്തിലെ ജയമായി. ഗ്രൂപ്​ ‘എ’യിൽ ഒമ്പതു പോയൻറുമായി ഇന്ത്യ ഒന്നാം സ്​ഥാനവും നിലനിർത്തി.  

മകാവു ​റാങ്കിങ്ങിൽ ഏറെ പിറകിലായിരുന്നെങ്കിലും കരുതലോടെയാണ്​ ​ഇന്ത്യ കളി മെനഞ്ഞത്​. ആദ്യ പകുതിയിൽ മകാവുവി​​െൻറ ഒറ്റപ്പെട്ട ആക്രമണങ്ങളെ പ്രതിരോധിച്ച ഇന്ത്യ, പതിയെ മത്സരം കൈപ്പിടിയിലൊതുക്കി. ആദ്യ പകുതിയിൽ ഇന്ത്യയുടെ മുന്നേറ്റങ്ങൾ മികച്ചുനിന്നെങ്കിലും മത്സരം ഗോൾരഹിതമായി തുടർന്നു.

സമനിലയിലേക്ക്​​ നീങ്ങുമെന്നു തോന്നിച്ചെങ്കിലും രണ്ടാം പകുതിയിൽ കോച്ച്​ കോൺസ്​റ്റ​ൈൻറ​​െൻറ തീരുമാനം ഒടുവിൽ രക്ഷക്കെത്തുകയായിരുന്നു. ലിങ്​ദോയെ പിൻവലിച്ച്​​ രണ്ടാം പകുതിയിൽ മൈതാനത്തെത്തിയ ബൽവന്ത്​ രണ്ടു ഗോളുകൾ നേടി താരമായി. 57ാം മിനിറ്റിൽ ഹെഡറിലൂടെയായിരുന്നു ആദ്യ ഗോൾ. നാരായൺ ദാസ്​ വിങ്ങിൽനിന്ന്​ നൽകിയ ക്രോസിന്​ തലവെച്ചപ്പോൾ ബുള്ളറ്റ്​ പോലെ പന്ത്​ വലയിൽ. തിരിച്ചടിക്കാനുള്ള മകാവുവി​​െൻറ ശ്രമം മലയാളി താരം അനസ്​ എടത്തൊടികയുടെ നേതൃത്വത്തിൽ ഇല്ലാതാക്കിയതോടെ ഇന്ത്യക്ക്​ പ്രതീക്ഷ കൈവന്നു. 82ാം മിനിറ്റിലും ബൽവന്ത്​​ സിങ്ങാണ്​ ഗോൾ നേടുന്നത്​. ഇത്തവണ ​ഗോളി ഗുർപ്രീത്​ സിങ്​ നീട്ടിനൽകിയ പന്ത്​ ക്ലിയർ ചെയ്യാൻ എതിർ പ്രതിരോധത്തിന്​ പിഴച്ചപ്പോഴായിരുന്നു ബൽവന്ത്​ സിങ്ങി​​െൻറ ഗോൾ.