‘‘റൊണാൾഡോയുടെ കളിയൊന്നും അങ്ങനെ പൊയ്പ്പോവൂല’’; ഇരട്ട ഗോളിൽ പിറന്നത്​ ഒരു പിടി റെക്കോഡുകൾ

ടൂറിൻ: ക്രിസ്​റ്റ്യാനോ റൊണാൾഡോയുടെ പോരാട്ട വീര്യവും കളിയഴകും വർധിച്ചുകൊണ്ടേയിരിക്കുന്നുവെന്നതിന്​ ഇറ്റാലിയൻ സിരി എ സാക്ഷി. തിങ്കളാഴ്​ച രാത്രി നടന്ന മത്സരത്തിൽ ലാസിയോക്കെതിരെ ഇരട്ടഗോളുകൾ കുറിച്ചതോടെ അപൂർവ്വമായ ഒരുപിടി റെക്കോഡുകളും റൊണാൾഡോയുടെ പേരിലായി.

ഇംഗ്ലീഷ്​ പ്രീമിയർ ലീഗ്​, സ്​പാനിഷ്​ ലീഗ്​, ഇറ്റാലിയൻ സീരി എ എന്നീ മൂന്നുപ്രധാന ലീഗുകളിലും 50 ഗോളുകൾ നേടുന്ന ആദ്യ താരമായി റൊണാൾഡോ മാറി. പ്രീമിയർ ലീഗിൽ 84ഉം ലാലിഗയിൽ 311ഉം ഗോളുകളാണ്​ റൊണാൾഡോയുടെ സമ്പാദ്യം​. 

1995നു ശേഷം സിരി എയിൽ ഏറ്റവും വേഗത്തിൽ 50ഗോളുകൾ കുറിക്കുന്ന താരമായും ക്രിസ്​റ്റ്യാനോ മാറി.  ഷെവ്​ചെ​േങ്കായുടെ പേരിലുണ്ടായിരുന്നു 68 മത്സരങ്ങളുടെ റെക്കോർഡ്​ 61 മത്സരങ്ങളിൽ നിന്ന്​ റൊണാൾഡോ തിരുത്തിയെഴുതി. 70 മത്സരങ്ങളിൽ നിന്നും നേട്ടം കൈവരിച്ച ബ്രസീലി​​െൻറ റൊണാൾഡോയാണ്​ മൂന്നാമതുള്ളത്​. 

അന്താരാഷ്​ട്ര മത്സരങ്ങളിൽ നിന്നും രേഖപ്പെടുത്തിയ ഗോളുകളിൽ പെലെക്ക്​ തൊട്ടുപിന്നാലെ റൊണാൾഡോ എത്തിയെന്ന്​ അന്താരാഷ്​ട്ര കായിക വെബ്​സൈറ്റുകൾ റിപ്പോർട്ട്​ ചെയ്യുന്നു. 767 ഗോളുകളുള്ള പെലെക്ക്​ പിന്നിലായി 734 ഗോളുകൾ വീതം നേടി റൊണാൾഡോയും ബ്രസീലിയൻ ഇതിഹാസം റൊമാരിയോയുമാണുള്ളത്​. ഗെൾഡ്​ മ്യൂളർ 720 ഗോളുകളും ലയണൽമെസ്സി 716 ഗോളുകളുമാണ്​ നേടിയിട്ടുള്ളത്​. 

ലാസിയോക്കെതിരയുള്ള ജയത്തോടെ ജുവൻറസ്​ കിരീടത്തോട്​ ഒരുപടി കൂടി അടുത്തു. 34 മത്സരങ്ങളിൽ നിന്നും 80 പോയൻറാണ്​ ജുവ​ൻറസിനുള്ളത്​. രണ്ടാമതുള്ള അറ്റ്​ലാൻറക്ക്​ 35 മത്സരങ്ങളിൽ നിന്നും 74 പോയൻറാണുള്ളത്​. 34 മത്സരങ്ങളിൽ നിന്നും 72പോയൻറുള്ള ഇൻറർമിലാനാണ്​ ജുവൻറസിന്​ നേരിയ വെല്ലുവിളി ഉയർത്തുന്നത്​.