എഫ്​.എ കപ്പിൽ നോട്ടിങ്​ഹാം ഫോറസ്​റ്റിനോട് തോറ്റ് ആഴ്​സനൽ പുറത്ത്​

ലണ്ടൻ: നിലവിലെ ചാമ്പ്യന്മാരായ ആഴ്​സനൽ എഫ്​.എ കപ്പ്​ ഫുട്​ബാൾ മൂന്നാം റൗണ്ടിൽ പുറത്ത്​. രണ്ടാം ഡിവിഷൻ ക്ലബായ നോട്ടിങ്​ഹാം ഫോറസ്​റ്റ്​ സ്വന്തം ഗ്രൗണ്ടിൽ നിറഞ്ഞാടിയപ്പോൾ 4^2നായിരുന്നു ആഴ്​സനലി​​െൻറ നാണംകെട്ട തോൽവി. നാലു വർഷത്തിനിടെ മൂന്നു തവണ എഫ്​.എ കപ്പിൽ മുത്തമിട്ട ആഴ്​സനലിനെ കളിപഠിപ്പിക്കും വിധമായിരുന്നു രണ്ടാം ഡിവിഷൻ ക്ലബായ നോട്ടിങ്​ഹാം കളംവാണത്​. എറിക്​ ലിചാ ഇരട്ട ഗോൾ നേടിയപ്പോൾ, ബെൻ ബ്രെർട്ടനും, കീരൺ ഡവലും ഒാരോ ഗോളടിച്ചു. ആഴ്​സനലിനായി പെർ മെർറ്റസാകറും ഡാനി വെൽബകും സ്​കോർ ചെയ്​തെങ്കിലും തോൽവി ഒഴിവാക്കാനായില്ല. 

ഗോളി പീറ്റർചെക്ക്​, അലക്​സിസ്​ സാഞ്ചസ്​, മെസ്യൂത്​ ഒാസിൽ, അലക്​സാന്ദ്രെ ലകസെറ്റെ തുടങ്ങിയ സീനിയർ താരങ്ങൾക്ക്​ വിശ്രമം നൽകി ഒമ്പത്​ മാറ്റങ്ങളുമായിറങ്ങിയ ആഴ്​സനലിന്​ അപ്രതീക്ഷിതമായിരുന്നു ഫലം. ഗോളി ഡേവിഡ്​ ഒസ്​പിനയുടെ പിഴവുകളും, പ്രതിരോധത്തിലെ പകരക്കാരുടെ വീഴ്​ചകളും തിരിച്ചടിയായി. 1996ന്​ ശേഷം ഇതാദ്യമായാണ്​ പീരങ്കിപ്പട മൂന്നാം റൗണ്ടിൽ മടങ്ങുന്നത്​. മറ്റൊരു മത്സരത്തിൽ ടോട്ടൻഹാം ജയത്തോടെ മുന്നേറി.