സ്​റ്റൈലിഷ്​ ബെക്കാമിന്​​ ഇന്ന്​ 45ാം പിറന്നാൾ, ആ ഫ്രീകിക്ക്​ മറക്കാനാകുമോ? VIDEO

ഡേവിഡ്​ ബെക്കാം. കാൽപന്ത്​ ലോകം ഏറ്റവും ആഘോഷിച്ച പേരുകളിലൊന്നിന്​ ഇന്ന്​ 45ാം പിറന്നാൾ. ഇംഗ്ലീഷ്​ ഫുട്​ബാളിൻെറ അലമാരയിലേക്ക്​ കിരീടങ്ങളൊന്നും കൊണ്ടുവന്നിട്ടില്ലെങ്കിലും ബെക്കാം ഇംഗ്ലണ്ടുകാർക്ക്​ അന്നും ഇന്നും മാനസപുത്രനാണ്​. ബെക്കാമിൻെറ കാലിൽനിന്നും തൊടുത്തുവിട്ട പന്തുകൾ അസ്​ത്രം കണക്കേ എതിരാളികളുടെ ചങ്കിൽ തറച്ചതിൻെറ ഓർമകൾ ഇപ്പോഴും അവർക്കുണ്ട്​.

2001 ഒക്​ടോബർ ആറിന്​ ഓൾഡ്​ ട്രാഫോഡിലെ സായാഹ്നം മാത്രം മതി ഇംഗ്ലീഷുകാർക്ക്​ ബെക്കാമിനെ ഇന്നും ഓമനിക്കാൻ. ഗ്രീസിനെതിരെയുള്ള ലോകകപ്പ്​ യോഗ്യതറൗണ്ടിലെ നിർണായക മത്സരമായിരുന്നു അത്​. സ്വന്തം ​ഗ്രൗണ്ടിൽ ഇംഗ്ലണ്ടിനെ ഞെട്ടിച്ചുകൊണ്ട്​ ഗ്രീസ്​ 36ാം മിനിറ്റിൽ മുന്നിലെത്തി. ടെഡ്ഡി ഷെറിങ്ങാമിൻെറ ഗോളിലൂടെ 68ാം മിനിറ്റിൽ ഇംഗ്ലണ്ട്​ തിരിച്ചടിച്ചെങ്കിലും ആരവങ്ങൾ അധികം നീണ്ടില്ല. ഒരുമിനിറ്റിന്​ ശേഷം ഗ്രീസ്​ ഇംഗ്ലണ്ടിൻെറ വലയിലേക്ക്​ രണ്ടാം ഗോളും അടിച്ചുകയറ്റി.

മത്സരം ഇഞ്ചുറി ടൈമിലേക്ക്​ കടന്ന​പ്പോഴും ഇംഗ്ലണ്ട്​ ഒരുഗോളിന്​ പിന്നിലായിരുന്നു​. ഇംഗ്ലീഷ്​ ആരാധകർ ക്ഷുഭിതരായിത്തുടങ്ങി. അപ്പോഴാണ്​ പെനൽറ്റി ബോക്​സിൽനിന്നും മീറ്ററുകളുടെ അകലത്തിൽ ഇംഗ്ലണ്ടിന്​ അനുകൂലമായി ​ഫ്രീകിക്ക്​ വീണുകിട്ടുന്നത്​. ഗോളിലേക്കെത്താൻ വിദൂരസാധ്യതമാത്രം. ഏഴാം നമ്പർ ജഴ്​സിയിൽ ബെക്കാം തൻെറ സ്വതസിദ്ധമായ റണ്ണപ്പോടെ കിക്കെടുത്തു.

മുന്നിൽ പ്രതിരോധമൊരുക്കിയ ​ഗ്രീക്ക്​ ഭടൻമാരെ മറികടന്ന്​ പന്ത്​ പോസ്​റ്റിൻെറ ഇടതുമൂലയിലേക്ക് പരുന്തി​​നെപ്പോലെ താണിറങ്ങി. ഇംഗ്ലീഷ്​ ആരാധകർ ആർത്തുവിളിച്ചു. ടെലിവിഷൻ കമ​േൻററ്റർ എനിക്കിത്​ വിശ്വസിക്കാനാകുന്നില്ലെന്ന്​ അലറിവിളിച്ചു. ഗോളിൻെറ പിൻബലത്തിൽ ഇംഗ്ലണ്ട്​ ലോകകപ്പ്​ യോഗ്യത ഉറപ്പിച്ചു.

അലക്​സ്​ ഫെർഗൂസനൊപ്പമുള്ള മാഞ്ചസ്​റ്റർ യുനൈറ്റഡ്​ കാലമാണ്​​ ക്ലബ്​ ഫുട്​ബാളിൽ ബെക്കാമിൻെറ സുവർണസമയം. 2003ൽ റയൽ മാഡ്രിഡിലേക്ക്​ ചേക്കേറി. സിനദിൽ സിദാൻ, ലൂയിസ്​ ഫിഗോ, റൊണാൾഡോ, റോബർ​ട്ടോ കാർലോസ്​ എന്നിവരടങ്ങുന്ന വൻ താരനിരയായിരുന്നു ബെക്കാമിനൊപ്പമുണ്ടായിരുന്നത്​. തുടർന്ന്​ വൻതുകക്ക്​ അമേരിക്കൻ ക്ലബായ ലാ ഗാലക്​സിയിൽ പോയ ബെക്കാം ഇടക്കാലത്ത്​ എ.സി മിലാനായും പന്തുതട്ടിയിരുന്നു.

മോഡലും ഫാഷൻ ഡിസൈനറുമായ വിക്​ടോറിയയാണ്​ ഭാര്യ. നാലുമക്കളുണ്ട്​. മോഡലിങ്ങും യാത്രകളുമായി സമൂഹമാധ്യമങ്ങളിൽ ബെക്കാം ഇപ്പോഴും തരംഗമായിത്തുടരുകയാണ്​.